Menya byinshi ku rwungano ngogozi (Digestive System) n’uburyo warufata neza.

Iyi nyandiko yagufasha kumenya urwungano ngogozi icyo ari cyo, umumaro warwo, ndetse n’ibyo wakora bigafasha urwungano ngogozi gukora neza ndetse no kugira amagara mazima.

Urwungano ngogozi ni rumwe mu rwungano rukoze umubiri w’umuntu ku buryo iyo rudahari cyangwa rwangiritse biteza ibibazo bikomeye umubiri wose.
Urwungano ngogozi rero ni uruhererekane rw’ingingo zitandukanye. Zose zirakorana zikanafatanya guhindura ibiribwa mo ingufu zikoreshwa n’umubiri ndetse n’ibindi by’ibanze umubiri ukenera ngo ukure, ukore, wiyubake ndetse wisane aho wangiritse. Tubibutse ko ibi byose bihindurwa bivuye mu byo umuntu yariye.

Urwungano ngogozi rugizwe n’ingingo zitandukanye, muri zo twavugamo: umunwa, umuhogo, igifu, umwijima, urwagashya n’amara. Ibi byose birafatanya kugeza igogora rirangiye, umubiri ugafata iby’ingenzi, ibisigaye bigasohoka nk’imyanda ikomeye cyangwa yoroshye.

Iby’ingenzi wamenya ku rwungano ngogozi.

 Urwungano ngogozi ni rwo rwonyine rubasha gufata ibintu umuntu yariye, rukabihinduramo ingufu zikoreshwa n’umubiri ndetse n’ibindi byose umubiri ukenera kugirango ukure, ukore, ukomere n,ibindi.
 Igogora ritangira ugishyira ibiribwa mu kanywa, bikagenda mu muyoboro wita ujyana ibiribwa kugeza umubiri ufashemo iby’ingenzi, ibisigaye bigaca mu mara kugeza bisohotse bikagera hanze.
 Buri gice kigize urwungano ngogozi kiba gifite umumaro wihariye kandi ukomeye ku buzima, ku buryo iyo cyangiritse bishobora guteza ibibazo bitari bike umubiri wose.

Ibyo wakora bigafasha urwungano ngogozi gukora neza.

 Ku isonga haza kumenyereza umubiri wawe kunywa ibinyobwa bitandukanye, by’umwihariko amazi meza. Ibi byose bifasha urwungano ngogozi gukora neza, guhora ruhehereye ndetse no gusohora imyanda mu mubiri.
 Kurya ibiribwa bikungahaye ku turemangingondodo(Fibres) kuko bifasha urwungano ngogozi muri byinshi, muri ibyo harimo: Gutandukana n’ikibazo cy’impatwe n’ibindi bibazo biterwa n’imyanda itasohotse. Ni byiza ko nibura kuri buri funguro habonekamo ibiribwa bikungahe kuri Fibre. Fibre ushobora kuzisanga mu mbuto n’imboga z’amabara atandukanye, ibishyimbo,ingano n’ibindi.
 Kumenyereza umubiri wawe gukora imyitozo ngorora ngingo. Bifasha cyane urwungano ngogozi gukora neza ndetse no guca ukubiri n’indwara zitandukanye zifata urwungano ngogozi.

 Kwihutira kureba muganga mu gihe wumvise ububabare ndetse n’izindi mpinduka zitari nziza mu ngingo zigize urwungano ngogozi.
 Kugira amasaha adahinduka ufatiraho amafunguro bifasha urwungano ngogozi gukora neza.
 Kuzibukira ibiyobyabwenge nka alukolo(alcool), itabi, ikawa nyinshi n’ibindi
Gufata neza urwungano ngogozi ni ingenzi cyane kuko indwara ziterwa no kwangirika kw’ingingo zikoze urwungano ngogozi kuzivuza birahenze ndetse nyinshi muri zo zikunze kuba karande.

Kwirinda biroroshye ndetse biranahendutse kuruta kwivuza.

Source: www.innerbody.com
[email protected]