Mbese imfatiro zose zisenywe, wowe nk’umukiranutsi wakora iki ?


Urufatiro ni ijambo ry’ikinyarwanda, risobanura inkingi fatizo ikintu runaka cyangwa umuntu afatiyeho ubuzima bwe. Bishatse kuvuga ko iyo urufatiro rutakiriho ubuzima nabwo butabasha gukomeza.

Abantu mu isi rero bagira imfatiro zitandukanye. Ni ukuvuga ko bagira uburyo bwinshi bwo kubaho, cyangwa bishingikirizaho kugirango ubuzima bukomeze kandi neza.

Hari zimwe mu mfatiro zikunze kugaragara mu bantu.

Urugero :
- Umugabo ashobora kuba urufatiro rw’umugore we, cyangwa umugore akaba urufatiro rw’umugabo we.
- Ababyeyi bashobora kuba urufatiro rw’abana, kimwe n’uko hari ubwo abana bakura abagahinduka urufatiro rw’ababyeyi babo.
- Akazi umuntu akora gashobora guhinduka urufatiro rwe.
- Umukoresha wawe ashobora kukubera urufatiro.
- Inshuti z’umuntu zamubera imfatiro.
- Idini umuntu asengeramo ryamubera urufatiro. Ni byinshi.

Abanyarwanda bakunze gusakuza (Gusaakuza) ngo : « Tuvuyemo umwe twashira » Bagasubiza ngo : « Ishyiga ry’inyuma. »

Babaga bashaka kugaragaza mu buryo buzimije, ukuntu hari ikintu umuntu ushobora gutakaza ubuzima bukamera nk’ubuhagaze. Ubusanzwe amashyiga ya kinyarwanda aba ari atatu. Birumvikana ko amashyiga arenze atatu ashobora gufata isafuriya ibiryo bigashya, ariko munsi y’atatu ntibishoboka. Igikomeye si aho riherereye imbere cyangwa inyuma, ahubwo igikuru ni umubare w’amashyiga.

Turi kuganira ku kibazo kigira kiti : « Niba imfatiro zishenywe umukiranutsi yakora iki ? » Zaburi11 :3

Bavandimwe tubwizanye ukuri, nta muntu n’umwe ushobora guhagarara adafite imfatiro. Imfatiro zo guhagarara ni amaguru, utayafite kugira ngo ahagarare bisaba ko ashaka izindi mfatiro zisimbura amaguru (Imbago). Bisobanuye ko umuntu wese mu buzima agira ikimubeshaho, yego biba bitandukanye ariko buri wese agira urwe rufatiro.

Hari igihe umuntu atabigiramo uruhare. Urufatiro ufite ushobora kuba atari wowe waruhisemo, ariko ubuzima bugatuma urwakira kuko nta kundi wabigenza.

Urugero : Ubukene butuma ukora akazi utashakaga, hanyuma muri ako kazi ugasanga kugira ngo ukagumeho hari umuntu runaka uba ugomba kwitwararika mu buryo bw’umwihariko, wabyemera utabyemera kuko ari we ufite ijambo rya nyuma ryo kuguha akazi cyangwa kukwirukana.

Nta kundi, urihangana ukagakora kuko urwo rufatiro ruvuyeho inzara ntiwayikira.
Ndabibutsa mujye mwihangana, igisobanuro cyo kuba mu isi ukijijwe ni ukwizera kandi kwizera ntibishoboka mu gihe cyose hatariho kwihangana. Uwihangana akageza imperuka niwe uzakizwa (Matayo 24 :13) kandi nimwihangana muzakiza ubugingo bwanyu. (Luka 21 :19)

Si n’umukoresha gusa, hari n’umuntu uhura nawe mu buzima kubera intege nke zawe akakubera urufatiro muri byose, mbega umutima wawe ukakwongorera ko utakimufite kubaho byakubera ingume. Kandi koko kumubura bishobora kuba ingorane zikomeye kuri wowe. Ariko se ko uwo ari umuntu upfa cyangwa waguhinduka igihe icyo aricyo cyose, nibigenda bityo, uzakora iki ?

Izi mfatiro zose uko twazitanzeho ingero ndetse n’izindi tutavuze, zibasha gusenywa igihe icyo ari cyo cyose, none umukiranutsi yakora iki ? Yavuza induru se ? Byo se bya mu marira iki ?

Yakwiheba se agahora mu maganya ? Byo se byamugeza kuki ?

Yahinduka umunyabinyoma se agatangira kubaho ubuzima bwo guteka imitwe ? Ko ataba akiri umukiranutsi se ?

Yakwiyahura se ? Uwiyahura se ko ari umwicanyi kandi ko nta juru ry’abicanyi ?

Muvandimwe ngufitiye igisubizo cyiza mu ijambo ry’Imana. Imfatiro zose zibasha gusenywa, ariko hariho urufatiro rutabasha gusenywa na rimwe. N’ubu nkubwira ibi rurahagaze kandi rwanditse ho ngo : Uwiteka azi abe. Niba nawe uri uwe arakuzi komera imfatiro zibasha gusenyuka ariko uru rufatiro ntirujya rusenywa.
2Timoteyo 2 :19.

Dore impungenge mfite, abantu benshi uru rufatiro ntibemera kurufataho mu gihe gikwiye, barabanza bagafata imfatiro zabo zamara gusenywa bakabona kuza ku rufatiro rw’ukuri. Kandi ntibitangiye ubu, ni ibya cyera, kuko no mu gihe cyo kuza kwe yaje mu be ariko abe ntibamwemera icyakora abamwemeye bakizera izina rye, yabahaye ubushobozi bwo kuba abana b’Imana. (Yohana 1 :12).

Abakirisitu benshi ntibemera ndetse ntibanizera Yesu ahubwo bamufata nk’uza nyuma y’abo bemera cyangwa bizera. Bivuze ngo iyo babuze uko bagira bapfa kumusanga. Birababaje!

Dore impamvu: Iyo ibibazo bije ni nde ubwira mbere? Iyo hari ibkugoye ni nde ubwira mbere ? Bamwe babanza kubwira abo bashakanye, abandi ababyeyi babo, abandi inshuti n’imiryango ikize, aho hose kuko ari imfatiro zisenyuka byamara kunanirana bakajya babona kuza kuri Yesu.

Yesu ashaka ko tumugira uwa mbere, tukamuha icyizere ko ashobora gusubiza ibibazo byose duhura nabyo mu buzima.

Ayo makosa ushobora kuba warayakoze igihe kinini, ariko ndagusabye niba waramaze gusogongera ukabona ko agira neza, ari we rufatiro rudasenyuka, mugire uwa mbere mu buzima bwawe uzabona inyungu yabyo, hanyuma imfatiro nizisenywa ntacyo uzaba kuko wubatse ku rutare nka ya nzu y’umunyabwenge itanyeganyezwa. Rwa rutare yubatsweho burya ni Yesu. (Luka 7 :24…)

Nusoma mu rwandiko rwa 1 rwanditswe na Petero 2 : 3-4, urahasanga abubatsi bishingikirije ku mabuye yabo bahinyura ibuye rimwe, nyamara nyuma baje gusanga ari ryo rikomeza imfuruka. Iri ni ibuye riva kuri rwa rutare, ni Yesu Kirisito Umwami wacu.

Niba umaze kumenya ibi rero hindura uburyo wabagaho, Yesu umugire urufatiro rwa mbere mu buzima bwawe, nibwo uzabasha gushikama kuko IMFATIRO NIZISENYWA, WOWE NK’UMUKIRANUTSI NTACYO BIZAGUTWARA KUKO UZABA UFASHE KU RUFATIRO RUTANYEGANYEZWA ARI RWO YESU KIRISITO.


Mbifurije gukomera ku rufatiro rw’ukuri, Amen !

Niyondora Vedaste Christian @agakiza.org