Ni ayahe masomo twakura kuri Petero wihakanye Yesu?

Abenshi muri twe tuzi Petero nk’ umwe mu bigishwa ba Yesu wabaga hafi ye cyane akaza kumwihakana.Iki gihe cya Petero dukwiye kucyigiraho amasomo y’ingenzi mu buzima bwacu no muri uru rugendo turimo nk’abakristo, yo kutihakana Imana mu buzima bwose twaba tubayemo.

Inkuru y’ubuzima bwa Petero tuyisanga mu butumwa bwiza butatu bwa Yesu Kristo(Mariko 14:66-72, Luka 22:54-62, Yohana18:15-18, na Yohana 18:25-26).
Niki twakwigira kuri Petero wihakanye Yesu , uwo yari yarahamije mbere ko ari Kristo umwana w’Imana nzima?

Aha hari ibintu 3 dukwiye kwigira kubyabaye kuri Petero:

1.Buri mukristo ashobora kwihakana Kristo mu bihe bikomeye

Abenshi muri twe ntibashobora kubyemera, ariko ibyinshi mu bivugwa n’abakristo bishobora kugaragaza guhakana Umwami Yesu Kristo mu gihe bari mu bihe bibi cyangwa bikomeye.

Mbere y’uko amwihakana,Petero yari yahamije ukuri kwa Yesu Kristo: “Simoni Petero aramusubiza ati “Uri Kristo, Umwana w’Imana ihoraho.”(Matayo16:16)
Igihe Kristo yari yajyanywe mu nzu y’imbohe ashinyagurirwa, Petero yabonye ko bikomeye aramwihakana.

Abenshi mu bakristo b’uyu munsi bameze batyo. Bafata urugendo bakajya kubwiriza inyigisho za Kristo, ariko mu gihe abo batamuzi iyo batemeye inyigisho ze, bakigira inama yo guhisha ko ari abahamya ba Yesu ,batinya guhohoterwa no kubabazwa.

2.Imana imenya igihe tuzagwira mu bishuko

Mbere y’uko Petero yihakana Yesu, Umwami Yesu yari yamubwiyeko ari bumwihakane:
“Kandi Umwami Yesu aravuga ati “Simoni, Simoni, dore Satani yabasabye kugira ngo abagosore nk’amasaka, ariko weho ndakwingingiye ngo kwizera kwawe kudacogora. Nawe numara guhinduka ukomeze bagenzi bawe.”
Aramubwira ati “Mwami, niteguye kujyana nawe mu nzu y’imbohe ndetse no mu rupfu.” Aramubwira ati “Petero, ndakubwira yuko uyu munsi inkoko itaza kubika, utaranyihakana gatatu ko utanzi.”(Luka22:31-34) .Umwami yamenye ko Petero aza kumwihakana

Wakwizera utakwizera Imana iratuzi neza twese, n’igihe tuzagwira mu byaha. Umwami Yesu yibukije intumwa ze ko satani abanza gusaba uruhushya mbere y’uko agerageza abantu b’Imana(Yobu1). Byongeye kandi , Imana izi ubuzima bwacu bwa buri munsi na mbere y’uko tubaho. “Nkiri urusoro amaso yawe yarandebaga, Mu gitabo cyawe handitswemo iminsi yanjye yose, Yategetswe itarabaho n’umwe.”(Zaburi139:16)

3. Ntidukwiye kwibwirako tutakora icyaha

Igihe Yesu yabwiraga Petero ko ari bumwihakane, Petero yasubirije hejuru amubwira ko aho ajya hose bajyana.
“Aramubwira ati “Mwami, niteguye kujyana nawe mu nzu y’imbohe ndetse no mu rupfu.”(Luka22:33)
Abenshi muri twe dutekerezako Petero yihamije cyane, tukiyibagiza ko natwe dushobora kubikora no muri iki gihe cyacu , nk’urugero umuntu akavugako atacumuzwa n’amafaranga, n’ubundi ari wawundi usanzwe akennye amafaranga, undi akavugako azahora akunda Imana n’umutima we wose, n’ubundi ugasanga n’umuntu wihugiraho .

Kimwe n’izindi mpamvu nyinshi zikoreshwa n’abakristo. Ntibashobora kuvuga nk’ibi bya Petero, ariko iyo urebye ubona bameze kimwe, bari mu mwuka umwe w’ubuhakanyi: Guhakana kugamije kurengera ibyaha byacu, inzira twiciriye.
Bibiliya itubwirako tudakwiye kugira umutima wirarira kuko utuma abantu bagwa mu byaha.

“Kwibona kubanziriza kurimbuka, Kandi umutima wirarira ubanziriza kugwa.(Imigani16:18)

[email protected]