“Nzatanga nte?” Igice cya kabiri


Ubuntu bube muri mwe n’amahoro biva ku Mana iriho kandi yahozeho kandi izahoraho, biva no ku myuka irindwi iri imbere y’intebe yayo, no kuri Yesu Kristo, ari we mugabo wo guhamya ukiranuka n’imfura yo kuzuka, utwara Abami bo mu isi, udukunda kandi watwejeshejeho ibyaha byacu amaraso ye, akaduhindura Abami n’abatambyi b’Imana ye ari yo na Se, icyubahiro n’ubutware bibe ibye iteka ryose, Amen
"Ibyahishuwe 1:4-6"

2. Umuvugizi

Ngira uburyo bwinshi nkoresha
Iyo nshaka kumenyekanisha ibyo ntekereza
Cyangwa ibindimo byose, kuko hari n’ibyo menyekanisha
Ntabitekerejeho ariko iyo binturutse mo bisobanuye ko biba bindimo.
Uburyo nkunze gukoresha muri ubwo bwinshi rero, « NDAVUGA ».
Kandi mu kuvuga ntuma umunyacyubahiro wanjye witwa « Umuvugizi »
ni we uvuga mu mwanya wanjye. (Ururimi)

Uyu muvugizi wanjye rero, nta kosa na rimwe agira.
Ahubwo atuma amakosa ari muri njyewe amenyekana
Kuko icyo mubwiye kuvuga ni cyo avuga,
kandi nta kintu na kimwe avuga atari njye umutumye.
Nawe rero ndamuyobora.

Uretse impanuka, ntakindi gihe ashobora gukubitika azira njyewe
Nyamara njyewe inshuro nyinshi ndamuzira,
Nyamara si we mba nzize ahubwo mba nizize ubwanjye
kuko mufiteho uburenganzira bwuzuye.
Mubwiye ngo : “vuga” ntashobora gutuza
Kandi mubwiye ngo: “tuza” ntashobora kuvuga.

Ariko birananira akenshi, kuko biranyoroheraye cyane
kubeshya abantu uwo ndi we mu gihe gito,
ariko birakomeye cyane kubahisha uwo ndi we mu gihe kinini,
uyu mukozi wanjye ntankundira kwihishira
kuko ni we ugaragaza vuba uwo ndi we
ku kigereranyo cyo hejuru kuruta abandi bose.

Mbashije kuyobora neza Umuvugizi wanjye
Nabankemuye ibibazo byinshi mu byo mpura nabyo mu mibanire yanjye
N’abandi. Ariko kandi ndamushima cyane kuko mbona nari mukeneye rwose
Ndetse kumugira ni umugisha.

Mfite amahirwe ku byiza byose mfashwa mo n’uyu mukozi wanjye,
ariko kandi ibyiza byose n’amakosa yose bituruka kuri we
byandikwa mu gitabo cy’ubucurabwenge cyanjye
kimwe kizabumburwa na wa Mwami w’abami wanyimitse
nyuma yo gutanga kwanjye.

Ndacyibaza, ubu koko nzatanga nte?

3. Umuhereza.

Uyu munyacyubahiro we, akwiye ibihembo bihanitse
kuko akora imirimo myinsi.
- Ni umukarani (arandika)
- Acunga umutekano (arandwanirira)
- Ni umufasha (Arafata akanaterura)
- Arantwaza, arantamika, aranyambika, arankarabya n’ibindi byinshi.

Mu nzandiko nyinshi nandika inziza n’imbi zose ni we uzandika,
Hari n’ubwo asinya kuz’impimbano.

Mu ntambara arwana harimo inziza n’imbi.
N’ubwo andindira umutekano ariko hari n’igihe ari we
uba impamvu yo kuwuhungabanya. Hari ubwo agira amahane
akavusha n’amaraso y’utariho urubanza.

Arantwaza nkanezerwa cyane, n’ubwo hari n’ubwo antwaza ibitari ibyanjye.
Amfasha guhereza ngahabwa umugisha, n’ubwo gari n’ubwo
amfasha kunyaga nkavumwa.
Hari ubwo nasama akantamika ibiryo by’imfubyi,
Imisoro ya leta, amaturo y’abana b’Imana
mu buryo ntemerewe, rimwe na rimwe nguwo arashimashima
abagore/abagabo b’abandi, nguwo mu bahungu/abakobwa b’abandi.
Uzi ko ashobora kubura isoni agasingira n’abana bato?
Naratangaye cyane! Uko akora byinshi ni nako akosa muri byinshi.

Ariko kandi nawe ni njyewe umuyobora.
Burya iyo akora, aba ashyira mu bikorwa amabwiriza ahawe nanjye,
Ndetse hari n’ubwo akora amakosa akayazira,
ariko iyo akubitwa ni njyewe ubabara, ndetse iyo avunitse ni njyewe uhomba

Gusa nawe ndamushima kuko anyubaha kandi kumugira ni umugisha rwose.
ariko kandi ibyiza byose n’amakosa yose bituruka kuri we
byandikwa mu gitabo cy’ubucurabwenge cyanjye
kimwe kizabumburwa na wa Mwami w’abami wanyimitse
nyuma yo gutanga kwanjye. Ariko se nzatanga nte?

Ntuzacikwe n’igice gikurikira.

Niyondora Vedaste Christian @agakiza.org