MFASHA DUSENGERE ABABESEMAHA BO MURI INDONEZIYA

“Ibisarurwa ni byinshi, ariko abasaruzi ni bake. Nuko rero mwinginge nyir’ibisarurwa, yohereze abasaruzi mu bisarurwa bye.” (Mat.9:37-38)

Mu rwego rwo kwifatanya n’abantu benshi hirya no hino ku isi mu gusengera amoko ataragerwaho n’Ubutumwa Bwiza, mfasha kuri uyu wa kabiri tariki ya 20 kamena 2017 dusengere Ababesemaha bo muri Indoneziya (Aziya).

Muri Indoneziya habarurwa abagera ku 740.000, usanga ari naho honyine babarizwa mu buryo buzwi. Hejuru ya 90% byabo ni Abayisilamu; nubwo bimeze gutyo usanga bacyuhaba ibishusho binini bibajwe mu mabuye mu buryo busa no guterekera abakurambere babo.

Isezerano Rishya ndetse na zimwe mu mfashanyigisho bya Gikristo byamaze gushyirwa mu rurimi bavuga. Inyigisho ziri mu buryo bw’amashusho n’amajwi ( nka filimi ya Yesu) ni bumwe mu buryo bw’ingenzi bushobora kwifashishwa mu kugeza ubutumwa mu Babesemaha .

INZITIZI

Nubwo ari itsinda rinini , usanga abizera Yesu Kristo ari bake cyane.

IBYIFUZO BYO GUSENGERA

• Imana ihagurutse Abakristo bo hirya no hino ku isi kujyana Ubutumwa Bwiza mu Babesemaha.
• Haboneka Bibiliya yuzuye mu rurimi rwabo.

• Umwuka Wera agenderera imitima yabo, kugira ngo bahishurirwe Kristo; ndetse abatere n’ishyaka ryo kumva ubutumwa bwiza mu buryo bw’amajwi n’amashusho byamaze guhindurwa mu rurimi rwabo.

IJAMBO RY’UMUNSI

“Hahirwa ishyanga rifite Uwiteka ho Imana yaryo, Ubwoko yitoranirije kuba umwandu we.” ( Zaburi 33:12)

Ushobora gusangira aya makuru n’inshuti zawe wifashishije imbuga nkoranyambaga nka www. facebook.com, cyangwa se ubundi buryo bukoroheye, kwigomwa umwanya naho waba ari muto ukazirikana abatarumva Ubutumwa Bwiza mu buryo bw’isengesho ni iby’igiciro cyane mu maso y’Imana. Imana iguhe umugisha!

Ku babasha kumva ururimi rw’Icyongereza mushobora gukurikira gahunda ya buri munsi yo gusengera amoko atarumva Ubutumwa Bwiza kuri http://www.unreachedoftheday.org/ cyangwa http://www.cornerstonenc.org/unreached-of-the-day/

Ange Victor UWIMANA
[email protected]
(+250)788552883/ (+250)725151463