Menya byinshi ku kibazo cyo kugira amaraso make mu mubiri

Ikibazo cyo kugira amaraso make mu mubiri kizwi nka Anemia mu rurimi rw’icyongereza cyangwa Anemie mu rurimi rw’igifaransa, hari abavugako ari indwara ariko si ko biri kuko ni ikibazo kibaho bitewe nuko insoro zitukura cyangwa (globule rouge) zabaye nke ku rugero rukabije. Insoro ntuku ni zimwe mu turemangingo twinshi tugize amaraso.

Uku kugabanuka kw’insoro zitukura gushobora guterwa n’impamvu nyinshi ndetse bigatera ibibazo byinshi mu mubiri nkuko turi buzigaragaze. Ikindi ni uko izi nsoro zitukura zigira Hemoglobin ikozwe mu butare bukungahaye kuri poroteyine ibi nibyo bituma amaraso agira ibara ritukura iyo izi hemoglobin zabaye nkeya. Ibi nabyo bishobora guteza ikibabazo cyo kugira amaraso make mu mubiri. Iyi hemoglobin ifite umwihariko wo gutwara umwuka mwiza (Oxygen) iwukura mu bihaha ikawujyana mu bice byose bigize umubiri.

Mbese ni bande baba bafite ibyago byinshi byo kugira iki kibazo

Nubwo kugira amaraso make bishobora kuba ku bantu bose haba abagore,abagabo abana ndetse n’abakuze ariko hari abantu byumwihariko baba bafite ibyago byinshi byo guhura n’iki kibazo twavuga:

- Abagore n’abakobwa bitewe nuko batakaza amaraso menshi mu gihe cy’imihango
- Abagore batwite bitewe nuko mu mubiri haba habayemo impinduka ndetse bakeneye ibyo kubatunga bo ubwabo ndetse n’ibitunga umwana batwite iki kibazo gikunze kubaho cyane mu mezi atandatu ya mbere yo gutwita.
- Abana bakiri bato ndetse n’abantu bageze mu zabukuru kuko ubuzima bwabo buba buri mu kaga.
- Abasanganywe uburwayi bwa karande nabo baba bafite ibyago byinshi byo guhura n’iki kibazo.
- Abarwayi babazwe ndetse n’abandi bantu batakaje amaraso mu buryo bumwe cyangwa ubundi
- Kuba mu muryango ukomokamo harimo abagiye bahura n’ikibazo cyo kubura amaraso(Akoko)
Nkuko tubikesha urubuga rutanga inama ku buzima bw’ikiremwamuntu rwitwa www.webmd.com rugaragaza ko habaho ubwoko burenga 400 bya anemie ndetse banagerageje kubugabanya mu byiciro bitatu, ibyo byiciro bikaba arinazo mpamvu zishobora gutera ikibazo cyo kugira amaraso make.

Izo mpamvu nizi zikurikira:

1. Gutakaza amaraso bitewe n’uburyo bumwe cyangwa ubundi
2. Kugabanuka kw’insoro zitukura zikorwa mu mubiri
3. Gushwanyagurika kw’insorontuku.

Dore bimwe mu bimenyetso byerekana ufite iki kibazo.

 Guhumeka insigane
 Guhorana umunaniro
 Kweruruka mu biganza
 Guhinduka umuhondo mu jisho
 Kugira isereri ukaba wana kwikubita hasi
 Gucika intege mu nteranirizo z’ingingo
Mu gihe usanze ujya ugira bimwe muri ibi bimenyetso ihutire kujya kwa muganga bagufata amaraso yo mu mutsi bakarebako umubare w’insoro zitukura ndetse na hemoglobin niba zihagije bitewe n’ikiciro urimo .

Ibyo wakora ugaca ukubiri ni iki kibazo

Bitewe n’uko twabonye impamvu nyamukuru eshatu zitera iki kibazo ariko zose zigenda zigaruka ku kuba insoro zitukura zidahagije mu mubiri, mu buryo bwo kongera izi nsoro rero icyambere kibanze Ni ukuboneza imirire ukarya indyo yuzuye ndetse hari n’ibiribwa byihariye bibonekamo ubutare bidakwiye kubura kuri burifunguro muri ibyo twavugamo: imboga zitandukanye ariko ukibanda kuzifite ibara ry’icyatsi kibisi kuko zikungahaye kubutare ndetse na vitamine zitandukanye zifasha kongera insorontuku ndetse na hemoglobin. Ntabwo ari imboga gusa kuko hari n’ibikomoka ku matungo nk’inyama,amagi ndetse n’ibyororerwa mu mazi nk’amafi ndetse n’injanga hakaba n’ibindi bihingwa nk’ibishyimbo,ubunyobwa ndetse n’utubuto dutangwa n’ibiribwa nk’imbuto zitangwa n’igihaza. Ibi byose byagufasha guhangana n’iki kibazo mu gihe ufashe bimwe muri byo kuri buri funguro ndetse byaba byiza ubifashe ubihinduranya.

Ikindi tutakwibagirwa kubwira abadukurikira ni uko mu gihe muganga abonako ikibazo gikabije bashobora kukongerera amaraso ndetse hari nindi miti baguha ifasha umubiri gukora vuba insoro zitukura kandi nyinshi mu gihe gito. Ariko kandi gukemura ikibazo wifashishije ibiribwa ni byiza cyane kuko bikurinda izindi ngaruka zishobora guterwa nuko wakoresheje imiti runaka.

Aho byavuye:
- www.mayoclinic.org
[email protected]