Nyuma yo kurokoka jenoside, Diane Uwase yiciwe abana batatu bahawe uburozi (Igice cya 2)

Mu gice cya mbere cy’ubu buhamya twari twabagejejeho uko Imana yarokoye Uwase Diane, ikamurindira mu busa busa, akarokoka jenoside yakorewe abatutsi muri Mata 1994. Muri iki gice turabagezaho uko ubuzima bwamurebeye bubi akageza ubwo yicirwa abana batatu, ariko Imana ikamushumbusha urubyaro.

Satani ntiyaretse kuduhiga kuko umunsi umwe narose inzozi ngo njyewe n’abana n’ umugabo tuguye mu nyanja nini iratumira nkangutse mbwira umugabo wanjye nti: “Ndose nabi”, ahita ambwira ngo nawe yarose urupfu mu rugo rwacu. Uwo munsi murumuna wanjye ambwira ko yarose inkuba ikubita urugo rwacu tugapfa.

Bukeye mukuru wanjye yaje kudusura agiye gutaha afata umwana umwe muri 4 amujyana iwe abandi bararira ariko aramujyana ararayo ngo yanga kwitahana wenyine.

Bukeye ndi koga muri douche numva umwana muto ari kurira mbwira umukozi ngo arebe icyo abaye agiye asanga aho nasize abana bicaye hari umugore w’ umuturanyi ari mu bana nta kibazo cyari gihari kuko yari asanzwe ahaza buri gihe. Ariko uwo mugore yakundaga kumbaza ibibazo biterekeranye ngo: “Warokokeye he? Kuki ukundana n’ umugabo wawe? Abana bawe babaho bate? Barya iki? N’ ibindi…” ariko numva ari bimwe by’abagore bisanzwe. Nigeze no kumusura iwe nsanga hari agacuma gatogota ndikanga ngira ubwoba.

Ubwo rero umukozi amusanga mu bana arabyihorera byageze nimugobora nari mu masengesho ku rusengero najyanye umwana muto araremba araruka arituma mu gahe gato araremba birenze. Namuzindukanye kwa muganga nyura mu rugo nsanga n’abo nahasize nabo ni uko bimeze, umukozi yashobewe bose yaboroshe.

Kuko uwo muto ari we wari urembye cyane namujyanye kwa muganga bukeye ahita ampfiraho, abandi bana bari babagejeje CHUK barimo serumu, undi nawe ahita apfa, undi mwana nawe wa 3 yaraye ataka cyane ahita apfa. Ubwo nahise ndemba banjyana kwa muganga CHUK mfite umuriro mwinshi bagerageje kumfasha ariko namazeyo ibyumweru 2 itorero ryahise rishaka aho ritwimurira navuye mu bitaro nsanga twimutse.

Abantu baraje bakaduhumuriza bakatubwira ko babonye dufite abandi bana. Wa mukozi w’ Imana wampishe mu ntambara yaraje atujyana mu mahugurwa y’ isanamitima no gukira imvune zo mu mutima ariko njye ihungabana ryanga gukira ibintu byose nkabona biroze, isazi iguye ku kintu nkabona nta cyizere, nari meze nabi namwe murabyumva gupfushiriza abana 3 umunsi umwe birakomeye.

Nyuma byaje kugaragara ko nanjye nari nararozwe mbere ntabizi, abantu barimo nabo dusengana batubwiye ko twakwivuza mu kinyarwanda ariko njye n’ umugabo wanjye dufata icyemezo ngo niba ari ugupfa tuzapfe ariko ntituzajya kwivuza mu miti ya Kinyarwanda (abapfumu).

Imana yaramfashije nongera gusama inda mbyara abandi bana 4 ubu mbese dufite abahungu 5. Imana yacunguye imibabaro yacu idushumbusha abana beza cyane. Ariko ba bantu baturogeye abana bakomeje kutugendaho ariko Imana ikaturokora.

Intambara ya Satani yaje guhindura isura kuko twaje gutura hafi y’urwibutso rwa Gisozi batangira gutera amabuye ku nzu yacu bigera igihe batwicira urugi. Nahoranaga ihungabana meze nabi.

Umugabo wanjye yaje gufata icyemezo atwimurira muri Uganda, umunsi nambutse umupaka numvise umutima wanjye uruhutse cyane ntangira kugira icyizere cy’ ubuzima. Mbere sinabashaga kurara njyenyine ariko umugabo yadusizeyo agaruka mu kazi I Kigali numva nta kibazo mfite, abana bariga neza.

Ibijyanye no gusenga byari bigoye kubona aho dusengera n’abantu twisangamo ariko Imana yampaye itorero ryiza dusengeramo. Uko nagiye mbana n’ Imana ni ko umutima wanjye wagiye ubohoka mbasha kubabarira uwanyiciye abana numva nta rubanza mfite kuko satani azanwa no kwiba, kwica no kurimbura ariko Yesu we yaje kugira ngo intama zibone ubugingo kandi bwinshi (Yohana 10:10).
Nyuma naje gusengerwa kuba umudiyakoni nkora umurimo w’ Imana, umuryango wacu ufite amasezerano meza n’ubwo twanyuze mu bikomeye ariko Imana itubikiye ibyiza byinshi.

Nasoza mbwira abantu bafite ibibazo bitandukanye ko Yesu ari igisubizo kandi abarokotse Jenoside yakorewe abatutsi be guheranwa n’ ibyababayeho kuko Imana igifite imigambi myiza yo kububaka no kubaka igihugu kimwe n’abandi bafite ibigeragezo bitandukanye bihangane Yesu yishimira kudufasha mu mibabaro yacu.

Niba utarasomye igice cya 1 kandi iyi link ugisome http://www.agakiza.org/spip.php?article3320