Tumurikire abandi nk’uko twamurikiwe: Indirimbo ya 59 mu zo gushimisha Imana

Benedata ni kenshi dukunda kuririmba indirimbo tukumva turanezerewe, rimwe na rimwe biturutse ku mpamvu zitandukanye, ariko bifite aho bihuriye n’amarangamutima y’umuntu ku giti cye.

Hari unezezwa n’umuziki mwiza indirimbo ifite, hari ukunda injyana runaka indirimbo iririmbitsemo, hari uwikundira umuririmbyi cyangwa abaririmbyi runaka bigatuma yumva indirimbo ye cyangwa yabo, n’izindi mpamvu zitandukanye.

Ibyo byose si bibi, si n’icyaha. Ariko icy’ingenzi dukwiye gukura mu ndirimbo nta kiri muri ibyo byose tuvuze haruguru.

Ubwiza bw’indirimbo bwakagombye kuba bushingiye ku butumwa buri muri iyo ndirimbo ibindi byose bikaza ari ibyiyongera kuri icyo.

Nyamara siko bigenda kuko hari n’ubwo tuziririmba tukanezerwa ariko wafata umwe ukamubwira uti mbwira amagambo agize iyo ndirimbo waririmbaga, kandi uyambwire nk’unganiriza utaririmba bikamunanira, kandi mu gihe cyo kuririmba urebeye inyuma wabonaga ariwe wakozwe ku mutima kurusha abandi. Ndibaza ngo, niba aririmba ibyo atumva, ni iki kiba cyamukozeho kimutera kwizihirwa nk’uko yagaragazaga.

Dukwiye kujya tubanza tukumva neza icyo uwanditse yashakaga kutubwira hanyuma tukabona kumva uwaririmbye.

Umwanditsi wanditse indirimbo ya 59 mu ndirimbo zo gushimisha Imana mu gitabo tuzi ku izina "Kantike" (Cantique), yadukanguriraga cyane kuba umucyo umurikira abari mu mwijima.
Ndakwifuriza cyane gufashwa nayo, kandi wemerere Umwaka w’Imana aganire n’umutima wawe muri iyi ndirimbo.

1. Dore urukundo rw’Imana
rumurika iminsi yose. Icyo ishaka
nuko natwe twaba umucyo muri iyi si.


Inyikirizo: Umucyo wacu umurike
imbere ya bene wacu. Kugira ngo
umuntu umwe umwe abone inzira itunganye



2. Kandi hariho umwijima mu isi,
wazanywe n’ibyaha. Hariho n’abantu benshi bashaka
kubona umucyo

3. Ube maso mwene data,
tunganya itabaza ryawe.
Kiza bamwe bazimiye, bakirishe umucyo wawe.

Mwakire neza ijambo ry’Imana.

Niyondora Vedaste [email protected] agakiza.org