Rusizi: Korari Abanyamugisha igiye kumurika Album nshya (DVD) mu gitaramo "GARUKA USHIME"

Korari Abanyamugisha ibarizwa mu ihuriro ry’abanyeshuri b’Abaporotesitanti mu Ishuri Ryisumbuye rya Gishoma (Groupe Protestant E.S Gishoma) mu Karere ka Rusizi iritegura igitaramo cyagutse kizwi ku izina rya “GARUKA USHIME”. Muri iki gitaramo kandi hazabera mo umuhango wo kumurika umuzingo w’indirimbo zihimbaza Imana z’amajwi n’amashusho (DVD) tariki 17 Nzeli 2017 ku kibuga cy’umupira cya E.S.Gishoma.

Iki giterane cyateguwe n’itorero rya ADEPR Gashonga ku bufatanye n’ubuyobozi bw’ishuri E.S.Gishoma by’umwihariko itsinda ry’abanyeshuri b’abaporotesitanti babarizwa muri iki kigo.

Abanyeshuri ba ES Gishoma na bamwe mu bayobozi

Nk’uko bigaragara mu itangazo ryagenewe abatumirwa, iki giterane ngarukamwaka cyiswe GARUKA USHIME, kigiye kuba kunshuro ya kane, aho kuri iyi nshuro hateganyijwe mo umubatizo w’abagaragara nk’umusaruro w’ivugabutumwa rirerwa muri iri shuri.

Nk’uko byatangajwe n’umuyobozi wa Group Protestant muri iki kigo Nzeyimana Bahati Shaban, iki gitaramo kizatangira mu masaha ya saa tatu z’igitondo kugeza saa kumi n’ebyiri.


Nzeyimana Bahati Shaban, umuyobozi wa Group Protestant muri iki kigo

Aganira na Agakiza.org Yagize ati: “Iki gitaramo giteganijwemo imirimo myinshi kandi yose myiza, harimo amashimwe, umubatizo, ivugabutumwa, abaririmbyi batandukanye, by’umwihariko nyuma ya saa sita hazabaho kumurika Album y’amashusho y’indirimbo zihimbaza Imana za korari Abanyamugisha ibarizwa muri Group Protestant yo mu kigo cyacu. Iyi album ikaba yitwa UKUBOKO K’UWITEKA. Tuzaba turi kumwe n’ubuyobozi bw’itorero birumvikana kuko twafatanyije gutegura iki gitaramo, hazaba hari amakorari yo muri ADEPR nka korari Alpha na korari El Bethel, tuzaba turi kumwe kandi na korari y’abashyitsi izaturuka mu mujyi wa Kamembe yitwa Yerusalemu, tuzaba turi kumwe n’abavugabutumwa batandukanye”


Korari ABANYAMUGISHA ubwo bari mu gikorwa cyo gufata amashusho.


Korari YERUSALEMU guturuka mu mujyi wa Kamembe

Insanganyamatsiko ya "GARUKA USHIME" kuri iyi nshuro iboneka muri Bibiliya mu gitabo cy’umuhanuzi Yesaya 41:10 : "Ntutinye kuko ndi kumwe nawe, ntukihebe kuko ndi Imana yawe. Nzajya ngukomeza, ni koko nzajya ngutabara kandi nzajya nkuramiza ukuboko kw’iburyo, ari ko gukiranuka kwanjye."