Niki twakora ngo duhabwe umugisha n’Uwiteka ?

Umugisha ni ikintu cyose ufite ubonako kikunyuze, ukuntu kose ubayemo ubona nk’impano ishobora kwifuzwa n’abatayifite.Ijambo umugisha ni ijambo ryagutse cyane. Ni ijambo abantu bakunze gukoresha cyane iyo bifurizanya ibyiza, mu gihe umuntu ashimishijwe n’ibyo akorewe kandi uwifurije undi yizerako umugeraho n’uwifurijwe nawe akabyishimira nk’uwubonye nubwo atawubona ako kanya.

Abantu benshi batekereza umugisha mu buryo bugaragara gusa ariko siko biri kuko hari imigisha itagaragara. Abantu benshi baziko umugisha ari ugutunga ibyamirenge ku Ntenyo, oya siko biri ushobora kuba umunyamugisha ariko bidashingiye kubigaragara n’amaso y’umubiri .Rimwe na rimwe twumva bavugango naka uriya we afite umugisha cyangwa ni umunyamugisha ariko ibi babivuga bashingira ku byo atunze.

N’ubundi ibi tubona n’amaso si wo mugisha wonyine gusa ahubwo umugisha nyamugisha uba uhishe mu muntu mo imbere kuko umugisha w’umuntu ntupfa: Urarwara umugisha ukurimo ukaguma kuba muzima, bafunga umuntu ariko umugisha ukurimo ntiwangirike.

Hari indi migisha abantu benshi batazi kandi itangaje kuyitunga: “kunyurwa” no “kugendana n’Imana” . Bibiliya iravugango Umugisha Uwiteka atanga uzana ubukire, Kandi nta mubabaro yongeraho (Imigani 10:22), ntiwaba ufite ubutunzi uziko bwavuye ku Mana ahasigaye bujye buguhagarika umutima icyo gihe waba ubeshye kuko byaba bivuguruza ibyanditswe byera.

Ibyo benshi basenga basaba si byo mugisha w’ukuri, iyo umuntu asaba umugisha wo gutunga cyangwa inzu ntaho bitaniye no gusaba amagi aho gusaba inkoko izajya ihora iguha amagi cyangwa guhitamo imbuto aho guhitamo igiti kizajya kiguha imbuto iteka ryose. “ Kubana n’Imana ugakora ibyo igutegeka ni isoko y’imigisha yose”

Bisaba iki kugirango ube umunyamugisha ?

1.Gukora uko Imana igutegetse

Imana ikunda guha umugisha abayubaha kandi ikarwanya abarwanya uwayubashye. Imana ni umubyeyi mwiza n’inshuti nziza kubayikunda bose. Nkababarira abankunda bakitondera amategeko yanjye, nkageza ku buzukuruza babo b’ibihe igihumbi (Kuva 20:6)

Mu itangiriro 12:1-4, Uwiteka ategeka Aburamu ati “Va mu gihugu cyanyu, usige umuryango wanyu n’inzu ya so, ujye mu gihugu nzakwereka. Nzaguhindura ubwoko bukomeye, nzaguha umugisha, nzogeza izina ryawe, uzabe umugisha. Kandi nzaha umugisha abakwifuriza umugisha, kandi uzakuvuma nzamuvuma, kandi muri wowe ni mo imiryango yose yo mu isi izaherwa umugisha.” Aburamu aragenda nk’uko Uwiteka yamutegetse, Loti ajyana na we. Ubwo yavaga i Harani, Aburamu yari amaze imyaka mirongo irindwi n’itanu avutse. (Itangiriro 12:1-4)

2. Kuvanaho ibitagira umumaro

“Nagusabye ibintu bibiri, Ntubinyime umwanya nkiriho. Nkuraho ibitagira umumaro n’ibinyoma bimbe kure, Ntumpe ubukene cyangwa ubukire, Ahubwo ungaburire ibyo kurya binkwiriye, Kugira ngo ndahaga nkaguhakana nti ‘Uwiteka ni iki?’ Cyangwa nkaba umukene nkiba, Nkagayisha izina ry’Imana yanjye.(Imigani 30:7-9)

"kuko abifuza kuba abatunzi bagwa mu moshya no mu mutego, no mu irari ryinshi ry’ubupfu ryangiza, rikaroha abantu mu bibahenebereza bikabarimbuza. Kuko gukunda impiya ari umuzi w’ibibi byose, hariho abantu bamwe bazirarikiye barayoba, bava mu byo kwizera bihandisha imibabaro myinshi. (1 Timoteyo 6:9-10)

Mu gutegeka kwa kabiri 28, Abisirayeli babwiwe umugisha warubateganyirijwe ariko hari ibyo basabwaga kuzuza ngo iyo migisha no ibagereho, nawe hari ibyo usabwa gukora kugirango uhirwe.

3 Kubaha ababyeyi

Iki kintu kirengagizwa n’abatari bakeya. Imana udusaba kubaha abapapa n’abamama bacu, utitaye kubyo batubahiriza kuri wowe,nukora ibyo uzarama. Kubaha umuntu wese n’aho ataba ari umubyeyi ukubyara, usabwa kubaha abo mubana cyangwa ababyeyi bo mwuka.
“Wubahe so na nyoko, kugira ngo uramire mu gihugu Uwiteka Imana yawe iguha.” (Kuva 20:6)

4 Saba Imana kuguha umugisha

Kuki hari abantu bagirira bagenzi babo ishyari iyo Imana yatanze umugisha kandi bishobokako Imana nabo yabaha umugisha mu gihe baba bawusabye Imana. Imana iyo uyisabye umugisha igihe kiragera ikawuguha.
“Yabesi atakambira Imana ya Isirayeli ati “Icyampa ukampa umugisha rwose, ukāgura imbago yanjye kandi ukuboko kwawe kukabana nanjye, ukandinda ibyago ntibimbabaze.” Nuko Imana imuha ibyo yasabye.(1Ingoma 4:10)

Mu rwandiko rwanditswe na Yakobo hatubwira ko ishyari ubwaryo ari imbogamizi zo kugira icyo umuntu yageraho "Murararikira ariko nta cyo mubona, murica kandi mugira ishyari ariko ntimushobora kunguka, muratabara mukarwana nyamara ntimuhabwa kuko mudasaba,” (Yakobo 4:2)

Indi mpamvu ituma ntacyo umuntu ashobora kubona giturutse ku Mana, biterwa ni uko ibyo akenshi umuntu asaba ataba ashaka kubikoresha mu mugambi mwiza. Gushaka guhabwa umugisha ngo uzakugirire inyungu wenyine si umugambi mwiza Imana yashyigikira.
"Murasaba ntimuhabwe kuko musaba nabi mushaka kubyayisha irari ryanyu ribi." (Yakobo4:3)

5 Kubera abandi umugisha

Bibiliya itubwira intego yo kubiba no gusarura, niba ushaka gusarura umugisha bigusaba kuwubiba. Bera abandi umugisha maze urebe uburyo Imana ikwagura iguha imigisha
"Umunyabuntu azabyibuha, Kandi uvomera abandi na we azavomerwa.." (Imigani 11:25)

6 Kuba umukristo

Kuba muri kristo bituma umuntu abona imigisha atari kuzabona binyuze ku nshuti no ku miryango. “Imana y’Umwami wacu Yesu Kristo, ari yo na Se ishimwe, kuko yaduhereye muri Kristo imigisha yose y’umwuka yo mu ijuru.” (Abefeso 1:3)
Kumenya Yesu bifite agaciro kuruta ibindi bintu byose mu buzima bw’umukristo.

[email protected]