Nyuma y’amarira menshi nawe Imana yagusetsa

Maze Eli aramusubiza ati : « Genda amahoro. Imana ya Isirayeli iguhe ibyo wayisabye.” 1Samweli 1:17

Uyu mubyeyi Hana yashyingiranywe na Erukana nk’uko n’abandi bashakana babaho bategereje umwana umwaka wa mbere urashira bakomeza kwihangana, ariko imyaka ibaye myinshi Erukana yishakira Penina kandi kubw’umugisha wa Penina arabyara binabera ingorane Hana kuko mukeba we byamuhesheje kujya amukina ku mubyimba.

Uko umwaka utashye yajyaga amucaho agiye gutamba ibitambo ajyanye n’umwana n’umugabo we ari nawe mugabo wa Hana, nawe tekereza nk’ukuntu yanyuraga ku irembo kwa Hana uburyo yakoreshaga uko ashoboye ngo Hana amenye ko Penina ahanyuze byarashobokaga ko hari n’iyindi myitwarire yagiraga ikakaye kugira ngo yumvishe Penina ko ari ingumba we atabyara!

Nyamara ni Imana ubwayo yabikoze imuziba inda ibishaka. Umwanditsi niwe wagize ati: “Ariko igira icyo yitumye ninde wabasha kuyivuguruza? Kandi icyo umutima wayo ukunze nicyo ikora.” Yobu 23:13

Rero mu bushobozi ububasha n’ubushake bwayo yashoboye kumuziba inda ariko nanone Imana ishimwe ko yari yarateguye umunsi wo kumuhoza amarira. Imana ishimwe ko mu marira menshi ya Hana mu bwihebe no gutekereza ko ahari azapfa nta kana, mu bukure no mu gahinda umuntu atarondora Imana yamusekeje nukuri ikamuha Samweli

Mwenedata hari igihe ugeramo ukabona ko ntacyo kuguhumuriza gihari, imfatiro zawe zikamera nk’izinyeganyejwe aho wakaboneye ihumure ukahahangayikira ariko ndagira ngo nguhe ihumure. Nyuma y’uburibwe bwa Hana habayeho guseka.
Mu bushobozi Imana ifite harimo no kukunezeza. Ijambo ry’Imana ritubwira ko atari ko bizaba kubategereza Uwiteka ko ntawe uzakorwa n’isono kereka abava mu masezerano nta mpamvu nibo zizakora. Zaburi 25:3

Icy’ingenzi ni ukuguma mu masezerano ukihangana ugategereza gutabarwa, birashoboka koko ko ntacyari kikiguhumuriza wari ugoswe n’ubwihebe ariko ni ukuri Imana yiteguye gukora ibirenze ibyo utekereza, reka kwiiheba wizere uzabona kugira neza kw’Imana kandi nawe izagusetsa.

M.Claire [email protected]