Umumaro wo kurya ibishyimbo.

Iyi nyandiko iragufasha kumenya byinshi ku bishyimbo harimo kumenya intungamubiri ziba mu bishyimbo,umwihariko wabyo ku bindi biribwa ndetse n’umumaro w’ibishyimbo ku buzima bw’ikiremwamuntu.

Ibishyimbo ni ibiribwa biboneka mu bice bitandukanye by’u Rwanda bikaba ingenzi cyane ku buzima bw’umuntu bitewe n’uko bikungahaye ku ntungamubiri zitandukanye muri zo twavugamo nk’inyubakamubiri(Protein),uturemangingondodo(Fibre),vitamine B,imyunyu ngugu nk’ubutare,potasiyumu,manyeziyumu,n’indi myunyu ngugu n’ibindi, ibi byose bigirira umubiri imimaro itandukanye cyane ko ibishyimbo bifite umwihariko wo gukumira indwara zitandukanye mu gihe wabiriye ku rugero ruhagije.

Ibishyimbo nubwo biboneka ku buryo buhagije mu gihugu cyacu usanga hari benshi batabirya bitewe n’imyumvire bafite kuri byo twavugamo nk’abavuga ko bibahindura igikara ndetse no kuba ari ibiribwa by’abanyacyaro, ibi ntabwo aribyo na gato, kuko iyo utarya ibishyimbo uba uvukije ubuzima bwawe amahirwe menshi .

Muri iyi nyandiko twabegeranirije imwe mu mimaro itandukanye izanwa no kurya ibishyimbo, muri iyo twavugamo ko: .

 Ibishyimbo bifasha urwungano ngogozi gukora neza ndetse bikanarinda ikibazo cy’ impatwe ibi bibishobozwa n’uko bikungahaye ku turemangingo ndodo.

 Ibishyimbo bifasha mu kugabanya ibiro bitewe nuko bikungahaye kuri proteyine ndetse n’uturemangingo ndodo ibi bifasha umuntu kumva ahaze bityo ubushake bwo kurya buri kanya bukagabanuka kuko uba wumva idashonje ndetse nkuko tubikesha ikigo gitanga inama ku buzima kitwa American College of Nutition gitangaza ko ubushakashatsi bakoze bugaragazako abantu barya ibishyimbo baba bafite amahirwe yo kugabanura ibiro kukigero cya 22%.

 Ibishyimbo bifasha mu guca ukubiri n’ikibazo cyo kubura amaraso kizwi nka Anemia bitewe n’uko bikungahaye ku butare, ubu butare iyo bwabuze mu mubiri nibyo bitera anemia.

 Ibishyimbo bigabanya ibyago byo kurwara kanseri zitandukanye bitewe nuko bikungahaye kubinyabutabire birinda uturemangingomfatizo twubatse umubiri kwangirika ndetse no kuba hakorwa uturenze udukenewe,byumwihariko ibishyimbo birinda Kanseri y’ibere ku rugero rwo hejuru.

 Ibishyimbo bifasha umutima gukora neza bitewe nuko bikungahaye ku myunyu ngugu nka Potasiyumu na sodiyumu ingenzi cyane mu kubungabunga ubuzima bw’umutima.
 Ibishyimbo bifasha mukugabanya urugimbu mu maraso mu gihe urugimbu rubi ruzwi nka low density lipoproteine (LDL) rwazamutse.

 Ibishyimbo bifasha mu kuringaniza isukari mu maraso bityo ugaca ukubiri n’indwara yo kugira isukari nyinshi mu maraso izwi nka Diyabete.
Nkuko twagiye tubigaragaza rero ibishyimbo bifitiye umumaro munini ubuzima bw’ikiremwa muntu,niba wajyga wibaza icyo wakora ngo ugere kuri ibi byiza imenyereze kurya ibishyimbo nibura biboneke ku ifunguro rimwe muyo ufata k’umunsi.

Src: health.com
[email protected]