Mu Burasirazuba bwo hagati abakira agakiza bari kwiyongera ku bwinshi

Uburasirazuba bwo hagati hamaze kuba ubwami bukomeye bw’abiyisilamu. Nyuma yo kugenda hagezwa ubutumwa bwiza abakira agakiza bagenda biyongera ku bwinsi.

Nubwo bigoye kubona abantu bahindura idini bavuye muri isilamu, mu bihugu byo mu burasirazuba bwo hagati abakira agakiza bava mu idini ya isilamu bakomeje kwiyongera ku bwinshi.

Fabian uyobora inzu iberamo amasengesho muri Kurdistan yatangaje uburyo Yesu Kirisitu akomeje kubakorera imirimo ikomeye, agasura abantu mu mayerekwa n’inzozi bigatuma bakira agakiza.

Televiziyo CBN mu makuru yatangaje ko n’abanya Irani basuye Kurdistani bagiye kumva ubuhamya bwabo uburyo Yesu yahinduye ubuzima bwabo.

Abbey yatangaje uburyo yagize inzozi abona umucyo mwinshi umutungura yumva ijwi rimubwira ngo “Ngwino unsange nzakuruhura kandi uzabona uburuhukiro mu mutima” ariko ntabwo yabashije gusobanukirwa ibyo yabonaga. Nyuma Abbey na mama we baje gufata umwanzuro wo kwegurira Yesu ubuzima bwabo. Amaze kwakira agakiza ageze mu rusengero nibwo yasobanukiwe ko inzozi yagize ari Yesu wari wamusuye amuzaniye agakiza n’uburuhukiro bwo mu mutima.

Agaragaza uburyo kuba umukirisitu muri Irani bitoroshye kuko bahura n’akarengane gakomeye. Agaragaza ko nibamenya ko yakiriye agakiza bazamujugunya ndetse ko guverinoma ni imenya ko yakiriye agakiza azahita yicwa.

Claire we yakiriye Yesu bitewe no gusoma Bibiliya ashakamo ibyo yakundaga kwibaza ku bakirisitu. Yaje guhurira na mugenzi we wavuye muri Irani nawe wahoze ari umuyisilamu aza kwegurira Yesu ubuzima bwe bwose bituma nawe amwakira. Agaragaza ko kuva bamenyana yabonye imigisha myinshi ku buryo atabona uburyo asobanura uburyo Yesu ari uwo kwizerwa.

Denis nawe yatanze ubuhamya uburyo yakiriye agakiza bitewe n’uko Yesu yamwiyeretse mu nzozi avuga ko atazibagirwa inzozi yagize amubona yambaye ikamba ry’abami amurika umubiri we wose azengurutswe n’abantu benshi.

Agaragaza ko yahise yemera ko Yesu afite abantu benshi bamukurikira, ndetse nubwo muri Irani hataraboneka abantu benshi bamukurikira afite imbaraga zo kwigarurira imitima y’abantu.

Abakirisitu bo muri Irani bahura n’akarengane gakomeye bitewe n’imyizerere yabo nubwo ubuyobozi bugaragaza ko abantu bafite uburenganzira bwo gusengera aho umuntu ashaka.

Infochretienne.com
[email protected]