Kuki abatubaha Imana bagereranywa n’ihene ziri mu ntama?

Amahanga yose azateranirizwa imbere ye, abarobanure nk’uko umwungeri arobanura intama mu ihene. Matayo 25:32

"Umuntu witwa umukirisitu kandi adakijijwe ni uwo kubabarirwa no gusengerwa, agira imvune nyinshi z’ubusa kandi avuna abandi benshi.

Kuki Bibiliya ivuga ko bazarobanurwa nk’uko umwungeri arobanura intama mu ihene?

Hari imwe mu mico iranga iri tungo rigufi ryitwa ihene ijya gusa n’iyuyu muntu uba mu rusengero kandi adakijijwe. Umuntu ufite iyo mico wese azarobanurwa nk’ihene, ntabwo azagera mu bwami bw’Ijuru.

Dore imwe mu mico y’ihene isa n’imico y’abantu biyita abakirisitu ariko batarahindutse kuko babihakanisha ingeso zabo:

1. Ipfukamira ubusa ndetse yakobotse amavi (Ntisenga)

Ihene ihorana amavi akobotse kandi nta busobanuro bufatika buhari butuma amavi yayo akoboka, kereka gusa kuyakubita hasi ijya kuryama cyangwa irwana no kwikura ku kiziriko kandi ntibiyishobokera, gupfukama kwayo biyikoborera amavi gusa ariko nta kindi gifatika biyimarira.

Hari abantu bahora bapfukamye ubabona akagira ngo bari gusenga kandi badasenga, kuko amasengesho yabo ntacyo ahintura ku ngeso zabo. Bakora ibyaha amanywa n’ijoro kandi ibyo kwihana no kureka ibyaha ntibabikozwa, ahubwo bishakira inyigisho zihwanye n’irari ry’imitima yabo. Aya mavi yabo akobokera ubusa nk’ay’ihene.

2. Ntiyizera shebuja kuko iyo imvura ikubye irasakuza

Ihene irasonza ikahurwa, kandi uyahura ayihitiramo ahantu heza kuruta ahandi, kandi aba ayizirikana kuko igihe cyose abonye bikwiye aza kuyicyura. Nyamara yo ntimugirira icyizere na rimwe kabone n’ubwo yaba imubona hafi yayo, iyo ibonye imvura ikubye ivuza induru nk’ipfuye, kandi hari n’ubwo ivugiriza ubusa induru nyirayo akayireka ikanyagirwa kandi ntipfa. Iyo imvura ihise ubuzima burakomeza.

Ikibazo nta kwizera igira igihe cyose igize icyo ikenera ivuza induru (irahebeba) kandi nyamara nuko itabizi nyirayo aba azi icyo ari buyikorere.

Hari abantu batajya bizera Imana, Bisanze ku isi ndetse bisanga mu migisha barimo, ibyo byose byakozwe n’Imana kandi ntaho yagiye irahari, ariko ikibazo gito gusa kitari n’umwihariko ahubwo kiri rusange ku bantu, gituma batakariza Imana icyizere bakayituka, bakayivaho, abandi bakimika izindi Mana, bakajya mu bapfumu n’ahandi.

Nyamara Imana yo ihora izi ibyiza izagirira abantu bayo kuko n’ibigoye banyura mo byose iba yabyemeye. Iyo iciye ikiziriko ntitaha ijya kona (Iyo icyakumiraga bene abo bantu kivuyeho bahita akora amahano) Uzarebe umubare munini w’abava mu bihugu bajya mu bindi, abagumana indangagaciro za gikristo bajyanye ni mbarwa.

3. Ihene ntijya yemera kuyoboka, ntikurikira umwungeri wayo.

Ihene kugira ngo ugire aho uyijyana bisaba kuyizirika ukayikurura inyuma yawe. Igira amatwi ariko ntiyumvira. Abanyarwanda baciye umugani ngo: "Amatwi y’ihene yumva ahiye" buri gihe iba ishaka gukora ibyo yishakiye kandi ibyinshi bituma ihura n’ingorane. Irona bakayikubita, hari n’ubwo irisha ibiyica (Nk’ibibabi by’imyumbati), iyo icitse gato uyiragiye, ibibazo bihita bivuka kuko iba igiye kwiyobora kandi ubwenge bwayo ni bukeya hafi ya ntabwo, ibyo rero bikayigiraho ingaruka mbi idasize na nyirayo.

Hari abantu bitwa abakirisitu ariko batemera namba gukurikira Kristo uwo bitirirwa.
Gukurikira Kristo ni ukwemerera Umwuka wera w’Imana ukakuyobora. Ariko abo bo ntibemerera Umwuka wera ko abayobora, bariyobora ubwabo, n’iyo Imana ivugana nabo ntibayumvira, bahora bifuza kwiyobora, ibindi bakabyita gukabya no kubura ubwenge.

Birata ubwenge bwabo bagahinyura ubw’Imana kandi aho bajya ntibaba bahareba mu gihe Imana yo imenyera iherezo mu itangiriro, ariko bakanga ko ibayobora bagakora ibyo bishakira. Ibi bibagiraho ingaruka ubwabo ndetse bikanababaza Imana cyane, ariko kuko ari inyemababazi ikomeza kubarwanirira intambara nyinshi, zaba izo bazi n’izo batazi, nk’uko nyirihene akomeza gukurura n’aho yaba itabyemera.
Icyitonderwa : « Si ko bizahora, igihe kizagera intama zijye ukwazo n’ihene ukwazo ».

4. Ihene ntiyambara ngo yikwize

Nta rugingo intama igira ihene itagira, ariko ihora yambaye ubusa, unagerageje kuyimanurira umurizo ngo uhishe ubwambure bwayo nk’uko andi matungo abikora irataka cyane bigaragara ko uba uyibangamiye.

Inyigisho ivuga ko agakiza ari mu mutima gusa, uwabizanye n’ubwo ntamuzi ariko wese yakoreshejwe na satani kandi Imana izamuhana. Ntabwo wahinga ipapayi ngo usarure avoka, imbuto umuntu yera nizo zihamya uwo ari we. Kandi ntabwo imbuto zera mu giti, imbuto zera ku giti inyuma ahagaragarira buri wese.

Uzabona abantu muri iki gihe bambaye utwenda tw’urukozasoni kandi usange bavuga ngo barakijijwe, ngo agakiza kaba mu mutima gusa. IBI NI UKUBESHYA. Biba mu mutima bikagaragara ku mubiri. Ikibabaje abenshi uzabasanga mu baririmbyi, abandi mu badiyakoni yewe hari n’abadatinya kubyambara bitwa ngo ni abashumba b’amatorero (Amadini) cyangwa abagira imyanya y’imbere ku ruhimbi. Hamwe usanga umubyeyi/Umukobwa yambaye akenda ku buryo kwicara cyangwa kunama ngo agire icyo afata hasi bisaba abo bari kumwe guhisha amaso kubera isoni z’ubwambure bwe.

Agakiza katabwiriza umugabo/umusore kuzamura ipataro ngo yambare neza cyangwa ngo yambare imyenda imukwira kandi atabuze ubushobozi, si agakiza ni umuco usa n’uw’ihene. Kwikwiza si byo bihamiriza abantu ko umuntu akijijwe ariko kandi kwambara ubusa byo ni ikimenyetso simusiga cy’umuntu udakijijwe.

5. Uretse gusa iryamye nabwo isinziriye, ntihagarara ituje iba ikubagana.

Ihene igihe cyose iba izenguruka ikubagana ntijya ituza, kandi izenguruka idafite aho igiye, ijya aho ibonye hose ntigira umwanya wo gutekereza ku cyo igiye gukora, kandi mu kutaba hamwe kwayo iyo igize icyo ihura nacyo iracyangiza

Hari abantu batazi kwitonda mu buzima bwabo, bahora bazenguruka. Ngabo mu matsinda yo kunegura abandi, ngabo mu magambo yo gusenya, yewe no mu materaniro ntibatuza. Bahora bakubagana buri mwanya baba bafite ibyo bavuga. Barahubuka cyane ari naho hava amakimbirane ya hato na hato, ntibagira umwanya wo kwitekerezaho no gutekereza ku cyo bagiye gukora cyangwa kuvuga. Uzasanga babaho ubuzima butagira intego.

6. Isekurume y’ihene ibuza izindi amahwemo yewe na nyina ntiyitinya

Ihene y’isekurume, ntishobora kwihangana ireba inyagazi, kereka irwaye. Ihora izurira izibuza amahwemo ntituma zirisha naho wayikubita iziyimugaza, ni ko ibaho kandi ntijya inyurwa n’aho yaba imaze kubangurira ako kanya mu mwanya muto gusa iba yasubiriye.

Abantu b’ubu ntibagitinya ubusambanyi, biteye ubwoba. Abagabo bamwe ntibanyurwa n’abo bashakanye, bahora bazenguruka mu bagore yewe no mubana bato bageramo. Kandi n’abasore ni uko, gusambana babigize nk’umukino. Kuburyo badatinya n’ababaruta, aho umuhungu w’urubyiruko adatinya guhangara umubyeyi wamubyara, ibi kandi ni zimwe mu mbuto ziva muri kwa kwambara ubusa twavugaga hejuru ngo nibwo busirimu.

Uretse ko ubu byahindutse, ntibikereba abagabo/abasore gusa n’ababyeyi/ abakobwa nabo basigaye biteretera abo basambana. Hari umunsi aba bantu Imana izabashyira mu ihene kuko bahuje imico nazo.

7. Ihene yanga umuti cyane, kuwuyiha ni ukurwana nayo.

Kugira ngo uhe ihene umuti bisaba kuba ufite imbaraga zihagije rwose. Ntabwo yemera kandi nyamara uba uyigirira neza.

Ni ko abantu benshi bitwa abakirisitu badakunda ijambo ry’Imana n’impuguro. Muri iki gihe iyo uhuguye umuntu, mbere yo kumva ko yakosheje abanza kumva ko umusuzuguye ibikunze kwitwa ngo “Kunyuzamo ijisho”, ahita yerekana uburyo yahohotewe. Mu mwanya wo kwihana yerekana ko bamuhuguye nabi. Nabyo bibaho ariko yari akwiye kubanza gukosora icyo aregwa hanyuma nawe akabona guhugura mugenzi we ngo ubutaha ajye abikora neza. Kandi akenshi uvuga ko yahuguwe nabi we noneho abivuga nabi kurushaho, hari n’abadatinya gutukana ndetse rimwe na rimwe bakaba banarwana.

Abandi nabo iyo mu rusengero byashyushye akaruru ari kose, bumva nta cyiza nk’icyo. Ariko iyo umwanya w’ijambo ry’Imana ugeze, sinzi ikibibwira abantu batari aho, kuko abatabahamagaye ku materefone mbere hose ni bwo babahamagara. Abandi baba babonye umwanya mwiza wo kuganira, ku mbuga nkoranyambaga, yewe abandi bakisinzirira. Nyamara mu ijambo ry’Imana niho hari ibisubizo byose ariko abantu ntibarikunda, yewe umubare munini ni uw’abatunze Bibiliya, ariko abazisoma ni mbarwa. Nta yindi mpamvu ni umuco w’ihene wo kwanga umuti.

8. Ntikunda kwahuka mu gitondo niyo uyahuye ntirisha

Ihene yanga urunuka umuntu uyahura mu gitondo, n’iyo ubikoze yirirwa ivuza induru ntirisha itangira kurisha amasaha akuze nyamara ugasanga igihe cyo gutaha ni bwo ishishikariye kurisha.

Hari abakirisitu b’abanebwe batajya bakorera imirimo yabo igihe. Barakererwa kuva kuwa mbere kugeza ku wundi. Usanga umuntu gahunda ze z’icyumweru zose nta n’imwe yakoreye ku gihe zose yarakererewe. No mu materaniro baracyererwa, cyangwa banazinduka ugasanga bameze nk’abatazi icyabazanye bibereye mu tuntu n’utundi.

9. Ntikunda amazi yikundira amamininwa

Ihene nayo burya igira inyota, ariko umuziro ni ukuyibona inywa amazi n’iyo yemeye gatoya bisaba ko uyavangamo umunyu ngo ikunde iyanywe. Yikundira amazi yakoreshejwe indi mirimo akaba ariyo yinywera, cyangwa ayatekeshejwe ibyo kurya. Muby’ukuri ariya mazi afatwa nk’ayanduye, uwashaka kunywa si ariya yanywa.

Aba bakirisitu baba bumva bakizwa ndetse bakabona byaba ari byiza, yewe banakunda kuba mu matsinda y’ababemerera ko bakijijwe n’ubwo baba bababeshya, umuziro ni ukubereka inzira yo gukizwa neza, bashakisha ukuntu babyoroshya bijyanye na kamere yabo, bakavuga ko Yesu yarangije byose. Iyo bagize inyota(Bakeneye ijambo ry’Imana) bashakisha ibyo kunywa bivangiye cga byanduye bibemerera kugumya kwinezeza uko babyumva ariko badatakaje izina ryo kwitwa umukirisitu (Ni ho hava za nyigisho z’ibinyoma zemerera abantu gukora ibyaha ngo yesu yarabirangije, ngo bazajya mu ijuru kubw’ubuntu, kandi iyo babyiga bumva banezerewe cyane nk’abiga ijambo ry’Imana kubera ribaha uburengazira busesuye bwo kwitwara uko bashaka)

10. Iganga aho iryama yarangiza ikanga kuharyama ikarara ihagaze ngo itandura

Ihene ni itungo ribangama rigoye cyane kuko ubusanzwe igira umwanda ariko ikagira ubwibone bukabije. Ntabwo ishobora kuryama ahantu hasa nabi cyangwa hari amazi, nyamara iyo igiye guhurungura cyangwa kuganga ntijya ku ruhande iganga aho iryama yarangiza ikanga kuharyama ikarara izenguruka isakuza.

Hariho abantu bagira uyu muco w’ubwibone kandi ikibazo ntibabyemera ko bibona. Ubuhamya bwabo babwangirisha ingeso zabo nyamara bagashaka kuvugwa neza kandi bakora nabi. Nibo uzasanga bahora bavuga ngo: “Njyewe baranyanga, bangendaho, barakabya…” Ubwibone ni icyaha kibi Imana yanga urunuka, ariko si kenshi abantu babyibuka, nyamara abantu b’abibone ntibazajya mu ijuru.

Haranira kuba umukirisitu utazarobanurwa nk’ihene!
Hahirwa umuntu uhorana kubaha, ariko uwinangira umutima azagwa mu byago. Imigani 28:14

Niyondora Vedaste [email protected]

Inspired by Urukundo Inzira y’Ubugingo Group.