Tekereze kuri aya magambo, urumva icyo Imana ivugana nawe

Yesu ashimwe!

Dusome, Yohana : 15:3-7

[3]None mumaze kwezwa n’ijambo nababwiye.

[4]Mugume muri jye, nanjye ngume muri mwe. Nk’uko ishami ritabasha kwera imbuto ubwaryo ritagumye mu muzabibu, ni ko namwe mutabibasha nimutaguma muri jye.

[5]“Ni jye muzabibu, namwe muri amashami. Uguma muri jye nanjye nkaguma muri we, uwo ni we wera imbuto nyinshi, kuko ari nta cyo mubasha gukora mutamfite.

[6]Umuntu utaguma muri jye ajugunywa hanze nk’ishami ryumye, maze bakayateranya bakayajugunya mu muriro agashya.

[7]Nimuguma muri jye amagambo yanjye akaguma muri mwe, musabe icyo mushaka cyose muzagihabwa.

Nemeranya rwose n’umuntu uvuga ko gusobanura amagambo y’Imana ari impano. Ariko Imana yandikisha ijambo ryayo, yazirikanye ko hariho abantu badafite impano ihambaye yo gusobanukirwa vuba, ariko ibaha amatwi yumva imvugo yayo.

Nta kintu na kimwe ku isi kitagira amatwi yumva Imana. Imana yabwiye ibintu byose ngo « Baho » bibaho, nta muntu n’umwe rero utagira amatwi yumva Imana. Kubakunda gusoma ijambo ry’Imana, uretse ibishyashya Umwuka yahishura hari amagambo usoma ukumva ntukeneye ibindi bisobanuro ahubwo ukwiye gukora icyo usabwa. Urugero ni nk’aya dusomye hejuru.

REKA TUVUGE KU MURONGO UMWE UMWE MURI MAKEYA

[3] None mumaze kwezwa n’ijambo nababwiye! Bisobanuye ko ubu butumwa bugenewe abumvishe ijambo ry’Imana bakezwa kubwo kwizera Yesu. Niba uri gusoma utejejwe emera kwezwa kubw’Ijambo ry’Imana hanyuma ubu butumwa buhite buhinduka ubwawe.

[4] Numara kwezwa rero, ugume kuri Yesu niwe uzagushoboza gukiranuka kose no kwera imbuto, bidakorewe muri Yesu ntabwo bishoboka, hari ibisa nabyo bikorwa n’abantu batabikoze ku bwa Yesu, ariko Yesu azi gutandukanya ibyakozwe kubwe kandi muri we, n’ibyakorewe hirya atari kubwe.

[5] Ishami rivuye ku giti ntiryabaho, Yesu niwe giti abamwizera ni amashami yacyo. N’ubwo amashami ahura n’ingorane nyinshi, zirimo, abanyarugomo bangiza imbuto, (Ibigeragezo bituruka muri Benedata), umuyaga uhungura imbuto (Ibigeragezo bindi bizanwa no gupima kwizera kwawe) n’ibindi byinshi, ariko kuko igiti kikiriho urasabwa kucyikomezaho, nacyo kigerageza gukurura amazi mu butuka yo gutunga amashami, kuko n’ubwo ibyo byose bibaho, ariko iyo igihe kigeze nyirigiti aza kureba imbuto.

[6] Mujya mubona ko hari inkwi zituruka ku mashami manini, bivuga ko yatemwe akuze. Rero kuba ishami riri gukura neza kandi ritoshye ntibirihesha umutekano, igihe cyose ryatemwa kuko ritera imbuto. Kwera imbuto ni cyo kizarirengera igihe nyirigiti azaza. Rero kwezwa no gukiranuka nibitakugaragaraho igihe Yesu azaza uzababazwa cyane ntuzibuka ibyiza byose wabayemo mbere. Hindukira none ubeho kubwa Yesu agushoboze kwera imbuto ashaka.

[7] Nuba ugifashe neza kuri Yesu, wabasha kumusaba amazi, ifumbire, akayaga, akazuba, kugira ngo were imbuto. Ariko numuvaho byose bizaba birangiye. Icyakora mu buryo butandukanye ibyo ushaka ushobora kubibona ariko umunsi uzagera ahamagare amazina y’amashami yabaye kuri we neza akera imbuto. Asigaye yose rero ngo azacanishwa umuriro.

Aha harimo amasomo atatu y’Ingenzi.

1. Kuba ishami, ari ko kwizera amagambo y’Imana ukakira Yesu nk’umwami n’umukiza wawe ukaba uhindutse ishami rya wa muzabibu ariwo Kristo.

2. Kuguma ku giti, ari ko gukomeza inzira y’agakiza ntuyobe, ukabaho ubuzima bushingiye ku Ijambo ry’Imana wamenye

3. Kwera imbuto zikwiriye abihannye, kandi nubwo hariho byinshi bikugora ariko Yesu yemeye inkunga, nk’igiti ufasheho, azagushoboza kubikora neza byose!

Nkwifurije kwezwa kubw’Ijambo ry’Imana, kubana na Yesu ubuzima bwose ntumuveho no kwera imbuto ashaka, kuko azagushoboza kuzera!

Vedaste [email protected]