Kwifatanya n’Imana bitera kurama/ EV Emmanuel NKURUNZIZA

Dusome: Gutegek 4:4; Ariko mwebweho, abifatanije n’Uwiteka Imana yanyu muracyariho mwese uyu munsi

Abashakashatsi b’abahanga mubya Bibiliya bavuga ko iki gitabo cyo Gutegeka kwa kabiri cyanditswe na Mose mu Mwaka w’ i 1410 MK.

Ubusanzwe kirimo ibice bine by’ingenzi:

1. Mose yibutsa Abisiraheri iby’Urugendo.

2.Ubuhamya bw’ibyababayeho murugendo,

3. Mose yongera kwigisha iby’amategeko cumi, kandi ababwira ko bakwiye kwitwara nk’ubwoko bwatoranijwe.

4. Abasobanurira iby’imigisha n’imivumo bizabageraho bitewe nuko bazitwara bageze mu gihugu.

Aya magambo avuga ngo “Ariko mwebweho abifatanije n’Uwiteka Imana yanyu muracyariho mwese uyu munsi “Urubyiruko rw’Abisiraheri rwayabwiwe bigishwa ibyo k’Umusozi wa Sinayi, nyuma yuko Abisiraheli batari bake bari bamaze gukora ibyangwa n’amaso y’Imana, usomye mu kubara 25, usanga barakoze ibyaha byinshi ndetse basenga n’ibigirwamana.

Kubara 25:3; Abisiraheri bifatanya na Bali y’i Pewori, bikongereza uburakari bw’Uwiteka. Mose afata umwanzuro ko bagomba gupfa,

Kubara 25:5; Mose abwira abacamanza b’Abisiraheli ati”Umuntu wese muri mwe yice abo mubantu be bifatanije na Bali y’i Pewori

Nyuma yuko abo bamaze gupfa, nibwo habayeho kwegeranya abasigaye, bababwira amateka y’abantu bifatanije n’ibigirwamana Imana ikabahana, ikabakura hagati muribo.
Maze barabwirwa ngo “Ariko mwebweho, abifatanije n’Uwiteka Imana yanyu muracyariho mwese uyu munsi” bababwiraga ko kuba bariho ntabwo ari imbaraga z’ibisekuru by’iwabo, kuba bariho ntabwo aruko bafite ifeza n’izahabu, kuba bariho ntabwo aruko bafite imbaraga nyinshi, kuba bariho ntabwo ari imbaraga z’amashuri bize, ahubwo kuba bariho nuko bari barifatanije n’Imana.

Umugabo umwe w’umukire yagiye gupfa abwira umukobwa we ati” Nindamuka mfuye muzampambane 20,000$, amaze gupfa umukobwa abibwiye Musaza we ngo babikore aramubwira ati uri umusazi, Zana Carne de cheque, Vieux(Muzehe) tumwandikire Cheque ya 50,000$ nabona umwanya azajye kubikuza.

Abantu bifatanya n’amafranga bigatuma bahindura ingendo, abandi bagahindura inyito, abandi bagahindura indoro, abandi bikabatera kumva basuzuguye abaremwe bose, ariko amafranga mwakwiriranwa ntimurarane cyangwa mwararana ntimwiriranwe, ariko kwifatanya n’Imana byagutera kurama iteka ryose.

Kwifatanya n’Umuntu byagira Umumaro akiriho yavaho aho yagushyize bakahakwirukana nta nteguza, kwifatanya n’amashuri byagira umumaro ureba wahuma bigata agaciro,

Kwifatanya n’imbaraga z’umubiri byagira Umumaro uri kumwe nabo uzirusha haza abazikurusha nawe ugaseba, kwifatanya n’uwo mwashakanye byakunda mukiriho, umwe yavaho undi akagubwa nabi,

Ibyiringirwa byose bigira agaciro mu gihembwe kimwe mukindi bikagata, kandi ibyiringirwa byahindura imibereho ikaba myiza, byaguhesha amahirwe abaturanyi cyangwa abo mwareranywe batabonye, ariko ntabwo byakugeza mu rurembo rw’ijuru.

Ariko Imana yacu ntipfa, ntisaza ngo yitwaze akabando, nticuyuka, kwifatanya nayo byagutera kurama iteka ryose, ukiri ku isi ukagubwa neza, kandi ukazajya no mu Ijuru ry’Abera.Ukeneye kubaho neza?Ifatanye n’Imana Data.

Ni iki usabwa kugirango wifatanye n’Imana ?

Petero we byaramurenze avuga neza mu Ibyakozwe n’intumwa10:34-35 ngo “Menye neza ko Imana itarobanura k’ubutoni, ahubwo mu mahanga yose uyubaha agakora ibyo gukiranuka iramwemera”.

1. Kwifatanya n’Imana ntibisaba kuba uri intyoza mu magambo

, Kuva 4:10 Mose yahakaniye Imana ko atazi kuvuga neza ishaka kumutuma, Kuva:4:11 Imubwira ko ariyo yaremye akanwa k’umuntu, umurongo wa 12, imubwira ko izajya ibana n’akanwa ke.

2.Kwifatanya n’Imana ntibisaba kuba uri Umuntu wemerwa cyane mu muryango
w’iwanyu

Dawidi yimikishwa amavuta, bene se nibo bari bemewe, dore ko na Samweli yari yahisemo Eliyabu, Imana iramugaya kuko nubwo Dawidi yari mu ishyamba anuka urushyambashyamba ariko Imana yamubonagamo umutima wa gishumba.

3.Kwifatanya n’Imana byagutera kuramira imbere y’umubisha wawe

1Samueli:18 Ubwo Dawidi yasingizwaga na rubanda avuye ku itabaro, yishe inzovu Sawuli yishe ibihumbi,1Samueli 18:11 Sawuli amutera icumu ashaka kumwica, kuko yabonaga ko amaherezo yazamusimbura(Ishyari) Imana ishoboza Dawidi kwizibukira ntiryamufata, k’umurongo wa 12, ngo nuko Sawuli atinya Dawidi kuko Uwiteka yari kumwe nawe, kandi akaba atandukanye na Sawuli.

Ategura kumushyingira umukobwa we, Merabu bamaze kumutwara bamuha Mikali ariko akamukosha ibinyita ijana by’abafirisitiya, yifuzaga ko azajya kurwana ashaka inkwano y’ibinyita ijana bakamwica adashyingiwe!

4.kwifatanya n’Imana byayitera kugutangira ibitambo ukongera ukabaho.

Nyuma yo kumushyingira Mikali, Sawuli yashatse kwicira Dawidi iwe murugo,1Samueli19:12 Mikali yahise ahungisha Dawidi ajya i Nayoti i Rama, arangije afata igishushanyo cya Terafimu yabo, akirambika k’uburiri abaje guhiga Dawidi bahasanga Terafimu, aha mbibutse ko Imana ijya itanga ingabo nyinshi zigapfa ku bwacu, Imana yatanze Terafimu bayitera amacumu Dawidi yibereye i Nayoti y’i Rama,

Nawe Imana yatanze Terafimu muri Sale d’operation barayibaga Dawidi witahiye, Imana yatanze Terafimu bayiha amarozi bategereza ko uzatumba ugaturika baraheba Dawidi wigendeye,

Imana yatanze Terafimu barayifunga ugarukira k’umuryango inzandiko zikurega ikibi ziratwikwa Dawidi wigendeye,

Imana yatanze Terafimu barayizinga bazi ngo ni wowe bazinze bashiduka washyingiwe,

Sawuli abonye ko abo yohereje kumwicira i Nayoti y’i Rama barimo kumuhanurira ihererekanya bubasha (Handover Report) rye na Sawuli, nawe yigirayo (1Samueli:19:23) nawe yahise amuhanurira, kwifatanya n’Imana bitera Dawidi kuramira imbere ya Sawuli.

Imigani:16:7 Iyo imigenzereze y’Umuntu inezeza Uwiteka, atuma n’abanzi be buzura nawe.

Kwitandukanya n’Imana byo byakuzanira ishyano nka Nebukadinezari, (Danieli 5) amaze kwiyemera ko yiyubakiye Babuloni n’amaboko ye, Imana imaze kumwohereza kurisha nk’amatungo mwishyamba,

K’umurongo wa 31, aravuga ngo nyuma y’iyo minsi, njyewe Nebukadinezari ngarura akenge, birashoboka ko waba hari icyagutandukanije n’Imana, ariko ndakwifuriza kugarura akenge bigishoboka kuko kwifatanya n’Imana byonyine nibyo byagutera kurama, naho kwitandukanya nayo byagukenya.

Nkaba nsoje mbifuriza amahoro y’Imana, kandi mbasaba kwifatanya n’Imana kuko aribwo muzahirwa, kandi mbasaba ko umuntu wafashwa n’ubu butumwa yadufasha no kubugeza kubandi.

[email protected]