U Buhinde :Umupasiteri yakubiswe iz’akabwana,agenda ibilometero 5 yambaye ubusa

Mu gihugu cy’u Buhinde Umupasiteri witwa Hari Shankar Ninama yarakubiswe bikomeye, asigwa ku muhanda ari intere ndetse abwirwa ko azicwa naramuka akomeje kubwiriza ubutumwa bwa Kirisitu.

Ninama w’imyaka 65 y’amavuko akaba yarakubiswe mu kwezi gushize ubwo abahenzanguzi bo mu dini ry’Abahindu bakoresheje imbaraga binjiye mu nzu yarimo asengera umwana w’umuhugu w’imyaka 5.Ngo bahise bamushimuta bamukura mu gace ka Ambarunda muri Rajasthan maze bamwambika ubusa baramuhondagura.

Nyuma yo kumukubita bakaba baramusize aho,agenda ibilimetero 5 yamabaye ubusa ajya kuri Sitasiyo ya Polisi kugira ngo atange ikirego.

Nk’uko bitangazwa n’urubuga rwa Nycodem.net ngo Ninama yahise ajyanwa mu bitaro mbere y’uko ajya iwe mu rugo kuko yari yakubiswe cyane.
Ubwo yagarukaga mu rugo iwe ngo yakiriwe n’abakirisitu babarirwa muri 40 ndetse ngo mu bamukubisi akaba yaramenyemo babiri ariko Polisi ntihagire iperereza ikora.

Ninama ufite umugore, abana 8 barimo abakobwa 6 n’abahungu 2 akaba amaze imyaka 12 abaye umukirisitu.

Muri Rajasthan itegeko rihana abahindura amadini rirakomeye riikaba ari nayo nkomoko y’ihohoterwa rikorerwa abakirisitu.

source: bwiza.com