NIGERIA: Umuryango uhuza Abakristo urashima icyemezo cya Guverinoma y’Amerika cyo kubohoza abakobwa b’abanyeshuri bashimuswe na Boko Haram

Umuryango uhuza Abakristo bakomoka muri Nigeria baba muri Amerika arashima Guverinoma y’Amerika nyuma y’aho itangarije ko igiye kohereza ingabo muri Nigeria mu rwego rwo gukiza abanyeshuri b’abakobwa basaga 270 bashimuswe n’umutwe w’intagondwa z’Abisilamu Boko Haram. Uyu muryango ngo wahise utabaza byihuse ukimara kumva iyi nkuru y’incamugongo.

Aba bana b’abanyeshuri ngo basaga 270 bose hamwe ngo bashimuswe nyuma y’aho uyu mutwe w’iterabwoba w’Abisilamu Boko Haram wagotaga ikigo bigaho giherereye mu mujyi wa Chibok, Borno State mu kwezi gushize.

Mu nama n’abanyamakuru yabaye kuri uyu wa Gatatu, Dr. James Fadel uyoboye uyu muryango CANAN yatangarije The Christian Post dukesha iyi nkuru ati "Turashima ko ejo hashize President Barack Obama na John Kerry batangaje ko Amerika izicara kuri ambassade yayo muri Nigeria, igakora iperereza hagamijwe ubufasha." Fadel yakomeje agira ati "Twumvise ko na Leta ya Nigeria yabyemeye, turayishimira."

Fadel yasabye Amerika “gukoresha intwaro zose zishoboka ziri mu bubiko bwayo, igashakisha ndetse igahagarika inkunga n’ibikorwa bya Boko Haram yatangaje ko ari yo yihishe inyuma y’ibi bikorwa."

Kuri uyu wa Kabiri, Guverinoma ya President Barack Obama yatangaje ko izohereza ingabo, ubutasi n’abanyamategeko muri Nigeria gufasha mu bikorwa byo gushakisha no gukiza abo bana b’abanyeshuri.

Obama yagize ati "Mufite umwe mu mitwe mibi mu karere no mu gihugu bibumbiye mu mutwe Boko Haram muri Nigeria, bamaze imyaka bica abantu nta mbabazi kandi twatangiye gushaka umubano n’igihugu cya Nigeria. Aya marorerwa ashobora guhagurutsa umuryango mpuzamahanga wose kugira ngo ugire icyo ukora kuri uyu mutwe w’iterabwoba wica abantu bene aka kageni."

Amakuru atugeraho aravuga ko President wa Nigeria Goodluck Jonathan yemeye iki cyemezo cy’Amerika.

CP