Kutirinda ku bakobwa ngo byaba bifitanye isano n’isenyuka ry’ingo muri iki gihe?

Nk’uko inyigo yakozwe n’ikigo “Institute for Family studies”, yasohotse mu minsi ishize ibivuga, Abakobwa bashatse bakiri amasugi nibo bafite amahirwe menshi yo kudatandukana n’abagabo, nyuma y’imyaka 5 babanye. Iyo nyigo kandi yerekanye ko abakobwa bashyingiwe guhera mu mwaka wa 2000, barabonanye mbere y’uko bashaka n’abagabo bageze kuri 2, bahura nyuma y’imyaka 5 n’ikibazo cyo gutana n’abagabo babo ku rwego rumwe n’abari barahuye mbere y’uko bashaka, n’abagabo 10 cyangwa barengaho.

Impamvu z’ibi byose ziraturuka ku kudohoka kw’ababyeyi ku ndangagaciro z’umuco, cyane cyane ku zerekeranye n’ibyo guhuza ibitsina. Abantu benshi muri iki gihe bafata imibonano mpuzabitsina mbere yo gushaka nk’ikintu gisanzwe, benshi baba biteguye kuba baba barabikoze nka kabiri cyangwa gatatu, mbere yo gushaka.

Ubushakashatsi bwari bwakozwe mbere y’ubu, bwagaragaje ko gukora imibonano mpuza bitsina kenshi mbere yo gushaka, biganisha ku mibanire itarimo umunezero, kandi bikongera amahirwe (risque) yo gutandukana ku rwego rwo hejuru. Abagabo benshi bo muri Amerika ubu bajya gushaka batizeye ko uwo bagiye gushakana nawe ari isugi. Icyo ni ikintu n’abasore wumva barakiriye ko ariko bimeze. Ikindi cyagaragaye nuko benshi mu bakobwa bashatse bakiri amasugi cyangwa se baragize imibonano mpuzabitsina mike, batangaje ko kimwe mu byabafashije kwifata ari uko bafite “Ukwemera”(Imana), bakaba bajya gusenga. Benshi mu masugi, ngo ni babandi usanga bakunda kujya gusenga nibura nka rimwe mu cyumweru.

“Ikindi kigaragaje nuko kuva mu mwaka wa 1990 kugeza muri 2000, abakobwa b’amasugi bubatse ingo, umubare munini ari uwabasenga Imana, kandi ngo muri icyo gihe umubare w’ingo zitandukana wagiye ugabanyuka. Ibyo bigaragaza ko mu ngo z’abantu bajya kenshi mu nzu y’Imana, ariho hagaragara ubutane bwo ku kigero gito.” Uwo ni Wolfinger ubivuga, yanatangaje ko atarabona ubusobanuro nyabwo bw’impamvu, abakobwa bahuye n’abagabo babiri bahura n’ingorane zo gutana kimwe n’abahuye n’abagabo benshi.

Ikindi cyagaragaye nuko abantu bakuze batabana n’ababyeyi babo bombi, aribo bahura, n’abo bahuza ibitsina benshi, bityo akaba ari nabo bahura cyane n’ibibazo byo gutandukana.

Nubwo umuntu atafata umwanzuro koi bi bishimangira ukuri ijana ku ijana ry’ibibera hiruya o hino ku isi, ariko na none umuntu yavuga ko kutirinda kw’abakiri ingaragu kwa hato na hato gushobora kuba intandaro y’isenyuka ry’ingo zo muri iki gihe, ibintu bifata intera ikabije uko iminsi igenda ishira haba mu bantu muri rusange ndetse n’abakristo hirya no hino ku isi.

Ni byiza ko uburere bwitabwaho cane n’ababyeyi ndetse n’abanti bose bafite aho bahurira no kurera ariko na none ipfundo ry’ingo nziza umuntu yatanga ni Ukubaha Imana, kuyiyoza inzira kuko ibyo umuntu yakora byose hatarimo Imana bishobora kudatanga umusaruro ukwiye.

Bibiliya isobanura ko Uwiteka atari we wubaka, abubatsi baruhira ubusa, atari we kandi urinda abarinda babera amaso ubusa. Imana ishoboze umuntu wese guhagarara mu mwanya imwifuzamo kugira ngo twubake imiryango myiza, itorero ryiza ndetse bizafasha no kugira igihugu gifite ejo hazaza.

MITALI Adolphe