Ntugahe satani umwanya wo kukuganiriza

Uwo mugore arayisubiza ati “Imbuto z’ibiti byo muri iyi ngobyi twemererwa kuzirya, keretse imbuto z’igiti kiri hagati y’ingobyi ni zo Imana yatubwiye iti ‘Ntimuzazirye, ntimuzazikoreho, mutazapfa.’ ” Iyo nzoka ibwira umugore, iti “Gupfa ntimuzapfa,
kuko Imana izi yuko ku munsi mwaziriyeho, amaso yanyu azahweza mugahindurwa nk’Imana, mukamenya icyiza n’ikibi.”

Uwo mugore abonye yuko icyo giti gifite ibyokurya byiza, kandi ko ari icy’igikundiro, kandi ko ari icyo kwifuriza kumenyesha umuntu ubwenge, asoroma ku mbuto zacyo, arazirya, ahaho n’umugabo we wari kumwe na we, arazirya. Itangiriro 3.2-6

Kenshi abantu bagushwa mu byaha no gufata umwanya wo kungurana ibitekerezo n’umubi. Ntabwo satani yitwa se w’ibinyoma cyangwa w’indyarya ku busa. Azi neza umurimo we azi n’inzira zose yanyuramo kugirango akugushe.

Akenshi imitego ugwamo ushobora gusanga yaturutse kuguhereza Satani umwanya ngo muganire. Umwe niwe wavuze ngo Satani akubohesha imigozi agusanganye. Adamu na Eva ntago bari baravukiye mu cyaha ugereranije nuko twe tuvuka, ntacyari gutuma bagwa mu cyaha.

Babaga bishimye, kandi banyuzwe, mu buryo bw’imibereho no muburyo bw’umwuka bari baguwe neza ariko akantu gato gusa « Guha umwanya Satani ngo baganire» kabiciye amahirwe y’ubuzima gatuma bava mu masezerano y’Imana, kugeza ubu natwe tuba mu ngaruka z’ibyo.

Mubyukuri ntacyo bari babaye ariko hamaze kubaho kiriya kiganiro Eva abonako koko hari icyo babura nawe atangira kwifuza kumera nk’Imana yemera ibyo satani amusabye byose iyo mbuto igera no ku mugabo nuko birakaza Imana irabahana.

Nusenga ujye uhora usaba Imana kukurinda umubi, ikindi kandi numenya ko yaje umwirinde, wowe ubwawe n’imbaraga zawe biragoye kumunesha, icya mbere cyo ntabwo ari wowe wenyine yaba ashutse, amaze kugusha umubare munini w’abantu bari bafite imbaraga zirenze izawe, niyo mpamvu tugomba kumva gusa icyo Imana idusaba tukagikora ubundi tukirinda ibindi biganiro bituruka ku mubi kuko burya nawe ntago ari umuswa aza yakubaze, iyo umuhaye umwanya rero uba wikozeho.

Dore icyo ijambo ry’Imana rivuga « Nuko rero mugandukire Imana ariko murwanye Satani, nawe azabahunga Yakobo 4.7

Bibiliya iduhana kutabererekera satani, umwanya muto Eva yahaye satani ngo bagirane ikiganiro cyazaniye isi yose icyago, none ba maso, wirinde guha satani umwanya kuko niwo azagutegeramo. Imana idufashe mu izina rya Yesu. Amen.