Ni ki twakwigira kuri Baraba wari kubambwa mu cyimbo cya Kristo?

Ikintu cyose Yesu yakoze mu isi ni gihamya y’urukundo n’ubuntu Imana itugirira mu buzima bwacu.Yesu yatweretse ukuntu Imana ari nziza kandi irangwa n’impuhwe, n’ubwo yarenganyijwe kugera ubwo apfa apfiriye ibyaha byacu.

Mu butumwa bwiza bwa Matayo 27:15-26, hatubwirako mu gihe cy’ubutumwa bwe ku isi, yaje kugambanirwa maze abambwa mu cyimbo cy’umugome witwaga Baraba.

Niki twakwigira ku buzima n’ ubutumwa bwa Kristo ku isi?

Yesu Kristo yarabeshyewe akorerwa ibikorwa by’akarengane kuko abantu bari bamufitiye ishyari.

“Muri iyo minsi mikuru, uko umwaka utashye umutegeka yagiraga akamenyero ko kubohorera abantu imbohe imwe, iyo bashakaga. Icyo gihe bari bafite imbohe y’ikimenywabose, yitwaga Baraba. Nuko bateranye Pilato arababaza ati “Uwo mushaka ko mbabohorera ni nde? Ni Baraba, cyangwa ni Yesu witwa Kristo?” Kuko yamenye yuko ishyari ari ryo rimubatangishije.(Matayo27:15-18)

Abayuda , Abafarisayo n’abakuru b’abatambyi cyane cyane nibo bateye hejuru barasakuza cyane babwira Pilato kubamba Yesu. Iyo Yesu aba ari umugome wakoze ibikorwa bya kinyamaswa,twari kumva impamvu yajyanwe kwa Pilato, ariko yari umuziranenge wakundaga abantu akabereka Imana nicyo cyabaye icyaha, ariko Pilato we yamenyeko ari ishyari bari bamufitiye.“ Kuko yamenye yuko ishyari ari ryo rimubatangishije.”(Matayo27:18)

Abatambyi b’Abayuda bari baragiriye ishyari Kristo, baramufata bamushyira umutegetsi ngo ahanywe batitaye ko Kristo yari inzirakarengane kandi atigeze akora icyaha.

Bitwigisha iki, igihe Kristo yafataga umwanya wa Baraba akabambwa mu cyimbo cye?

Kristo ku bushake no guca bugufi kwe yafashe umwanya twari dukwiriye ahabwa igihano cy’ ibyaha byacu araducungura. Yohana18:39-40 hatubwirako uko umuziranenge n’utakoze icyaha yahawe igihano cyari gikwiriye abagome:
“Icyakora mufite umugenzo ko mbabohorera imbohe imwe mu minsi ya Pasika. Mbese murashaka ko mbabohorera umwami w’Abayuda?” Ariko bongera gusakuza bati “Si we dushaka, ahubwo utubohorere Baraba.” Baraba uwo yari umwambuzi.(Yohana18:39-40)

Twese tuzi uko byagenze, uko Pilato yabohoye Baraba n’ukuntu Yesu yatanzwe ,akabambwa ndetse agapfira ku musaraba.
Turebeye ku buzima bwa Baraba,buratwereka ibintu byinshi. Mariko 15:7 hatubwira icyo Baraba yazize kugirango ashyirwe mu nzu y’imbohe na Pilato.
“Nuko muri icyo gihe hariho uwitwaga Baraba wabohanywe n’abari bagomye, bishe abantu muri ubwo bugome.”(Mariko15:7) Matayo27:16 hatubwirako yari ‘imbohe y’ikimenywabose’.

Muri make, Baraba yari imfungwa y’ikimenywabose, yari umujura n’umwicanyi.Yari afungiwe ibyaha yakoze, byarumvikanaga ko ari we wari ukwiye gutangwa akabambwa. Igitangaje tubona hano, n’ubwo abanzi ba Kristo aribo basabyeko Baraba abohorwa mu cyimbo cya Kristo,n’ubundi yakomeje kuba umunyabyaha. Yesu yarakubiswe, arababazwa, apfira no kumusaraba. Ku rundi ruhande, Baraba yahawe andi mahirwe yo kubaho.

Ibi byose bigaragaza urukundo Kristo yadukunze:“ Ni ukuri intimba zacu ni zo yishyizeho, imibabaro yacu ni yo yikoreye, ariko twebweho twamutekereje nk’uwakubiswe n’Imana agacumitwa na yo, agahetamishwa n’imibabaro.Nyamara ibicumuro byacu ni byo yacumitiwe, yashenjaguriwe gukiranirwa kwacu, igihano kiduhesha amahoro cyari kuri we, kandi imibyimba ye ni yo adukirisha.Twese twayobye nk’intama zizimiye, twese twabaye intatane, Uwiteka amushyiraho gukiranirwa kwacu twese.(Yesaya53:4-6)

Yesu yikoreye ibyaha byacu,apfa ku bwacu, ibibi byose yarabikorewe kugirango turokoke urupfu rw’iteka, n’iyo mpamvu dukwiye kwihanganira kurenganywa kose, kuko na Yesu yabinyuzemo aboneraho kunesha.

Sophie @Agakiza.org