Pakisitani: Umukirisitu yatwitswe azira kubura ubwishyu bw’umwenda

Ikigo gitanga ubufasha mu mategeko cyashyize ahagaragara inyandiko yamagana igikorwa cy’ubugizi bwa nabi cyakorewe umugabo w’imyaka 45 Ameen Masih watwikiwe iwe mu nzu kuwa kabiri w’icyumweru gishize azira kubura ubwishyu bw’ibicuruzwa yafashe.

Imiryango itanga ubufasha ku bababaye ivuga ko Masih yazize kubura ubwishyu bwo kwishyura ibicuruzwa yari yafashe mu iduka rya Afzal Electronics n’iduka rya Shehran Electronics.

Masih yari yafashe ibicuruzwa bifite agaciro k’amarupe(amafaranga akoreshwa muri Pakisitani) 350.000 angana 5.400 y’amadorali y’Amerika mu kugura ibi bikoresho by’ikoranabuhanga.

Mu ibaruwa iyi miryango yahaye itangazamakuru igaragaza ko Masih yari asanzwe akora akazi kamuhemba amafaranga macye k’uburyo atari bujye abasha kwishyura amarupe 18.000 angana na 278 y’amadorali y’Amerika buri kwezi.

Uwabonye ubu bugizi bwa nabi Khalid Yousaf yabonye abagabo benshi barimo Muhammad Usman, Asim Ali, Yasir Bajwa na Shehran binjira mu nzu ya Masih kuwa mbere baramukubita, barangije bamubwira ko bazamwica natishyura umwenda arimo.

Umunsi wose yiriwe afungianye ntiyabona uburyo abonana n’umuryango we, bigeze nimugoroba ba bacuruzi baragarutse baramuzirika bamufungirana mu cyumba cye, baragitwika. Umuryango utanga ubufasha mu by’amategeko uvuga ko babujije abagize umuryango we n’abaturanyi gukingura icyumba kugirango bakize Masih.

Umuryango we wahamagaye polisi usaba ubufasha mu gihe aba bagizi ba nabi bari bajyanye n’imfunguzo z’icyumbwa nyuma yo kugitwika. Abaturanyi bakoze uko bashoboye basenya urukuta kugirango barebe ko baramira ubuzima bwe ariko bamugeraho imyotsi imaze kuba myinshi basanga yamaze gushiramo umwuka.
Umurambo wahise ujyanwa gukorerwa isuzuma ry’icyamwisha na polisi nyuma y’ikiriyo umurambo we urashyingurwa.

Polisi yataye muri yombi Ali na Bajwa, ariko Shehran na Usman bo ntabwo batawe muri yombi kandi bari barikumwe bose muri iki gikorwa cy’ubugizi bwa nabi.

Umuryango utanga ubufasha mu by’amategeko uvuga ko uzakora ibishoboka umuryango Masih yasize, umugore we Rakhil Bibi n’abana 3 bakabona ubutabera.

Umuryango w’abanyamerika ukurikirana uko akarengane gakorerwa abakirisitu gahagaze ku isi ushira Pakisitani ku mwanya wa kane muri uyu mwaka wa 2017 mu bihugu bigaragaramo akarengane gakorerwa abakirisitu cyane.

Christian post.com
Tuyishime [email protected]