ADEPR Remera bazamara iminsi itatu mu giterane cy’amashimwe kubw’inyubako nshya

Mu rwego rwo gushima Imana aho inyubako y’urusengero rwa ADEPR Remera igeze, hateguwe igiterane kidasanzwe kuri uyu mudugudu wa Remera Paruwasi ya Remera uherereye mu mujyi wa Kigali munsi ya Sitade (Stade) Amahoro.

Iki giterane kizamara iminsi itatu kuva kuwa gatanu taliki 12 kugeza ku cyumweru taliki 15 Ukwakira 2017, kigamije gushima Imana ku mirimo ikomeye yakoze ku nyubako y’urusengero runini ruri kubakwa kuri uyu mudugudu, gifite insanganyamatsiko iboneka muri Zaburi 143:5 igira iti: "Nibutse iminsi ya kera nibwira ibyo wakoze byose ntekereza umurimo w’intoki zawe..."


Imirimo yo gutunganya uru rusengero irarimbanije, buri munsi haba hari imoinduka

Uru rusengero ruteganijwe kuzuzura rutwaye akayabo kari hejuru ya Miliyali y’amanyarwanda, kuri ubu rugeze mu mirimo yarwo ya nyuma. Rurasakaye Ibikuta byose biruzuye, rurakinze (Inzugi n’amadirishya) kuri ubu bari mu mirimo yo gutunganya hasi no gusiga amarangi ku bikuta, kandi aho imirimo igeze nta mwenda n’umwe uyu mudugudu ufite kubw’iyi nyubako. Ibyo rero byatumye bategura gushima Imana mu buryo bw’umwihariko.

Iki gitaramo cyagutse cyo gushima Imana kizitabirwa n’amakorari yose yo ku mudugudu wa Remera, ndetse ku munsi wa kabiri w’iki gitaramo (Kuwa gatandatu) hatumiwe korari Hoziyana guturuka ku muri ADEPR Nyarugenge na Rev. Past. Josue Masumbuko nk’umuvugabutumwa.


Korari Hoziyana izaririmba kuwa gatandatu


Rev. Past. Masumbuko J. azabwiriza

Ku munsi wacyo wa nyuma (Ku cyumweru) bazabana na korari Jehovajireh ndetse na Past. Claude Rudasingwa nk’umuvugabutumwa.


Korari Jehovah Jireh izataramira abazitabira iki gitaramo ku cyumweru


Past. Claude Rudasingwa ni we uzabwiriza ku cyumweru