Sobanukirwa imirimo umukirisitu yakora igasa n’ivuguruza inyigisho ya Yesu

Muri iki gihe abakirisitu benshi bagaragarwaho kunyuranya na Yesu mu bikorwa byabo.Bavuga ko bamukurikiye ariko bagakora ibyo bishakiye, bavuga ko bakunda Imana ariko ntibubahe icyo ivuga ,bavugako ari abakristu ariko imbere ya bagenzi babo bakitwara nk’abatarigeze kuyimenya. Abakirisitu benshi basoma Bibiliya ariko bakananirwa kuyubaha,bajya mu nsengero ariko bakarutwa n’abatagiyeyo, basenga Imana bayisaba ibyo bashaka ariko ntibakore ibyo ishaka.

Nshuti za Yesu, si ugutuka abakirisito cyangwa kubashinja kugirango abadakijijwe bumve ubuhamya bwabo bubi, ahubwo ni ukugirango buri muntu uvuga ko akurikiye Yesu amenye ko akeneye kugaragaza imirimo myiza isa nk’uko yari ari. Buri muntu akeneye kwisuzuma kugirango tugaragare neza imbere y’Imana.

Muri iyi minsi hari ibikorwa byinshi abakirisitu bakora bakibwira ko bari mu nzira nyakuri ariko mu by’ukuri ugasanga banyuranya n’inyigisho za Yesu ndetse n’inzira yaciyemo.
Bimwe muri ibyo bikorwa bigaragaza kunyuranya na Kristo cyangwa inyigisho ye ni ibi bikurikira:

1. Kutereka urukundo n’ impuhwe bagenzi bacu.
Duhakana Yesu mu gihe tuteretse urukundo n’ubugwaneza bagenzi bacu. Bibiliya ivuga ko yaba abakene cyangwa abakire bose baherewe ubuntu binyuze muri Yesu Kristo.
Kubera ko twari abanyabyaha turi kure y’ubwiza bw’Imana ntitwari dukwiye kubaho, twari dukwiye gupfa rwose ,ntitwari dukwiye urukundo ndetse nta n’ikindi kintu cyiza twari dukwiye. Ariko kubera urukundo Imana idukunda yohereze umwana wa yo w’ikinege Yesu kutwereka urwo rukundo.

Iyo rero tutagiriye ubuntu cyangwa ngo dukorere ikintu cyiza bagenzi bacu, tuba tunaniwe kwigana imikorere ya Yesu. Yesu adusaba ko tugomba kugirira ubuntu bagenzi bacu igihe cyose .

Matayo 18:21-22 “Nuko Petero aramwegera aramuzaza ati: “Databuja, mwenedata nangirira nabi nzamubabarira kangahe? Ngeze karindwi?”. Yesu aramusubiza ati: “Sinkubwiye yuko ugeza karindwi, ahubwo yuko ugeza mirongo irindwi karindwi.”

2. Duhakana Imana iyo twigize abakiranutsi.
Kwigira umukiranutsi byerekana neza ko tudasa na Kristu.Yesu mu mibereho ye ntiyigeze yiyerekana nk’aho ariwe muntu wenyine udafite icyaha n’ubwo atigeze icyaha. Imbere y’abantu ntiyigaragazaga nk’umukiranutsi ahubwo yahamagariraga abantu gukiranukira Imana nk’uko biri mu ijambo ryayo.

Iyo dukora nk’aho tutagira icyaha imbere y’abantu cyane cyane abatizera, tuba twishyize hejuru kandi tuvuga ibyo natwe tudashoboye .Yesu yabivuzeho: “Bahambira imitwaro iremereye idaterurwa bakayihekesha abantu ku ntugu,ariko ubwabo ntibemere kuba bayikozaho n’urutoki rwabo”.kwigira utagira icyaha ,uba umeze nk’Abafarisayo ubuza abantu kumenya Imana no kwinjira mu bwami bwayo.” Matayo 23:4

3.Duhakana Imana iyo dusaba gufashwa aho gufasha.
Iyo dusaba gufashwa aho gufasha bagenzi bacu ,tuba tunyuranyije n’uburyo Yesu yabayeho.Yesu aduhamagarira gufasha bagenzi bacu ndetse tukaba abagaragu babagenzi bacu nk’uko na we yabigize.

Matayo 20:25-28: Yesu arabahamagara arababwira ati: “Muzi yuko abami b’abanyamahanga babatwaza igitugu, n’abakomeye babo bahawe kubategeka. Ariko muri mwe siko biri, ahubwo ushaka kuba mukuru muri mwe ajye aba umugaragu wanyu, kandi ushaka kuba uw’imbere muri mwe ,ajye aba imbata yanyu nkuko umwana w’umuntu ataje gukorerwa, ahubwo yaje gukorera abandi no gutangira ubugingo bwe kuba incungu ya benshi.”

Abakirisitu bakwiye rwose kugaragaza ibikorwa byiza bakigana Yesu nk’uko yari ari, bakeneye gusuzuma imirimo yabo bakora kugirango izabaheshe kugaragara neza imbere y’Imana.

[email protected]