Rubyiruko mumenye ibi bizabarinda

 Hari ubwo umukobwa cyangwa umuhungu b’abakrisito bakiri urubyiruko, bagwa mu byaha by’uburyo butari bumwe kandi bikomeye bajyaga bibwira ko bitababaho, maze buri wese mu mutima we akibaza ati” ibi byambayeho gute?” amarira akaba menshi, agahinda kakaba kenshi, inshuro nyinshi hakaba ubwo biterwa n’ubutamenya.

Umuntu ukiri muto yibereye mu rusengero hari ubwo areba abakuze bakora ibintu bigayitse, maze akavuga ati “ariko se buriya bagira ubwenge njye biriya ntibizambaho”, imyaka igashira indi ikaza yajya kubona akisanga mu bisa nibyo yagayaga kera, akenshi bigaterwa no kuba atarigishijwe neza ngo amenya uko agomba kwitwara akiri muto, bikazamushoboza no kuba umuntu muzima no mu gihe azaba yakuze.

TUREBE IBYA TELEVIZIYO, INTERINETI NA FILIMI

Hari abasore birarira bavuga ngo ntacyo bintwara njyewe sha, akavuga ngo iyo mvuye kureba za filimi mbi cyangwa amashusho mabi muri internet (aha ndashaka kuvuga ibintu byuzuyemo amashusho y’ubusambanyi n’ubwicanyi dore ko iyo filimi itabonetsemo ibyo yitwa ko ntakigenda) maze akavuga ngo njye bihita binshiramo ako kanya, mpita mbyibagirwa, uwo ushaka kubeshya se ni nde? Iyo urangije kubireba ibyo warebye byose biguma muri wowe ntaho bijya nta nuko wabyirukana gushoboka.

Bimeze nk’igihe umuntu amaze kurya ibyo yariye bijya munda imbere mur iwe, ariko ibiryo byo hari igihe ibyangiritse bitera umuntu iseseme nuko akabiruka, ariko niba harimo microbe cyangwa se intungamubiri ibyo byo biba byarangije kwinjira mu maraso., ku bibi umuntu areba byo nta kubiruka kubaho, bijya mu bitekerezo byawe, bigasa nibyinjira mu maraso bikagira ingaruka mu mubiri, no mu mikorere yawe.

Hari ubwo umuntu yagerageza kwibaza ngo, kuki ibinyamakuru byinshi, amafilimi menshi, za publisite izarizo zose , ziba zuzuyemo ibintu bitari byiza kandi bishaka gukurura abasore, kandi ku bintu byose byamamazwa hagomba kugaragaraho umusore cyangwa umukobwa ukiri muto, ryaba itabi zaba inzoga, n’ibindi, kugeza nubwo ushaka kwamamaza n’ipikipiki akora uburyo bwose ashyiraho, umukobwa wambaye ubusa, yewe nuwamamaza intebe zo kwicaraho kandi ubundi urumva ko ntaho byari bihuriye n’abakobwa ariko ibyo byose bifite intego. Abakora mwene ibyo bose bo baba bazi icyo bashaka kugeraho ni ugukurura amaso yawe, bamaze gukurura amaso yawe baba batwaye n’ubwonko bwawe, hagakurikiraho imikorere n’amahitamo yawe yose. Ibyamaze kugera mu mutima wawe rero biratangira bikajya mu bikorwa, noneho kuko mu muntu imbere ariho haturuka ibibi byose ibitekerezo bibi, ubwicanyi, ubujura, ubusambanyi, kugambana …… ibi hashize imyaka 2000 Yesu abivuze. Uku niko benshi bagenda bandura bandujwe n’abafite imitima yanduye bakoresheje ubwenge bubi bwo gushyira byose mu mashusho.

INGARANI

Ubundi hari ibiba ku muntu akabura icyo abikoraho, ariko ibyo ureba byo ushobora kubitegeka. ukwiye kwirinda ibyakwanduriza ubwonko kuko ibikorwa byose by’umuntu bituruka ku byo atekereza. Iyo nk’umwana w’umusore uhora ureba ibyo bibi by’ubusambanyi, biragenda bigategeka imitekerereze yawe, kugeza ubwo bikurusha imbaraga bikajya byizana mu bitekerezo uko bishatse. Yesu yaravuze ngo aho intumbi ziri niho inkongoro ziboneka, cyangwa se tuvuge ngo, ahari ingarani iteka uhasanga imbeba; ibikona n’izindi nyamaswa zitungwa n’imyanda. Twabivuga mu yandi magambo ngo umutima wanduye, niho hateranira abadayimoni, n’imyuka mibi yose. Umutima wabaye ingarani y’ibibi byose rero urashyuha, umwana w’umusore cyangwa umukobwa akaba atagishoboye kwitegeka na gato, niho uzumva ishyano rikomeye ngo umwana w’umuhungu yasambanye na mushiki we, aho abagabo basambana n’abakobwa bibyariye, ba se wabo bagakora ibibi n’abana babo. abantu baba barangije kuba imbohe z’ikibi ,batwarwa ku buryo nta rutangira.Abantu bose baba barahindutse nk’ibikinisho byo guhaza amarari yabo gusa. N’abana bangahe b’abasore kubera ibyo bareba byuzuye ubusambanyi,byabatwaye umutima kuburyo ubu bisigaye binuzuye mu materefoni yabo. Ahajya amashusho mu materefoni urwo rukozasoni nirwo rwuzuyemo, babireba bihishe, ikivamo ni uko babona abakobwa nk’ibiremwa byo gukinisha hanyuma bikajugunywa, ubwo se abo dutegereze ngo bazubaka ingo zikabaho, kandi bamaze kumenyera guhinduranya abakobwa nk’abahinduranya amasogisi, bene uwo ntabwo yazihanganira kubana n’umuntu umwe. Bitangira ukiri muto irinde.

INGARUKA Z’AMASHUSHO Y’UBUSAMBANYI (PORNOGRAPHY)

Hari ahantu bigeze gushyiraho ikiganiro cy’umuntu wo muri amerika wafataga abakobwa akabasambanya, yarangiza akabica,nuko aza gucirwa urubanza rwo gupfa, yitwaga Ted bundy, yavuze rero uko byamugendekeye, ngo agere kuri urwo rwego, abivuga hasigaye umunsi umwe ngo yicwe. Yavuze ko yavukiye mu muryango mwiza, yari umunyeshuri afite incuti kandi mu ishuri yaratsindaga. Ariko akaga katangiye ubwo abandi bana bamuzaniraga igitabo cyuzuyemo amashusho y’ubusambanyi, yari afite imyaka cumi n’ibiri, atangira kwifuza kubireba mu mafilimi, kugeza ubwo bimubase, bimuhindura imbohe, noneho ananirwa kwitegeka agahora ashaka aho byaba biri, bigera ubwo kubireba gusa bitagihagije, ahubwo yifuza no kubikora ngo arebe niba koko ibyo ahora abona bibaho, nkuko muzi uburyo abakiri bato bagira ishyushyu ryo kugerageza ibyari byo byose.

IBYO UKORA NI INGARUKA Y’IBYUZUYE MU MUTWE WAWE.

Uwo musore turi kuvuga kandi ntugire ngo atandukanye nawe, agifite bya bishusho bibi mu mutwe byasaga nkaho nta kibazo cyari gihari, nta nicyabonekaga inyuma, byose byakorerwaga ahantu mu ibanga mu bitekerezo. Uko akomeza kureba ibibi akumva arashaka kureba ibirushijeho kuba bibi, kugeza ubwo ateya intambwe yo kubikora n’umubiri we, noneho kugirango n’umutima nama utamubuza atangira kunywa inzoga ngo abone uko akora ibyo ashaka nta bwoba, nibwo yishe umukobwa wa mbere biba birararangiye.

KUGARURA UBWENGE UTAGISHOBOYE KWIGARURA

Bukeye uwo ni wa musore tukivuga, abona neza ko yakoze ishyano, ntawari yamubonye, ariko kwifata biramunanira kuko byasaga n’imodoka yacitse amaferi. Arakomeza agafata abakobwa ku ngufu yarangiza akabica, kuko ya mashusho mabi yatumye atongera kureba abakobwa nk’abantu bafite agaciro, ahubwo yababonagamo ibikinisho by’ubusambanyyi, kugeza ubwo yishe abandi bakobwa makumyabiri n’umunani.

Ubwa mbere bamukeka ko ariwe wicaga abo bakobwa, ntawabyemeye ko yakora ibisa bityo, ukurikije uko bamubonaga inyuma ku mubiri, bituma abapolisi bamurekura. Igihe cyarageze, ibimenyetso biragaragara arafatwa acirwa urubanza. Agiye gupfa nibwo yabaye nkugaruye ubwenge neza aburira abandi bose ku bibi by’amashusho y’ubusambanyi. Ntabwo yavutse ari igikoko nubwo Atari na mwiza kuko twese tuvukana intege nke ahubwo yongeyeho no kudategeka ngo anagenzure ibyo areba.

Dore amagambo yabwiye umwe mu bamuganije ari muri gereza:

Yavuze ko yakundaga kureba amashusho y’ubusambanyi akaba ariwo muzi w’ubwicanyi bwe. Yavuze ko ibigaragara mu mafilimi y’ubusambanyi nandi mafilimi arimo ubwicanyi, bituma abana benshi babahungu bajya mu mihanda kugerageza ibyo babona mu mafilimi. Muri icyo kiganiro yarongeye agira ati” mugiye kunyica, kandi koko ibyo bizatuma ntawe nongera kugirira nabi. Ariko hanze hasigaye abandi bameze nkanjye batwawe umutima n’amashusho y’ubusambanyi (pornography) kandi ibyo byo ntacyo mubikoraho.”

Uku ninako bigendekera abantu bose ubona bameze nabi utakwifuza kumera nkabo. Burya bariya bose ubona bakoronijwe n’inzoga ntugire ngo niko bavutse, babanje kubikinisha banywaho gake, bumva ntigahagije bongeraho ikindi kirahure k’inzoga bavangamo kanyanga, kugeza igihe umuntu atagishoboye kwitegeka. Burya abatumura amatabi bamaze gufatwa n’igituntu cyangwa izindi ndwara z’ibihaha, ntabwo bavutse banywa itabi cyangwa urumogi, batangiye babyitiranya no kwinezeza cyangwa kuba abagabo, buhoro buhoro bananirwa kwitegeka, Bizana ingaruka nyinshi.

Pastor Kazura Jules