Niki bibiliya ivuga ku kuvuga indimi ?

Abakiristo benshi ntibizera kuvuga mu ndimi kuko babifata nk’ibidafite agaciro. Bamwe batekerezako nta kamaro, ko bidaturuka ku Mana ahubwo biva ku mutware w’umwijima satani.

Abantu bamwe bizera kuvuga mu ndimi, ariko imyumvire yabo nabo ifite aho igarukira : Bamwe batekerezako indimi ari uburyo bwo gushima no kuramya Imana, ubushake bw’umuntu butuma azivuga, abandi nabo bagatekerezako kuvuga mu ndimi bitagira icyo bifasha mu gukura k’ umukristo, bityo bakirengagiza ko Imana igabira abantu impano zitandukanye kugira ngo zifashe abana b’Imana.

Ariko se niki bibiliya ivuga kuvuga mu ndimi ?

1.Yesu yavuzeko kuvuga mu ndimi ari kimwe mu kimenyetso kizaba kubamwizeye:
“Kandi ibimenyetso bizagumana n’abizera ngibi: bazirukana abadayimoni mu izina ryanjye, bazavuga indimi nshya.”(Mariko16:17)

2. Ni ikimenyetso cyo guhabwa Mwuka Wera

“Bose buzuzwa Umwuka Wera, batangira kuvuga izindi ndimi nk’uko Umwuka yabahaye kuzivuga.”(Ibyakoz 2:4)

3. Ni ikimenyetso kubatizera

Ni ikimenyetso kubatizeraz kugirango bamenyeko Imana yo mu ijuru ihari kandi ikorera mu bantu bayo.
“Ni cyo gituma indimi zitamenyekana zitagenewe kubera abizera ikimenyetso keretse abatizera,…(1Abakorinto14:22)

“Barumirwa bose baratangara bati “Mbese aba bose bavuga si Abanyagalilaya? None se ni iki gitumye twese tubumva bavuga indimi z’iwacu za kavukire? Kandi turi Abapariti n’Abamedi n’Abanyelamu, n’abatuye i Mezopotamiya n’i Yudaya, n’i Kapadokiya n’i Ponto no muri Asiya, n’i Furugiya n’i Pamfiliya no muri Egiputa, no mu gihugu cy’i Libiya gihereranye n’i Kurene, n’Abaroma b’abashyitsi n’Abayuda n’abakomeza idini yabo, kandi n’Abakirete n’Abarabu, turabumva bavuga ibitangaza by’Imana mu ndimi z’iwacu.”(Ibyakoz 2 :7-11)

4. Iyo dusenga mu ndimi, Umwuka na wo uba usenga

“Iyo nsenga mu rurimi rutamenyekana umwuka wanjye urasenga, ariko ubwo bwenge bwanjye ntibugira icyo bwungura abandi.”(1Abakorinto14:14)

5. Ni ururimi rw’abamalayika

“Nubwo navuga indimi z’abantu n’iz’abamarayika, ariko singire urukundo, mba mpindutse nk’umuringa uvuga cyangwa icyuma kirenga.”(1Abakorinto13:1)

6 . Iyo tuvuga mu ndimi, tuba tuvugana n’Imana

“Uvuga ururimi rutamenyekana si abantu abwira keretse Imana, kuko ari ntawumva ahubwo mu mwuka avuga amayoberane.”(1Abakorinto14:2)

7. Byungura uzivuga

“Uvuga ururimi rutamenyekana ariyungura, ariko uhanura yungura Itorero.”(1Abakorinto14:4)
“ Ariko mwebweho bakundwa, mwiyubake ku byo kwizera byera cyane, musengere mu Mwuka Wera.”(Yuda 1 :20)

8. Ni Umwuka uhora udusabira nk’uko Imana ishaka

“Uko ni ko n’Umwuka adufasha mu ntege nke zacu kuko tutazi uko dukwiriye gusenga, ariko Umwuka ubwe ni we udusabira aniha iminiho itavugwa, kandi Irondora imitima izi ibyo Umwuka atekereza, kuko Umwuka asabira abera nk’uko Imana ishaka.”(Abaroma8:26-27)

9. Ntukwiye kubuza abantu kuvuga mu ndimi

“Nuko bene Data, mwifuze guhanura kandi ntimubuze abandi kuvuga indimi zitamenyekana.”(1Abakorinto14:39)

10. Ni impano y’Imana

“Icyakora hariho impano z’uburyo bwinshi, ariko Umwuka ni umwe. Kandi hariho uburyo bwinshi bwo kugabura iby’Imana, ariko Umwami ni umwe. Hariho n’uburyo bwinshi bwo gukora, ariko Imana ikorera byose muri bose ni imwe, umuntu wese agahabwa ikimwerekanaho Umwuka kugira ngo bose bafashwe.

Umwe aheshwa ijambo ry’ubwenge n’Umwuka, undi agaheshwa n’uwo Mwuka ijambo ryo kumenya, undi agaheshwa n’uwo Mwuka kwizera, undi agaheshwa n’uwo Mwuka impano yo gukiza indwara. Undi agahabwa gukora ibitangaza, undi agahabwa guhanura, undi agahabwa kurobanura imyuka, undi agahabwa kuvuga indimi nyinshi, undi agahabwa gusobanura indimi, ariko ibyo byose uwo Mwuka umwe ni we ubikorera muri bo, agabira umuntu wese uko ashaka”(1Abakorinto12:4-11).

Abakristo bakwiye kumenya ko Imana iha abantu impano zitandukanye kandi bakizera Imana bagahabwa kuvuga mu ndimi kugira ngo zifashe abantu bayo.

Sophie @Agakiza.org