“Nzatanga nte?” Igice cya gatatu!

Ubuntu bube muri mwe n’amahoro biva ku Mana iriho kandi yahozeho kandi izahoraho, biva no ku myuka irindwi iri imbere y’intebe yayo, no kuri Yesu Kristo, ari we mugabo wo guhamya ukiranuka n’imfura yo kuzuka, utwara Abami bo mu isi, udukunda kandi watwejeshejeho ibyaha byacu amaraso ye, akaduhindura Abami n’abatambyi b’Imana ye ari yo na Se, icyubahiro n’ubutware bibe ibye iteka ryose, Amen. "Ibyahishuwe 1:4-6"

4. Abahetsi.

Mfite abandi bakozi nubaha bitwa “Abahetsi”.
Igihe cyose nifuje kugira icyo mfata kitari hafi yanjye,
cyangwa kugira aho njya ndabatuma nibo niyambaza bakantwara,
ntaho bajya bonyine hose turajyana, haba ahari ngombwa n’ahatari ngombwa.

Hari aho banjyana nkishimira urugendo, hari n’aho banjyana nkagarukana agahinda.
Hari aho banjyana nkagarukana impano, hari n’aho banjyana nkagarukana inguma.
Hari aho banjyana nkagaruka nuzuye umwuka wera, hari n’aho banjyana nkagaruka naguye.

Hari ikimbabaza kuruta ibindi. Banjyana mu maduka ya satani kandi ubusanzwe singura nawe, kandi iyo ninjiyemo satani akoresha uko ashoboye sinsohokere aho, akanshakira impamba. Bivuze ngo ibyinshi mu bimbuza amahoro no gukiranuka byose ntibinsanga aho ndi, hari mo ibyo nisangira njyewe ubwanjye bikarangira ndi kwicuza.

Gusa aba bakozi banjye nabo ndabashima kuko banyubaha kandi
kubagira ni umugisha rwose.(Amaguru). Ntahantu bajya atari njyewe ubatumye,
sinanababeshyera kuko ntaho bajya bonyine iyo bagiye turajyana.

Ariko kandi ibyiza byose n’amakosa yose bituruka kuri bo
byandikwa mu gitabo cy’ubucurabwenge cyanjye
kimwe kizabumburwa na wa Mwami w’abami wanyimitse
nyuma yo gutanga kwanjye. Ariko se nzatanga nte?

5. Ikigega kigaburira abaturage.

Mfite ikigega gifasha abaturage banjye kubona ibyo bakeneye byose
kugira ngo babeho, kandi ibibatunga ni ho mbibika. (Inda)
umuryango w’iki kigega nta rugi rubaho,
ni yo mpamvu uhora ukinguye ushaka kwinjiza,
n’iyo wihaye akabanga ni ukwiyegeranya gusa,
uba ubona ari bimwe byitwa kwegekaho gusa ntabwo uba ufunze
kuko igihe cyose habonetse icyinjiramo ukinguka nta kuzuyaza. (Umunwa)

Imbere mu kigega hari mo imashini itunganya ibijyamo
ikora amanywa n’ijoro ntijya iruhuka na rimwe.(Igifu)

Ikibazo gikomeye ngira, ndapakira buri munsi
ariko ikigega cyanjye ntikijya cyuzura. Kandi impamvu zirahari zumvikana.
Ni cyo gitunze abaturage bose b’igihugu cyanjye (Ingingo zose z’umubiri)
Kandi buri mwanya kiba gitanga intungabuzima muri bo.

Ikindi kibazo, iki kigega kiratobotse. Ibyo gisaguye byose ntikibigumana
kibijugunya hanze, kandi birumvikana kuko biba byatinze bikaba imyanda,
ndetse kiramutse kitabisohoye nagira ikibazo gikomeye mu gihugu cyanjye.
Hamwe n’izo mpamvu rero ntabwo gishobora kwuzura.

Ndahaha ngashyiramo, ariko hari ubwo nshyiramo n’ibyibano.
Ndagabirwa ngashyiramo, ariko hari ubwo nshyiramo n’ibyo nariganije.
Iki kigega gihora cyiteguye kwakira isaha ku isaha,
kandi cyakira kititaye ku nkomoko y’ibyo cyakira.
Naratangaye, uzi ko cyakira n’uburozi kikabwakira?

Ubushake bw’iki kigega bukunda kundusha imbaraga
Kinkoresha amakosa menshi, hari n’ubwo kintwaza igitugu
Nkibagirwa ko nkijijwe, cyangwa ko ndi umuntu mukuru
Ku buryo iyo ngiye ku meza mbere, abasigaye inyuma yanjye
bashobora kubihomberamo.

Ariko amakosa akomeye si ay’ikigega, ahubwo ni ayanjye
kuko ntakijyamo atari njyewe ugishyizemo.
Sinzi umunsi wo gutanga kwanjye, wenda ngo nibaze
ko ibyo ntunze byose nzapfa mbimaze, ariko mpemuka amanywa n’ijoro
ngo ndi gutegurira ejo hazaza, kandi ntazi niba nzanahagera.

Kugira icyerekezo si bibi ariko guhemuzwa n’ibizaza ni ubugwari,
kuko n’aho ndi si imbaraga ubutwari cyangwa ubwenge
kuko hari ababindusha batakiriho. Uzi ibyo nkeneye none
azi n’ibyo nzakenera byose, nkwiye gutegura ahazaza
ariko sinkwiye guhemuzwa naho. (Ubundi guhemuzwa n’inda ni igisebo
n’ubwo ihemuza benshi.)

Ariko kandi kigega cyanjye, ndagushima rwose
kuko ntagufite nta muturage wanjye n’umwe wabaho
nanjye ubwanjye sinabaho. Kukugira rwose ni umugisha.

Ibyiza byose n’amakosa yose bituruka kuri wowe kigega cyanjye,
byandikwa mu gitabo cy’ubucurabwenge cyanjye
kimwe kizabumburwa na wa Mwami w’abami wanyimitse
nyuma yo gutanga kwanjye. Ariko se koko nzatanga nte?

Nkurarikiye igice gikurikira.

Niyondora Vedaste [email protected]