Menya Uburyo butandukanye bwo guteka isombe

Isombe ni imboga ziva mu bibabi by’imyumbati, bigifite itoto, uburyohe bwayo bukaba butera benshi kwifuza kumenya uko zitegurwa, uyu munsi tukaba tubazaniye igisubizo mwari mutehereje muri benshi.

Ibikoresho byifashiswa mu guteka isombe

• 1kg cy’isombe
• ½ cy’Umufungo wa puwaro ntoya
• Puwavro 1 nini
• Amababi 5 ya sereri
• Ibitunguru 2 by’umutuku
• Utuce 10 twa tungurusumu
• ¼ kg y’amavuta y’amamesa
• Ikibiringanya 1
• Inyama z’Imifupa ½ kg
• Onja 2
• Gout 2
• Maggi y’isombe
• ¼ kg cg ibiyiko 3 binini by’ Ifu y’ubunyobwa
• Amazi 4l

Isombe ni ifunguro riva mu bibabi by’imyumbati, bikiri bitoto nyuma bigasekurwa neza. Aha, hari abahitamo kuyisekurana n’ibirungo ikenera byose. Iryo funguro rikenera amamesa, igitunguru, ifu y’ubunyobwa cyangwa iy’ibihwagari. Ku birebana no gushyiramo inyanya, ntibivugwaho rumwe. Hari abavuga ko isombe irimo inyanya ipfa vuba kandi igakururuka. Abandi bavuga ariko ko ntacyo inyanya zitwara isombe.

Uburyo bisanzwe

Nyuma yo gusukura isombe, kuyisekura no kuyishyira mu nkono, hakurikiraho kuyirengeza amazi, Yamara gucanirwa nk’amasaha abiri igashyirwamo amamesa n’ umunyu wa Gikukuru, hagakurikiraho gucanira ku kariro gacye, kongeramo ifu y’ubunyobwa no gukomeza gucaniriza umuriro mucye kugeza bihiye. Byose birangiye, ni byiza kuyigabura ishyushye.

Isombe ishobora gutekanwa n’inyama cyangwa imifupa. Isombe igomba gutekwa idapfundikiye kugira ngo kurura bigabanuke. Kera, hari abasekuraga isombe nyuma bakayigereka ku bishyimbo. Iryo funguro ritangirwa ubuhamya n’abaririye ko ryabaga ari ntagereranywa.

Uburyo bwo kubanza kubabura cg gupepura

Tegura isombe zigitoshye. 1kg cy’isombe cyahwana n’imifungo minini 5 cyangwa 6. Zitotore, uzishyire mu mu isafuriya nini cyane kugira ngo amazi azigereho neza. Zironge gatatu n’amazi akonje uhindurira mu yindi safuriya utaminina amazi kugira ngo imicanga isigare hasi. Fata amazi yabize uzisukeho nizigerwaho zose uhite uzikuramo, singombwa kuzitinzamo, ahubwo bizagufasha mukunoga vuba.

Zisekure nk’iminota 30 ku muntu ufite imbaraga kandi utarekeraho ziraba zinoze Katiramo tungurusumu, puwavuro (poivron), seleri, na puwaro wongere usekure akanya gato , Ibi birungo ubishyiramo zanoze kuko iyo ubishyizemo mbere bibyara amazi ntubashe kumenya niba isombe zanoze, Sekura rero ugeze ku kigereranyo ushaka hari abakunda izimeze nk’imboga hari n’abakunda izinoze cyane. Nyuma y’aha rero uhite uziteka.

Abandi nyuma yo kuzironga bazishyira ku ikarayi bakamera nk’abazikaranga ho gato, ibi bikaba bituma zishiramo urubisibisi kandi zigasekurika neza. Hari n’abazikaranga mu mavuta make mbere yo kuzisukamo amazi ashyushye no gucanira ibi bikaba bikorwa n’ababa bazisheshereje ku isoko.

Uko zitekwa hashyizwemo imifupa

Fata imifupa uyoze neza uyikatemo uduce turinganiye uzishyire mu mazi akonje nka litiro 3 ushyire ku muriro waka cyane, zimaze kubira cyane shyiramo isombe wateguye Nibyongera kubira cyane katiramo, shyiramo ibitunguru n’ikibiringanya, hanyuma ugapfundikira hashize iminota 45 zibira cyane reba uko bimeze wongeremo amazi ashyushye nk’ibikombe bibiri, ureke byongere bibire cyane Nibimara gutogota shyiramo amavuta, maggi sombe, onja na gouts, ukongera ukabireka iminota 45 ukagabanya umuriro kugirango amavuta ashye neza.

Niba ushyiramo ubunyobwa bushyiremo nyuma y’iyo iminota 45 ubushyire hejuru ntuhite uvanga kuko iyi uvanze birashirira, ukareka nk’iminota 20 ubunyobwa bugashya noneho ukavanga. Ushobora kugenda wongeramo amazi ashyushe make make bitewe n’uko wumva zihiye cyangwa uko uzishaka.

Ibanga : Ni byiza gutekera isombe mu isafuriya nini aho isombe ziri butogote zisanzuye Ni byiza kandi kubahiriza igihe ushyiraho umuriro mwinshi cyane n’igihe cyo kuwugabanya.
Bitegurane n’umuceri udakaranze cyangwa se ubugari. Src: ubuzima.rw