Nubwo isi iheranye benshi ariko Yesu azaza/ Bruce Abraham Kayitare.

Amahoro bavandimwe. Imana ishimwe kubwo gutanga amahirwe yo kuganira ku ijambo ryayo.

“Nubitse imidugudu nkuko Imana yubitse i Sodomu n’i Gomora, muba nk’umushimu ukuwe mu muriro ariko ntibyatuma mungarukira. Ni ko Uwiteka avuga. Ni cyo gituma nzakugenzereza ntyo Isirayeli we. Ubwo nzakugenzereza ntyo, itegure gusanganira Imana yawe.”Amosi 4:11

Turi mu gihe abantu bakunze isi cyane kugeza ubwo abasenga nabo usanga bisabira ubutunzi, gukomerera mu isi no kumenyekana gusa. Iri rari ry’isi rero rituma abantu batoteza abandi, barushaho kwikunda, bariganya, bakurura inzangano n’ishyari, intonganya n’ibitutsi, ubugambanyi, uburyarya n’ibindi.

Iyi mico mibi ituruka ku gukunda isi cyane niyo ituma abantu bahinduka, ugasanga uwacaga bugufi yabaye utava ku izima ngo akunde agaragaze ko akwiye kubahwa, abandi nabo ntibakigira umutima ubabarira ngo batazabasuzugura bityo bakikakaza, barobanura ku butoni bava mu masezerano bakagwa burundu, umuntu akareka gusenga no gukora imirimo y’urukundo ni ukugira ubwenge. Ese ubwo bwenge buva ku Mana?

Abantu benshi bikundira inyigisho zibabwira ibyo bifuza kumva gusa, ntibagishaka kumva icyo Imana ishaka kubabwira. Ibi byose, ijambo ry’Imana ritwereka ko ari ibimenyetso by’ubuhenebere bwo mu minsi y’imperuka (Abaroma 2:23-32).

Abantu bakinguriye ibizira barabyimika pe! Biragoye kwita ku bugingo cyangwa gutekereza k’ukugaruka kwa Yesu, ashwi da! Nta n’akanunu. Yewe n’umwigisha wigishije atyo, abenshi bataha bavuga ko nta mavuta afite,(Bakunze gukoresha imvugo ivuga ngo : “Yadupfunyikiye”) mbega kwigisha ko Yesu azaza ntibikigezweho kuri benshi, nyamara byavugwa bitavugwa YESU AZAZA!

Ntawe uzi niba azaza mu muyaga, mu murabyo, mu muriro, ikizwi ni uko bizaba mu kanya gato nk’ako guhumbya.

Umuririmbyi yararirimbye ngo: “Ese Umwami Yesu naza tuzamurebesha amaso asa ate?” Igitangaje nuko nta jisho na rimwe ritazamubona. “Dore arazana n’ibicu kandi amaso yose azamureba ndetse n’abamucumise na bo bazamureba kandi amoko yose yo mu isi azamuborogera….” Ibyahishuwe 1:8

Mu kinyejana cya kane mbere ya Yesu ku gihe cy’umuhanuzi Amosi, ku ngoma ya Yerobowamu wa kabiri na Uziya bategekaga Isiraheli n’Ubuyuda, abantu batotezaga abandi, abakize bagakandamiza abakene, ubwicanyi bwari bwose, ruswa yarabicaga bigacika.

Imana ihagurutsa uyu muhanuzi wari woroheje cyane wari umuhinzi mworozi (Amosi), abibutsa ko ibyaha byatumye Imana ihana Isiraheli n’I Buyuda, ndetse itwika Sodomu na Gomora, abarokotse ntibahindukira.

Rero kuko Imana ntacyo yakora itabwiye abantu, yagombaga kubagarukaho. Gusa iyo abantu batitaye ku mbuzi ntibabura kugubwa gitumo kandi ntakibuza umugambi w’Imana gusohora. Ibyabaye icyo gihe bigaragaza ko uburangare bw’abantu butabuza Imana gukora ibyo yivugiye ubwayo.

Hari abantu ngo bafite agakiza ka kera bumva ijambo bati: “Ibyo turabizi bihoraho”, ariko bavandimwe iyi Mana ntimenyerwa kuko umunsi umukiranutsi yabiretse agakora ibyaha ntazabura gupfa arimbutse. (Ezek 3:20). Tuyikorere dutinya. Aho gufata umwanya wibaza ngo nta herezo rihari wawufata wigenzura niba witeguye gusanganira Imana. Impamvu bisa nkaho bitinze, Imana iba igira ngo bose bihane. Naho isi irashirana no kwifuza kwayo kandi ibyo twirukira bizaba umuyonga,
(2Petero 3: 2-10).

Ibyo twirengagiza nibyo bizadushyirisha mu rubanza. Dore abasuye abarwayi kwa muganga no mu nzu y’imbohe, abambitse abambaye ubusa, abagaburiye abashonji bagacumbikira abagenzi n’ababuze aho kuba, abitaye kuboroheje ni bo bazahembwa.

Abanangiye bakabyirundanyaho bari kuboroga babwiwe ngo mumve imbere mwa bivume mwe kuko mutamfunguriye nshonje, ngo mumpe icyo kunywa mfite inyota, kuko mutancumbikiye ndi umushyitsi… (Mat 25:31-46).

Reka nsoze nibutsa ab’imitima ibiri kwihana. Umwami Imana izaza kandi ntizaceceka, nuko buri muntu yisuzume, yihane, kugirango uyu munsi utazadutungura tube maso turinde imyenda yacu ( Ibyahishuwe 16:15).

Nuko rero Umwami Imana itweze rwose kandi twebwe ubwacu, n’umwuka wacu n’ubugingo n’umubiri birarindwe bitazabaho umugayo ubwo Umwami Yesu azaza.
( 1tesalonike 5:23) Amen!

Niyondora Vedaste [email protected]