Nyuma y’imyaka 25 itangiye umurimo Korari Philadelphia ya ADEPR Nyamata igiye kumurika amajwi n’amashusho

Korali Philadelphia yatangiye umurimo w’Imana mu mwaka w’1992, ku mudugudu wa kayenzi, iza kuhava yerekeza mu itorero rya ADEPR Nyamata Paroisse ya nyamata ho mu karere ka bugesera, mu ururembo rw’uburasirazuba.

Nk’uko bitangazwa na bamwe mu baririmbyi bayo, Iyi korali yakozweho bikomeye na Genocide yakorewe abatutsi muri 1994, ariko ngo ntabwo byabaciye intege, kuko nyuma yayo bongeye kwisuganya bongera gukora umurimo w’Imana. Mukantabana Liberatha Umubyeyi uririmba muri iyi korale yabwiye agakiza.org ati: “Nyuma ya Genocide twari twatakaje ibyiringiro ariko imfubyi n’abapfakazi ndetse n’abandi bari barokotse twaje kongera kwisuganya twongera gutangiza korali philadelphia, turasenga cyane ndetse Imana igenda iduha amasezerano none dore twongeye kuba korali ishikamye mu murimo w’Imana”

Ibi kandi bishimangirwa na Bwana Rangira Kito umuyobozi w’iyi Korali, wanongeyeho ko imbaraga za korali Philadelphia zishingiye ku bihe byinshi byo gusenga bagira nka korali, bikunganirwa n’ibikorwa by’urukundo birimo gusurana ndetse no kubana mu bisubizo Imana igenda itanga hagati muri korali, kuri ubu bakaba bishimira intambwe ikomeye Imana yabateje dore ko ngo bageze kuri imyiteguro yo kumurika kumugaragaro umuzingo w’indirimbo zabo, mu kiganiro na agakiza.org Bwana Rangira yagize ati “ ni muri Turimo gutegura indirimbo mu buryo bw’amajwi n’amashusho zibumbiye mu muzingo cyangwa se album mu mvugo imenyerewe twise UMUKOZI W”UMUHANGA Ikaza igizwe n’indirimbo 11 kandi tukaba twizera ko zizaryohera abazazumva n’abazabona amashusho yazo cyane ko ari album twitondeye kndi yakozwe n’abahanga bamenyereye gukora indirimbo zagiye zikundwa mu Rwanda.

Korale Philadelphia igeze kure Imyiteguro yo kumurika umuzingo wayo
Bwana Rangira yahamije ko Philadelphia igeze ku musozo wo gufata amashusho y’indirimbo zabo ikaba yarangije no gutangaza amatariki y’ingenzi mu myiteguro ya launch ya album yabo ya mbere, ngo ku itariki 19/11/2017 bazakora igikorwa kibanza (Pre-Launch) izabera kuri Sunrise Nyamata, aho batumiye Ev. Munezero uzaturuka mu Ruhengeli, igikorwa cyo kumurika Nyamukuru (Launch) kikazaba kuwa 19 ukuboza 2017. Kugeza ubu korali Philadelphia igizwe n’abaririmbyi bagera kuri 70 barimo abagabo, abagore ndetse n’urubyiruko benshi muri bo bakaba bahuriza ku mvugo igira iti “ nta kure habaho imana itakura abantu”.

Urusengero rwa ADEPR Nyamata aho Korale Philadelphia isengera
Twahirwa Jean Baptiste/agakiza.org