Menya ibyaranze Selah Concert ya New Melody muri Serena Hotel.


Mu minsi ishize twabagejejeho inkuru y’igitaramo cyategurwaga na New Melody cyari giteganyijwe kubera muri Serena Hotel. Cyarabaye rero ku Cyumweru talikli ya 30/07/2017. Dore muri make uko byari byifashe kuri uwo munsi.

Mu masaha ya saa cyenda, ubwo twageraga kuri Serena Hotel ahari hateganijwe kubera Selah Concert, twasanze abantu ari benshi cyane ku buryo byari bigoye kubona aho wicara.

Concert yari iteganyijwe gutangira saa kumi zuzuye. Ku isaha ya saa 15h30, Abaririmbyi ba mbere bari bageze ku ruhimbi, korari Boarnerges guturuka muri Bethsida Holy Church yafatanije n’abari bahageze guhimbaza Imana.

Korari Boarnerges

Ku isaha ya saa kumi umuyobozi wa gahunda bwana Nagiriwubuntu Diedonne bakunze kwita Dionne guturuka muri ADEPR Remera yakiriye ku ruhimbi umuyobozi wa New Melody Mme Neema Marie Jeanne, atanga ikaze ku bahageze ndetse anibutsa abari aho icyo Selah bishatse kuvuga nk’izina ryahawe iyi concert. Neema yasobanuye ko « Selah » tugenekereje mu kinyarwanda bivuze « gutekereza cyangwa kwiyinira mu mutuzo » (Meditation mu rurimi rw’Igifaransa)

Dionne yayoboye igitaramo

Abaramyi bahimbarisha Imana ingingo zabo mu buryo bukunze kwitwa « Danse moderne & Drama »

Ubwo ababyinnyi bavaga ku ruhimbi New Melody yahaserukanye umucyo mu mabara meza yiganje mo ubururu.

New Melody yakiranywe ubwuzu mu gitaramo

New Melody yafashe umwanya uhagije wo kuramya Imana mu ndirimbo zaba izabo bwite ndetse n’izaririmbwe n’abandi baririmbyi batandukanye.

Umuvugabutumwa Jean Pierre guturuka mu gihugu cy’u Burundi yabisikanye n’aba baramyi mu ijambo ry’Imana aho yagarutse cyane ku gusobanura umutuzo wo mu mutima. Yakanguriye abakirisitu kujya bagira igihe cyo guturiza Imana kuko ngo hari igihe Imana ikenera gukorera mu mutuzo nk’uko yabisabye abisiraheri, iti : « muzenguruke inkike bucece. »

Jean Pierre yabwirije neza abantu barafashwa

Yongeye kwibutsa abari aho kandi ko igihe umuntu atuje yegeranye n’Imana ari bwo abasha kwibonaho ibyaha bityo akihana. Yashimangiye ko kubana n’Imana nyakuri ari ukwemera ko uri umunyabyaha ukihana amaraso ya Yesu akakweza.

Yavuze ndetse ko abigisha inyigisho z’uko byose byarangiye, ibyo yakunze kwita « Inyigisho z ‘ubuntu » baba bayobya abantu. Aha yasobanuraga imyigishirize iri kuvugwa muri iyi minsi mu bigisha batandukanye bavuga ko ubuntu bwa Yesu buhagije nta rubanza rw’ibyaha rukiriho, bigatuma abantu bumva ko byarangiye nta mpamvu yo kwirinda no kwihana ngo Yesu yarabirangije.

Ev. J. Pierre yashoje inyigisho ye asengera umubare munini w’abemeye gushakira Imana umutuzo mu buzima bwabo hanyuma bakihana ibyaha byabo Imana igakora ibikomeye mu buzima bwabo.

Nyuma y’umuvugabutumwa New Melody yagarukanye ku ruhimbi ibihe bidasanzwe mu ndirimbo zitandukanye. Bararirimbye nabo ubwabo birabarenga, aho umuyobozi akaba n’umwe mu bayobora indirimbo muri New Melody Madame Neema Marie Jeanne yafashe akanya ko kuramisha Imana ijwi rye mu buryo butangaje bwanyuze cyane abari mu gitaramo, bikaza kurenga urwego rwo kuririmba agahitamo gusenga isengesho ryafashe umwanya munini ariko rigakora ku mitima ya benshi, amarira y’ibyishimo aba menshi, ku buryo yarisoje benshi bumvaga yari akwiye gukomeza.

Neema Marie Jeanne yakoze ku mitima y’abantu

Bakiri ku ruhimbi, bakiriye umuririmbyi Ashimwe Dominic nawe umuntu atabura kuvuga ko ari mu bihe byiza cyane by’umwuka.

Ubwo yashyikiraga indangururamajwi (Microphone) abantu bose muri salle bahagurukiye rimwe ibintu bisa n’ibihinduye isura. Yafatanije na New Melody guhimbaza Imana mu ndirimbo ze zitandukanye ndetse n’abari mu gitaramo bose bafatanya nawe kuririmba.

Dominic yaramije Imana kugeza ivi rigeze hasi

Umwanya wari usigaye wahariwe umuramyi Simon Kabera, waje kwinjiza abantu mu bihe by’umutuzo bikomeye mu ndirimbo ze zituje cyane kandi zigera ku mutima, hamwe n’itsinda ry’abanyamuziki bamufasha (Band) hari mo n’umuramyi Bruce Higiro.

Uwo mutuzo wuzuye mo umunezero wabereye impamba abari aho, kuko nyuma ye Madame Neema yafashe ijambo ryo gushimira abantu batandukanye, baba abagize uruhare mu itegurwa ry’iki gitaramo ndetse n’abitabiriye muri rusange.

Bruce Higiro

Nyuma ye New Melody yaherekesheje abitabiriye igitaramo amajwi menshi meza y’indirimbo zo kuramya Imana barangajwe imbere n’umuramyi Bosco Nshuti.

Bosco Nshuti nawe aririmba muri New Melody


Iyi concert yitabiriwe n’abantu batandukanye kandi barungutse

Ngushimiye kubana natwe, kandi nkwifurije imigisha yose yo mu gakiza k’Imana!

Niyondora Vedaste [email protected]