Pawulo na Filemoni, ikitegererezo cy’abakristo bafite umumaro muri Kristo

“Bibe bityo mwene data, nkubonemo umumaro mu Mwami wacu, unduhure umutima muri Kristo” Fil:20

Uru rwandiko Pawulo yarwandikiye Filemoni igihe yari ari muri Gereza i Roma, Filemoni na we yari uwo i Kolosayi aho itorero ry’abakolosayi ryateraniraga iwe, bishoboka ko yari we muyobozi waryo, aho yari kumwe n’abakekwa kuba umugore we Afiya n’umuhungu we Arukipo, Filemoni yari afite umugaragu cyangwa imbata wamukoreraga witwa Onesimu hanyuma aza kumutoroka ku mpamvu Bibiliya itagaragaje ajya i Roma aho yahuriye na Pawulo akamubwiriza ubutumwa agahinduka ndetse babana amufata nk’umuhungu we, Pawulo rero muri uru rwandiko yashatse kumenyesha Filemoni ko Onesimu babonanye kandi ko yahindutse uw’umumaro ikindi yari agiye kumumwoherereza ngo amuhe imbabazi ku byo yamuhemukiye kandi ngo biyunge basubire ku bana.

Muri uru rwandiko Pawulo ntiyatekereje kugumana Onesimu i Roma dore ko yanamukoreraga, ahubwo yabonye ko igifite umumaro kuruta ikindi ari ukumwoherereza Filemoni, ikindi kandi yashakaga ko atamwakira nk’imbata ahubwo amwakire nka mwene se muri Kristo, ndetse akanamubabarira ibyo yamuhemukiye byose habe n’umwenda akawumuharira.

Iby’ingenzi twakuraho ikitegererezo

A. Kugirira bene data urukundo n’ubuntu nkuko byaranganga itorero rya mbere

- File 1-2: Filemoni yatanze inzu ye ngo itorero risengeremo
- File 5: yagiriraga urukundo abera bose
- File 7: Yaruhuraga imitima y’abera
- File 22: Yagombaga gutegurira icumbi Paul ubwo yari kuva i Roma

B. Kugira ubwenge bwo kubana n’abandi no gukemura ibibazo

1. Pawulo yashoboraga gutegeka Filemoni kwakira Onesimu ariko yahisemo kumusaba (File 8-9)

2. Uburyo kandi yamusabyemo kwakira Onesimu ntiyigeze abihubukira ahubwo yabizanye nyuma abanje kumushimira kwizera, urukundu no kuruhura abera (File 10). Yashatse uburyo Filemoni abyakira neza kandi bitamukomerekeje cyane ko uwo mugaragu bari baratandukanye nabi.

3. Yanze guhatira Filemoni ko yagumana na Onesimu nk’umufitiye umumaro ahubwo ahitamo kumwohereza kuko akiri umukozi we (File 12-14)

4. Paul, kugira ngo uyu mukristo yakirwe neza nka mwene data, yemeye kwishyura amadeni yose yaba arimo shebuja (Phile 18-19).

5. Ntiyigeze ashidikanya ko Filemoni yabyakira nabi ahubwo yiringiye ko azakora ibirenze ibyo yamusabye, Pawulo yizeraga bene se muri Kristo kandi natwe dukwiye kuba twizerana niba turi abakristo nyakuri. (File 21)

Mu gusoza, hari byinshi tugomba kwiga dufatiye ku kitegererezo cya Pawulo na Filemoni. Filemoni ni urugero rwiza rw’umukristo ugirira ubuntu bene se kandi na Pawulo ni urugero rwiza rw’umukristo ndetse n’umuyobozi wubaha bene se b’abayobozi ndetse n’abaciye bugufi. Bityo rero,

Umuntu wese muri twe anezeze mugenzi we kugirango amubere inyunganizi amukomeze, kuko Kristo nawe atinejeje nk’uko byanditswe “ibitutsi bagututse byangezeho” (Abaroma15:2-3)

Src: BYIRINGIRO Jean Dominique

[email protected]