UBURYO BWO GUSURWA N’IMANA Theophile DUSABEYEZU

Itangiriro 18:21 Ndamanuka ndebe ko bakora ibihwanye rwose no gutaka kw’abaharega kwangezeho, kandi niba atari ko bimeze, ndabimenya."

Iri jambo ryavuzwe n’Imana ubwo yazaga kureba amakuru ya Sodomu na Gomora, kubw’amakuru ngo yari yumvise, mu ururimi rw’igifaransa nize ko iyi nshinga yitwa gusura ikoreshwa mu buryo bubiri.

Rendre visiter: uku ni ugusurana bisanzwe igakunda gukoreshwa n’inshuti n’imiryango, urugero nka kumwe Korali isohoka ikajya gusura indi.

Visiter: Iri ni isura umuntu akora mu gihe ajyanywe no kugira icyo agenzura. Dufashe urugero twavuga nko gusura parc, gusurwa na Rwanda Revenue Authority ije kugenzura imisoro n’ibindi, ubu buryo rero bwombi Imana nayo ijya ibukoresha kuko Imana yacu idahutiraho.

Uburyo bwa mbere (Rendre visiter): Ubu buryo ibukoresha isura inshuti zayo, tubona ingero nyinshi muri bibiliya.

  • Adamu akiri mu murongo wo kumvira, Imana yajyaga imusura bagasabana ( Itangiriro 3:8)
  • Mbere y’uko ijya kurimbura Sodomu, Imana yanyuze kwa Aburahamu bagirana ibihe byiza (Itangiriro 18:20)
  • Hari igihe tuyisenga ikadusura tukagirana ibihe byiza , Nk’uko twabivuze ubu ni uburyo Imana igenderera inshuti zayo bakagirana ikiganiro bagasabana nk’uko umubyeyi asabana n’abana be.

Uburyo bwa kabiri (Visiter): Ubu buryo nabwo Imana ijya ibukoresha ije kugenzura ibitagenda neza. Nibwo yakoresheje ubwo yasuraga Sodomu na Gomora ikaharimbura, yongeye kubukoresha mu gihe yajyaganaga umunzani kwa Berushazari kuko Imana yacu idahutiraho (Daniel 5:27).

Benedata, Imana yacu ntihutiraho kandi ntica urwa kibera kuko kiranuka muri byose, ntikangwa n’amazina twitwa ijya imanuka ikagenzura byose, Niyo mpamvu tugomba kuyishakaho ubucuti kugira ngo kuza kwayo kujye kuduhesha umugisha aho kutuzanira umuvumo cyangwa ibihano.

Muri iyi minsi idusura mu ibanga, n’iyo iduhannye bibiliya ivuga ko iba igira ngo tutazahananwa n’abapagani (1 kor 11:32), ariko mu minsi iri imbere izaza kandi ntizaceceka, ahubwo izashyira byose ku mugaragaro, niyo mpamvu ukwiriye kwihana neza ugafatanya n’Umwuka guhamagara ngo ngwino mwami Yesu (Ibyah22:17), kuruta uko wahora uterwa ubwoba no kuboneka kwe.

Ukwiriye guhora wibaza iki kibazo cyabajijwe inshuti za Yobu ngo: None wowe aho ikugendereye byakubera byiza (Yobu 13:9), Bigatuma witegura kuza kwayo byaba mu buryo bwihariye cyangwa ku munsi w’amateka ubwo izashyira byose ku mugaragaro.

Reka nsoze ngira nti: "Gusurwa n’Imana ubwabyo si ikibazo nk’uko benshi babitinya ahubwo dushatse byahinduka igisubizo nk’uko twitegura isura risanzwe natwe twitegure Uyu mushyitsi kandi ntagorana kuko iyo wemeye intege nke zawe ukamusaba imbabazi n’imbaraga muhita muba inshuti.”

Yesu abahe umugisha. Théophile D.