TWITONDE MU KUVUGA KUKO IJAMBO RIRAREMA.


Usomye Bibiliya mu gitabo cy’Itangiriro igice cya mbere, uhasanga iby’iremwa ry’ibiriho. Mu bintu byose Imana yaremye nta na kimwe yigeze ikozaho intoki zayo, keretse gusa umuntu. Ibindi byose byaremwe n’ijambo. Imana yagiye ivuga ngo bibeho bikabaho.

Impamvu umuntu yaremwe n’ibiganza by’Imana ubwayo, ni uko Imana yari yateganyije kumugira nkayo ubwayo, kugira ngo abe aruta ibindi biremwa byose ndetse abe n’umuyobozi w’ibyaremwe byose. Nk’uko rero ijambo ry’Imana rirema, mu butware umuntu yahawe harimo nuko ijambo rye naryo rirema, bikaba akarusho ku bantu bubaha Imana .

DORE BIMWE MU BINTU ABANTU BAKUNZE KWATURA BIKABAHINDURA IMBATA ZABYO

1. Ubukene

Ni kenshi usanga abantu biyaturaho kuba abakene, yewe wanamubwira ko akize ugasa n’aho ukoze ikosa, mukaba mwabyanganira. Sinzi impamvu umuntu yishimira kwitwa umukene akanaharanira kubona iryo zina mu nzego z’ubyobozi, ndetse igihe batabimwemereye akabiburana nk’uwavukijwe uburenganzira bwe.

Ni ho uzasanga inkunga nyinshi zigenerwa abatishoboye zifatwa n’abishoboye abakene bagakomeza gukena kuko batagira kivurira.

Mwenedata uko ukomeza kwiyaturaho kuba umukene bizarangira ubaye umukene. Jya watura ko ukize kuko ufite Yesu, ndetse ufite n’abandi uruta bifuza kumera nkawe.
Nufata umwanya wo kureba abagusize bari imbere yawe, ujye ufata n’undi mwanya urebe abo wasize bari inyuma yawe, maze bigutere kwiyaturaho ibyiza kandi bizakuzaho, kuko amagambo yawe abasha kubirema.

2. Gutuka abana

Nta mubyeyi utababazwa n’uko umwana we yabaye umuswa mu ishuri, nyamara abenshi mu bitwa abaswa babiterwa n’amagambo y’iwabo cyangwa aho barerewe. Uko umwana akosheje ukamutuka ko ari iki n’iki, bizarangira icyo umutuka abaye cyo, kuko mu kanwa kawe harimo ubushobozi bwo kurema.

Niba kamere yo kuvuga nabi no gutukana yaranze gushira muri wowe jya ugerageza kwirinda kuvuga igihe ufite umujinya mwinshi, ureke ubanze ugabanuke kugira ngo utavuga ibibi? Dukwiye kwatura ibintu byiza ku bana ndetse no kuri bagenzi bacu muri rusange, kuko mu kanwa kacu harimo ububasha bwo kurema.

Ibi ndetse bigendana n’amazina ababyeyi bita abana. Ukwiye kumenya ko umurage wa mbere uha umwana wawe ari izina umwita. Tujye twita abana amazina meza atazabatera ipfunwe kuyavugira mu ruhame. Ntukite umwana izina rihuye n’ibikomere byawe kuko nta ruhare yabigizemo, ahubwo umwite izina ryiza kugira ngo izina niriba ari ryo muntu uzishimire ko umwana wawe adahangayitse nk’uko byakugendekeye.

3. Kwatura umuvumo.

Hari ibintu usanga bimeze nka karande mu bantu runaka, kandi inkomoko yabyo ucunze neza wasanga ari ibyo batura buri munsi.
- N’ubundi ntaw’iwacu wakize.
- N’ubundi nta mukobwa w’aha wigeze akora ubukwe.
- N’ubundi ntaw’aha wize…
Tekereza "za n’ubundi" zikubamo wihane kandi usabe Imana igukize uwo mugozi wa karande kandi wature ko uhiriwe, kwatura kwawe kuzarema ibikomeye.

Ujye uvuga uti: “Niba nta n’uwize hano nzaba uwa mbere; Niba ntawatunze imodoka hano ndaje nyitunge; Niba abahano bose bishyingira ndaje mpindure uwo muvumo;…” kandi kwatura kwawe kuzarema.

4. Kwatura ibidashoboka gusa

Hariho abantu baca abandi intege mu buzima, akenshi bakunda kurebera mu ndorerwamo y’ibidashoboka. Kandi no mu bakirisitu babamo.

Akenshi iyo ukwizera k’umuntu kwabuze, usanga aho guhamya ko ibintu bishoboka ahubwo ari guhamya ko bidashoboka akaba yanabirahirira kandi atari we ubikora.

Niba adashobora kwizera ko umurwayi yakira ugasanga ari gukora ibimeze nko guhamya adashidikanya ko umurwayi atazakira. Nyamara uba wirengagije ubutwari butagereranywa Imana yashyize ku rurimi rwawe, hari igihe uwo muti wimana ari wo wari kumukiza.

Twitoze kuvuga ibintu byiza kuko ururimi rwacu rufite ubwo bushobozi.

Ukore urutonde rw’ibintu byose wagiye uvuga ko bidashoboka, Niba koko wowe utabishobora, urebe niba n’ Imana itiyabishobora! Uraza gusanga hari ibyo wavuze ko bidashoboka kandi byashobotse, hanyuma uhereko wihane.

N’ubwo Aburahamu yari azi neza ko agiye kwica umwana we ngo amutambire Uwiteka kuko yari yabisabwe n’Imana, ariko yabwiye abo bari kumwe ati: “Musigare hano, njye n’uyu muhungu tujye hirya dusenge, tubagarukeho."
Ntabwo yavuze ngo mbagarukeho, n’uwo yari agiye gutamba yamushyizemo avuga ngo "tubagarukeho", kandi uko yabivuze niko byagenze. Itangiriro 22:5

Bantu b’Imana ni byiza kuvuga neza mu buzima bwacu kuko akanwa k’umukiranutsi kararema!

Niyondora Vedaste [email protected]