Ntitukiri imbata z’icyaha ahubwo turi iza Kristo

Ubundi iyo umuntu ari imbata y’ikintu nicyo kiba kimutegeka, urugero umuntu ashobora kuba imbata y’ibiyobyabwenge, aho hakaba ariho umutima we wibera, nubwo yashaka kubireka kuko biba byaramubase ntabwo bimworohera ahubwo agengwa nabyo.

‘’Babasezeranya umudendezo nyamara ubwabo ari imbata z’ibiboze, kuko icyanesheje umuntu kiba kimuhinduye imbata yacyo.’’ 2Petero 2:16

Yesu rero yabonye ko ubwo bubata bumereye nabi umwana w’umuntu nicyo cyamuteye kuza mu isi kugira ngo adukure mu bubata bw’icyaha nurupfu. Ibyaha byacu byose abyishyiraho, yitwa mubi kubwacu.

Ni ukuri intimba zacu nizo yishyizeho, imibabaro yacu niyo yikoreye, ariko twebwe ho twamutekereje nk’uwakubiswe n’Imana agacumitwa nayo, agahetamishwa n’Imibabaro.Nyamara ibicumuro byacu nibyo yacumitiwe, yashenjaguriwe gukiranirwa kwacu, igihano kiduhesha amahoro cyari kuri we, kandi imibyimba ye niyo adukirisha. Yesaya 53

Ibyaha byacu byose Yesu yarabibambanywe, biratangaje kuba hakiri abantu batari bamenya iby’ubu buntu Yesu yatanze, bakikoreye imitwaro y’ibyaha ibaremereye, babuze uko bayitura kandi hari uwemeye kuyibatura, ntibikwiriye gukomeza kwitwa imbata y’icyaha ndetse n’imbata ya satani kandi Yesu yaraje kugira ngo aheshe umuntu wese kubohoka.

Ntabwo bisaba byinshi uyu munsi wemere kwakira ubwo buntu nawe, emera kujugunya uwo mutwaro, wiwugundira kuko utera urupfu.
Yesu yabambwe ku bwacu no kubw’ibyaha byacu kugira ngo atugire ab’umudendezo, nta mpamvu yo gukomeza kubatwa n’ibibi.

Uwahamagawe n’umwami wacu ari imbata aba abatuwe n’umwami, kandi uwahamagawe n’umwami ari uw’umudendezo aba ari imbata ya Kristo 1Abakorinto 9:1
Bivuze ko iyo umuntu yemeye kwitaba umuhamagaro wa Kristo uba uhindutse uwumudendezo, atakiri imbata y’ibibi ahubwo ahinduka imbata ya Kristo we ubwe akaba ariwe uyobora ubuzima bwe. Imana ishimwe ko yemeye gutanga Yesu ngo adukure mu bubata bw’icyaha n’urupfu ubu tukaba turi ab’umudendezo.

Uyu munsi wemerere guhereza Yesu ibyaha byawe bimwe byakunaniye, bimwe bikuvuna abyurirane kumusaraba abipfane abihambanwe mumva, ntabwo uzongera kwitwa imbata y’ibibi ukundi, Amen.