Ninde mucuditse muri kino gihe?

Ariko ibyo bitaraba, Eliyashibu umutambyi washyiriweho gutegeka ibyumba byo mu nzu y’Imana yacu ubwo yari yuzuye na Tobiya, yari yamutunganirije icyumba kinini aho kera babikaga amaturo y’amafu n’icyome, n’ibikoreshwa n’ibice bya kimwe mu icumi by’imyaka y’impeke na vino n’amavuta, ibyagererwaga Abalewi n’abaririmbyi n’abakumirizi ku bw’itegeko, hamwe n’amaturo azunguzwa aturirwa abatambyi. ”Nehemiya 13:4-5”

Aya magambo yavuzwe na Nehemiya, mugihe yari agarutse i Yerusalem avuye i Baburoni ibwami. Mugihe ino nzu y’Imana yubakwaga, hari abagabo batatu tudashobora kuzibagirwa babaye ibicantege kuburyo bukomeye.
Babwiraga abubatsi amagambo mabi abaca intege ko ibyo barimo bari gukora ubusa rwose mbese aho kubakomeza no kubafasha muri iyo mirimo itari yoroshye ahubwo bakabaca intege mu buryo bushoboka.

Ariko rero ntibigeze bacika intege ahubwo biyunzemo imbaraga barubaka kugeza igihe inzu y’Imana yuzuriye, Imaze kuzura rero Nehemiya kuko yagombaga gusubira ibwami ibyangombwa byose yabishyizemo ashyira abatambyi n’abaririmbyi mu myanya yabo byose bigiye kumurongo asigaho umurinzi wo kubikurikirana ngo hatazagira ibyangirika.

Uko iminsi yagiye ishira Eliyashibu nk’umurinzi wari wasigiwe iby’urusengero yaje gucudika na Tobia utarigeze yishimira ko urusengero rwubakwa,arangije anakora ikosa rikomeye amutunganyiriza ahabikwaga ibyagombaga gutunga abalewi n’abaririmbyi aba ariho amucumbikira, birumvikana ko batari bakibonye ibyo kubatunga, barigendeye inzu y’Imana isigarira aho. Ariko mugihe Nehemiya yahageraga ntago byamunejeje ahubwo n’uburakari bwinshi yasohoye Tobia nikitwaga icye cyose abijugunya hanze arangije yeza urusengero arangije asubizamo ibyo Eliyashibu yasohoye ubwo yatunganyirizaga Tobia icyumba arangije agaruramo Abalewi n’abaririmbyi inzu y’Imana irongera iragendwa.

Tumaze kumva neza Icyaha Eliyashibu yakoze cyo gucudika na Tobia .Twifuje kukubaza nawe uwo mwaba mucuditse muri iyi minsi, Ijambo ry’Imana ritubwira ko icyaha aricyo bugome, iyo kimaze kwinjira mu mutima w’umuntu kirukanamo bya bihe byiza byo kubana n’Imana n’imirimo myiza yose wakoreraga imbere y’Imana umutima ugahinduka nk’ubutayu butagira amazi. Kuroga, kwica, kwiba, gusambana, inzangano, n’ibindi byinshi bimunga umutima w’umuntu nibyo muri aka kanya twagereranya na Tobia tukabyita umwanzi wacu uturwanya ngo tutazagera mw’ijuru, kubigira incuti no kubana nabyo n’ukwihemukira .

Birakwiriye rero ko kuva none dufata umwanzuro udakuka nkuko Nehemiya yabigenje tugasezerera uwo mugome (Icyaha) mu buzima bwacu Imitima yacu ikongera ikagenderwamo n’imirimo myiza yo gikiranuka. Amen

Imana ibahe umugisha.

[email protected]