Mwizere Imana izasubuza amasengesho yanyu. Past Barore Cleophas

Nimuhanga amaso ku bitaboneka, mukizera Imana kandi mukayitegereza, izabagororera. Mwe kuba nk’ibikenya bitumva ihoni.

Ibi, Past Barore Cleophas yabivuze ubwo yaganiraga ijambo ry’ Imana n’abakirisitu bo mu itorero rya ADEPR Nyarugenge kuri paruwasi ya Nyarugenge.

Pastor Barore yavuze ko ibyatuma abantu bava ku Mana ari byinshi, ariko na none akangurira abantu kugumisha icyizere kuri Yesu Christo kuko ngo nubwo byatinda bizasohora maze ibyifuzo by’umuntu bigasubizwa.

Yitanzeho urugero avuga ko yigeze gukena kandi afite akazi, yasenga Imana ikamubwira ko izamusubiza, nyamara ngo byaratinze ku buryo iyo ataza gukomeza kwizera ijambo yari yarabwiwe n’Imana, yashoboraga kuba yarabivuyemo.

Past. Cleophas Barore

Yagize ati: "Nigeze gukena bikomeye maze ngiye gusenga mpurirayo n’abandi basore maze barampanurira, bati Imana imanukanye ikibaho cyanditseho ngo uratabawe. Mu by’ukuri sinari mbonye ibyo nashakaga ariko byibura natahanye iryo jambo kandi nkomeza kuryizera kugeza aho yaje kuntabara.

Ibyavana umuntu ku Mana ni byinshi ; uhuye n’umuntu wibiwe telefone ye mu rusengero (hagati aho muzikomereho) wamubwira ute ko mu rusengero bakizwa ? Uramutse uhuye n’uwahutajwe n’abapasitori cyangwa abadiyakoni, uwo muntu wamubwira ute ko mu rusengero habaho abakizwa ? Icyakora nimurebe ku bitaboneka nk’uko petero yabwiwe na Yesu ngo najugunye urushundura rwe mu mazi maze arobe, nyamara akamubwira ati twakesheje ijorao ryose turoba nyamara ntacyo twaronse, ariko kuko ari wowe ubivuze reka tubikore, maze bagaherako baroba ifi nyinshi cyane zivuye mu kwizera no kugendera ku ijambo rya Yesu Christo.

Namwe nimureba ku bitaboneka mukamenya ko mukwiriye kwiyeza no gukora ibyiza,nta kabuza Imana irebera hose icyarimwe izabakorera ibihwanye n’ibyo mwifuza."

Barore Cleophas azwi cyane mu itangazamakuru kuri Radio na Television y’u Rwanda. Mu mwaka wa 2012 taliki ya 24 Werurwe, yaje guhabwa inshingano zo kuyobora umukumbi mu itorero rya ADEPR, kuri ubu akaba ari umupasiteri muri Paruwase ya Remera mu ishami ry’icyongereza n’igifaransa.


Barore ni umunyamakuru akaba n’umupasiteri