Menya byinshi kuri vitamine C n’aho wayikura

Vitamin C izwi ku izina rya Ascorbic Acid n’imwe muri vitamine 13 zibaho, ikaba mu itsinda rya za vitamine ziyenga, iyo zivanze n’amazi bivuze ko umubiri uyikenera cyane umunsi ku munsi kuko umubiri utabasha kuyibika ahubwo uyisohora mu matembabuzi nk’inkari ibyuya ndetse n’ibindi, ikindi nuko iyi vitamine umubiri utabasha kuyikorera nkuko hari izikorwa n’umubiri nka vitamine D na K. Vitamine C kimwe n’izindi vitamine zikenerwa n’umubiri kugirango ukure, ukomere ndetse ubashe no kurwanya indwara zitandukaye. iyi vitamine rero nayo ni nziza ndetse ifite umwihariko tuza kugaragaza hasi.

Umuntu ufite Vitamine C idahagije arangwa no gucika umusatsi yaba uri gusokoza ukajya usigara mu gisokozo, kubyimba no kuva amaraso mu ishinya , kuva imyuna, Kubabara mu nteranirizo z’ingingo, kugira uruhu rukanyaraye, guhorana umunaniro n’umunabi.

Ese vitamine C ifite akahe kamaro mu mubiri w’umuntu?

Nkuko twabivuze haruguru Vitamin C ni ingenzi cyane ndetse ifite umwihariko wo gukumira no kurwanya ibibazo bitandukanye mu mubiri ndetse n’indwara zitandukanye nkuko tugiye kubirondora.

1. Vitamin C yongera ubwirinzi kamere bw’umubiri bityo umubiri ukabasha kwirinda no kurwanya indwara zitandukanye.

2. Ifasha mu kurinda kanseri zitandukanye , ubushakashatsi butandukanye bugaragaza ko gufata vitamin C ihagije bigabanya ibyago byo kurwara kanseri zitandukanye nka kanseri y’ibihaha, igifu, umuhogo n’izindi

3. Vitamine C ifasha mu kuringaniza umuvuduko w’amaraso , kubungabunga ubuzima bw’amaso n’uruhu. ndetse iyi vitamine ifasha umubiri mu gufata ubutare bugakoreshwa mu mubiri.

4.Ifasha mukurinda stroke kukigero cya 42% nkuko bigaragaza n’igitangazamakuru cyo muri Amerika gikora ubushakashatsi mu bijyanye nimirire.

5.Ifasha mu kurinda indwara izwi nka scarvy ibaho igihe vitamine C yabaye nkeya mu mubiri.

6. Vitamin C ifasha mu gukiza ibikomere kuko ifite ubushobozi bwo gufasha umubiri kurema uturemangingomfatizo twubatse umubiri.iyo umuntu afite igisebe cyangwa igikomere kitarakira umubiri ukora uturemangingomfatizo byihuse kugirango hasubire uko hahoze, ibyo iyi vitamine ibigiramo uruhare rukomeye.

7. Ifasha mu kurinda indwara ya Asthma kuko ifite ubushobozi bwo kugabanya imyanda n’imyuka yanduza imyanya y’ubuhumekero ,

8. Ifasha mu kurinda indwara ya Diyabete bitewe n’uko iyi vitamine igira uruhare mu kuringaniza isukari yo mu mubiri.

9. Ifasha mu kurinda no gukiza ibicurane, inkorora n’izindi ndwara zifata ubuhumekero ziterwa n’udukoko dutandukanye.

10.Ifasha mu kurinda uturemangingomfatizo twubatse umubiri no gusohora imyanda mu mubiri kuko igizwe n’ibinyabutabire byitwa antioxidant

Dore aho ushobora gukura vitamine C

Nkuko twagiye tubibabwira kenshi uburyo bwiza bwo kubona vitamine zitandukanye ni ukurya ibiribwa bikungahe kuri zo nubwo haba hari ibinini kwamuganga batanga bya vitamine ariko biba byiza iyo uyiriye mu biribwa bimera cyangwa bihingwa.

Imbuto n’imboga rero biza ku isonga mu biribwa biba bikungahaye kuri vitamin C.imboga z’amabara atandukanye ndetse bikaba byiza iyo uzitetse ntuzihishe cyane ndetse kuzikoramo salade biba akarusho kuko iyi vitamine nibwo iba itarangirika.
Mu mbuto twavugamo nk’indimu, amacunga, imyembe, avoka ndetse n’izindi na zo biba byiza iyo zitahiye cyane.

Source:www.drweil.com
[email protected]