"Nzatanga nte?" Igice cya mbere

Ubuntu bube muri mwe n’amahoro biva ku Mana iriho kandi yahozeho kandi izahoraho, biva no ku myuka irindwi iri imbere y’intebe yayo, no kuri Yesu Kristo, ari we mugabo wo guhamya ukiranuka n’imfura yo kuzuka, utwara Abami bo mu isi, udukunda kandi watwejeshejeho ibyaha byacu amaraso ye, akaduhindura Abami n’abatambyi b’Imana ye ari yo na Se, icyubahiro n’ubutware bibe ibye iteka ryose, Amen "⁠⁠⁠⁠Ibyahishuwe 1:4-6"

Icyatangiye cyose kizarangira,
uwabayeho wese nawe azagira iherezo
n’ubwo abantu badakunda kumva ibi,
ariko ni ko kuri. Kereka Imana kuko ntawe uzi itangiriro ryayo
ntan’uwamenya iherezo ryayo. Iyo wemeye ko itagira aho ihera
uba wemeye ko itagira n’aho irangirira. Ahubwo yo ubwayo,
ni yo tangiriro ikaba n’iherezo.

Uwamaze kwimenya wese azi ko azatanga,
kuko uwiyizi neza wese, azi ko ari umwami.
Nta mwami upfa rero aratanga, bityo rero sinzapfa ahubwo nzatanga
icyakora nyuma yo gutanga nzongera mbeho.
Nta kibisimbura mbona hafi, ubwo nagize igihe cyo kwima
nzagira n’igihe cyo gutanga. Ikibazo si uko nzatanga
kuko ntan’icyo nabihinduraho, ahubwo ndibaza ngo: “Nzatanga nte?

Si njye wiyimitse narimitswe
uwamwami w’abami ni we wanyimitse
ndi umwami w’ubwami bwanjye. Bwitwa ubwanjye
kuko ari njye ubutwaye, nyamara bufite nyirabwo unduta.
Niyo mpamvu uwanyimitse yitwa "Umwami w’abami"
ntabwo ari ba bami b’ibihugu byo ku isi tumenyereye gusa
kuko babaye ari abo, twaba twirengagije aho batagira abami.
Kuko ahataba abami haba abaperezida, ubwo twajya tuvuga ngo
"Umwami w’abami" tukongeraho ko ari n’umuperezida w’abaperezida.
Nuko rero wowe nanjye turi abami, uwo tuvuga akaba umwami wacu twese.

Kuki se ntari perezida, kandi kuki we tutamwita perezida?
Perezida ashobora gusimburwa kandi akiriho
ariko nta mwami usimburwa akiriho,
ntawe uzigera amukura ku ntebe ye y’ubwami
kandi nanjye ntawe uzigera ankura ku ntebe y’ubwami bwanjye.

Ni yo mpamvu umwami adapfa aratanga
atanga iki se ? Atanga ingoma. Nuko rero nanjye iyi ngoma
sinzayihorana igihe kizagera ntange nyisubize uwanyimitse
kandi si njyewe njyenyine uwimye wese azatanga,
nawe ubwawe uzatanga. Ikibazo si uko uzatanga,
kandi ikibazo si uko nzatanga, ikibazo «uzatanga ute?»,
nzatanga nte?

Bisa n’ibitumvikana kuvuga ko ndi umwami,
sinzi nawe uko ubyumva kuba nkwita umwami
ariko rero uri umwami nk’uko nanjye ndi umwami.
Ubwami bwawe buri muri wowe
nk’uko ubwanjye buri muri njyewe.
Nyoboye abanyacyubahiro bakomeye
kandi nabo bafite inshingano mu bwami bwanjye
ku buryo ntabafite byambera ikibazo gutwara.
Kuko ubwami bwose bugira abaturage.
uhereye ku baturage banjye wakwibuka abawe nawe

Ndavuga bake bandi hafi kuruta abandi.

1. Umunyamabanga

Mfite umunyamabanga ushoboye akazi
mutuma kundebera aho nkandagira niba
nta kibazo gihari, aho nicara, aho ndyama, icyo ndya…
Ubusanzwe njyewe nsa n’utabona
kuko iyo uyu mukozi wanjye aruhutse
sinongera kubona ikintu na kimwe uretse umwijima gusa.

Andebera ibyo nkeneye byose
gusa hari n’ubwo andebera ibitari ngombwa
njyewe nkivangurira ibingirira umumaro.
Iyo mbuze ubwenge bwo kuyobora uyu munyamabanga wanjye
no kumenya uburyo nkoresha makuru mpabwa nawe
igihugu cyose ngishyira mu kaga nk’ibyaye kuri Dawidi
igihe yabonaga umugore wa Uri yiyuhagira
akamurarikira kugeza igihe amusambanyije.

Rwose uyu mukozi anteza ibibazo bitari bikeya
kuko umumaro we ari ukureba usanga igihe cyose yifuza kureba
kandi nyine iyo arebye arabona. Ariko kandi
ndamushima cyane kuko aranyubaha bihagije
icyo mubujije ntagikora, ni gacyeya cyane areba
ibyo ntamuhereye uruhusa.

Ndetse mbona koko nari mukeneye kuko amfatiye runini.
Ibyiza byose nkora kubw’uyu mukozi wanjye,
ndetse n’ibibi nkora kubwe, byose byandikwa
mu gitabo cyanjye cy’ubucurabwenge,
kimwe kizabumburwa nyuma yo gutanga kwanjye.

Ntuzacikwe n’igice gikurikira.

Niyondora Vedaste [email protected]