Simon Kabera agiye gutaramana n’ab’ i Burengerazuba nyuma y’ibihe byiza yagiriye I Kigali

Ku cyumweru gishize taliki ya 02/07/2017 umuramyi Simon Kabera yagiranye ibihe byiza bidasanzwe n’abakristo b’i Nyarugenge mu mujyi wa Kigali, mu itorero rya ADEPR. Ubu aritegura kwerekeza mu Mugi wa Kamembe mu karere ka Rusizi gutaramana na Korari Bethel taliki ya 16/07/2017.

Hari hashize iminsi itari mike Simon Kabera atari ku butaka bw’u Rwanda, aho yari yarerekeje mu butumwa bw’akazi mu mahanga. Aho agarukiye yazanye ibihe byiza bidasanzwe biri gutuma imitima ya benshi inezezwa no kubana nawe mu bitaramo byo guhimbaza Imana.

Umuramyi Simon Kabera

ku cyumweru gishize ubwo Simon Kabera yari ku ruhimbi i Nyarugenge mu itorero ry’akarere ka Nyarugenge mu mujyi wa Kigali, byari bigoye gusobanura ibiri kubera mu rusengero kubw’amarira menshi y’umunezero y’abari aho, biba agahebuzo ageze ku ndirimbo abenshi batari bazi nk’uko izindi ze nyinshi zizwi, aho yagiraga ati : « Umwenda ukingiriza ahera watabutsemo kabiri abatindi duhabwa imbabazi… »

Amakuru aturuka i Rusizi muri ADEPR Kamembe, aravuga ko uyu muririmbyi Simon Kabera ategerezanyijwe ubwuzu bwinshi mu mujyi wa Kamembe mu karere ka Rusizi, mu gitaramo kigari kiri gutegurwa na korari Bethel giteganyijwe kuzabera muri gare nshya y’akarere ka Rusizi, ku italiki ya 16 Nyakanga 2017, guhera I saa saba z’amanywa zuzuye.

Aka gace kahoze ari perefegitura ya Cyangugu gapfumbatiye amateka akomeye y’itorero rya ADEPR m u Rwanda kuko ari ho ryatangiriye ndetse akaba ari na ho habonetse umuyoboke wa mbere Nyakwigendera Past Sagatwa Rudoviko, by’umwihariko akaba yaratuye muri uyu mujyi wa Kamembe iki gitaramo kizaberamo, ahitwa i Gihundwe. Simon Kabera rero akaba agiye gutaramira ku isoko kuko nawe abarizwa mu itorero rya ADEPR.

Nyakwigendera Past Sagatwa Rudoviko wabatijwe bwa mbere mu Itorero ADEPR

Niyondora Vedaste [email protected]