Rusizi: korari Bethel A irashimira Imana ko yabigaragarije bikomeye mu giterane bakoreye muri gare

Kuri iki cyumweru gishize taliki ya 16/07/2017, mu mujyi wa Kamembe muri gare nshya y’akarere ka Rusizi habereye igiterane kidasanzwe cyasigiye ab’i Rusizi impamba ifatika mu buryo bw’umwuka iri bubasindagize mu mezi asigaye y’uyu mwaka.

Mu minsi mike ishize ni bwo twabagejejeho inkuru y’igiterane cyagutse cyari giteganijwe kubera muri gare y’akarere ka Rusizi cyategurwaga na korari Bethel A yo mri ADEPR paruwasi ya Kamembe, mu mujyi wa Kamembe. Kuri ubu rero amashimwe ni menshi ku bateguye iki giterane ndetse no ku bakitabiriye.

Korari Bethel A iririmba

Ahashyira saa saba n’igice iyi gare yari yuzuye abantu ku buryo butangaje. Ku isaaha ya saa munani ubwo Pastor Canisius Nzabonimpa yaramaze kwegera uruhimbi nk’umuyobozi w’iki giterane, byari bigoye kubona aho wakwikinga akazuba kuko ahari hateganijwe hari hamaze kuzura abantu bahagaze abandi biyicariye hasi ku butaka, bameze nk’abatumva izuba kandi ryari ryinshi cyane.

Abatumirwa muri iki giterane bose barabonetse, by’umwihariko umuramyi Simon Kabera n’itsinda ry’abanyamuziki bakorana, bararirimbye abakabakaba ibihumbi bine bari bateraniye muri gare amarangamutima ababana menshi ndetse na Simon ubwe biramurenga, kugeza ubwo ivi rigera ku butaka kubw’icyubahiro cy’Imana.

Umuramyi Simon Kabera

Agakiza.org tuvugana n’umwe mu bateguye bakanakurikiranira hafi imirimo yose y’iki giterane Bwana Emmanuel Kwizera, yadutangarije ko imitima y’abagize korari Bethel ndetse n’abayobozi b’itorero n’abakristo muri rusange yuzuye amashimwe kubw’imirimo ikomeye kandi itangaje Imana yakoranye nabo kuri icyi cyumweru.

Umushumba w’itorero ry’akarere ka Rusizi i buryo,Umushumba wa paruwasi ya Kamembe hagati, na Past. Canisius Nzabonimpa

Tumubajije umusaruro mu buryo bufatika babonye muri iki giterane, byamugoye kubisobanura, aho yifashishije aka videwo kafashwe ubwo abantu birukaga bajya kwihana mu gihe Ev. Binguyeneza Daniel yari amaze kubwiriza, atubwira ko naho tutakwita ku bindi tukareba abantu bakiriye Yesu nk’umwami n’umukiza byonyine bihagije ndetse birenze uko umuntu yabivuga. Abantu barenga ku 150 nibo babashije kubarurwa mu bakijijwe muri iki giterane.

Ijambo ry’Imana rikora umurimo ukomeye mu mitima y’abantu ako kanya ndetse na nyuma y’igihe runaka umwuka wera akomeza kwemeza imutima, ku buryo utavuga ko nyuma yo kuryumva biba birangiriye aho, ryo rikomeza akazi karyo.

Nta gushidikanya ko iki giterane cyagize umumaro, aha umuntu yakangurira n’abandi bategura ibiterane rimwe na rimwe kujya banyuzamo bakava mu nsengero bakajya gushaka abakeneye ijambo ry’Imana hanze y’urusengero nk’uko Yesu yabikoraga.


Pianiste Bruce acuranga anaririmbana na Simon

Soliste Claude nawe yafatanije na Simon Kabera

Niyondora Vedaste [email protected]