Rinda umutima wawe kuruta ibindi byose birindwa .

Amahoro y’Imana abane namwe benedata, Inyigisho y’uyu munsi ifite Intego ivuga ngo "Rinda umutima wawe kuruta ibindi byose birindwa", turifashisha ijambo ry’Imana dusanga mu Imigani 4:23 "Rinda umutima wawe kuruta ibindi byose birindwa, Kuko ari ho iby’ubugingo bikomokaho."

Uko ubushobozi bwacu bugenda burutanwa, ni nako tugenda turushanwa mu kubaka ubwirinzi, ushobora kwirinda Ubwawe ariko iyo ugeze Ku rwego ubona ko ucyeneye Umutekano Wisumbuye Wifashisha ababigize umwuga mu kurinda umutekano bafite n’ibikoresho bihagije, gusa Byose iyo birangiye Hasigara akazi Kareba wowe Ubwawe ko kurinda Umutima wawe, Aha nta wundi wagufasha Wirwana ho.

Kurinda umutima bireba umucyene, umukire, Uwaminuje n’utarize, ufite ingingo zuzuye n’ubana n’ubumuga, umuyobozi cyangwa umuyoborwa, twese Uyu mukoro uratureba. Kuki bitureba ? Mu mutima niho inama n’imigambi yacu yose icurirwa, yaba ibitwica n’ibidukiza, ni yo mpamvu Bibiliya itwibutsa ngo Turinde imitima yacu.

Kuki turinda Imitima ? Twasomye haruguru ngo niho iby’ubugingo bituruka. Bivuze ngo Kurimbuka no Gukizwa byose biva mu mutima, Iyo dusomye ijambo ry’Imana mu urwa Yeremiya 17:9 tuhasanga amagambo agira ati Umutima w’umuntu urusha ibintu byose gushukana, kandi ufite indwara ntiwizere gukira. Ni nde ushobora kuwumenya uko uri?
Umutima uhorana inama ebyiri ( Gukora icyiza n’ikibi) Dusabwa iki ? Twahawe Ubushobozi bwo kwihitiramo gukora icyo dushaka, Niko Kayini yabwiwe ubwo yicaga umuvandimwe we Abeli (Itang 4:7), Uku guhitamo neza ni nako kutwemeza ko dukeneye kurokora ubugingo Kukatwinjiza mu kwizera Yesu( We udushoboza kuko aturusha ubushobozi), agafata wa mutima bityo ntiwongere kurehareha ujya mu bibi.

Ni inde warondora ibiri mu mutima ? Uretse Uwiteka Imana, Niyo imenya imigambi yacu, niyo mpamvu ari nayo idukiza, Umuririmbyi wa 359 mu zo Guhimbaza yararirimbye ngo Iyo ntinye ko kwizera kwanjye ari gucye,.. Yesu aramfata akankomeza kuko ankunda bihebuje arankomeza, Uku ni ukuri, Yesu yaje mu isi gushaka no gukiza imitima yacu yari izimiriye mu buriganya bwa Satani, Uwo uriwe wese Satani Yakuriganya ukagwa mu cyaha, niyo mpamvu nkwibutsa nti nk’uko urinda umutungo wawe n’umubiri, Niko ukwiye kurushaho Kurinda imitima wawe, kuko ibyo dukora Byose bizatuma Imana idushyira mu rubanza, Emerera Yesu akubere umwami n’umukiza wawe niwe Udutsindishiriza.

Yesu abahe umugisha.
Ernest RUTAGUNGIRA