Sinezezwa no gupfa k’umunyabyaha. Evangeliste Kiyange Adda-Darlene

Ezekiyeli 33 :11, Ubabwire uti : « Umwami Uwiteka aravuga ati : Ndirahiye, sinezezwa no gupfa k’umunyabyaha, ahubwo nezezwa n’uko umunyabyaha ahindukira akava mu nzira ye maze akabaho. Nimuhindukire, mugaruke muve mu nzira zanyu mbi. Kuki mwarinda gupfa mwa ab’inzu ya Isirayeli mwe ? »

Uwiteka ni umunyembabazi . Yaremye umuntu agira ngo bazabane iteka amuha ubutware bwo gutegeka isi n’ibirimo. Mu gihe cyo kurangara, satani yaraje amwaka ubutware, Imana iramuhana ariko ntiyamureka, ikomeza gutekereza uburyo wa muntu azasubirana ubutware yahoranye.

Kubera ko rero satani yahozaga imbere y’Imana urwandiko rwo kuturega ndetse anasaba ko dupfa kuko Imana yari yauze ko umuntu narya ku giti kibuzanyijwe azapfa, Imana yaduhaye Yesu apfa mu cyimbo cyacu. Urwandiko rwaturegaga arubamba ku musaraba turakira, adusubiza bwa butware satani yari yaratwambuye.

Niyo mpamvu Imana yirahira ikavuga iti nukuri sinezezwa no gupfa k’umunyabyaha. Imana yishimira kubana n’umuntu, niyo mpamvu uwizera amaraso ya Yesu akizwa ibyaha agahanagurwaho gukiranirwa kose.

Uwiteka aragusaba guhindukira. Birashoboka ko hari igihe waba wari warihannye rwose warabiretse, ariko dore ubu byaragarutse, bitewe no kudasenga, kwifatanya n’abatizera, ukwiye guhindukira. Ushobora kuba utarigeze wihana ibyaha byawe, ihane none, Yesu arakubabarira.
Va mu byaha, ihane, va muri izo nzira zibabaza Uwiteka. Nawe urabizi ko ubikora umutima ukubwira ko ari bibi. Kuki warinda gupfa ? Yesu aragukunda kandi agutegeye amaboko. Ngwino umusange arakubabarira.

Nubwo byaba bikabije ntibyaruta ibya Rahabu wababariwe ari maraya (Yosuwa 2 :1-21) ( Yosuwa 6 :20-25), Dawidi yari afite umutima umeze nk’uko Imana ishaka, yubahaga Imana nubwo byahindutse akica Uriya akamutwara umugore yasabye Imana imbabazi Iramubabarira rwose ( 2 Samuel 12 : 1-15), Yesu avuka yitwa mwene Dawidi. Dore imbabazi z’Imana.

Nari nje kukubwira ngo rekera aho, garukira aho, hunga udapfa, nta gihombo kiri mu kureka ibyaha ahubwo ni inyungu gusa. Uwiteka yabirambiwe, nawe bizinukwe urabona umugisha w’Imana. Imana iguhe umugisha.

Senga uti : « Data wera wo mw’ijuru, ndagushima ko wampaye Yesu ngo ankize ibyaha. Nikubise imbere yawe ngusaba imbabazi kuko nacumuye cyane. Mbabarira amazina yanjye yandikwe mu gitabo cy’ubugingo, unkize urupfu rw’iteka, mw’izina rya Yesu, Amen. »

Evangeliste Kiyange Adda-Darlene