Kuki Yesu yavuze ngo tumere nk’inuma tutagira amahugu?

“Dore mbatumye muri nk’intama hagati y’amasega, nuko mugire ubwenge nk’inzoka, kandi muzabe nk’inuma mutagira amahugu. Matayo 10:16

Mu buzima busanzwe, Inuma ni inyoni ifite umwihariko kuko igereranwe, n’abantu ariko cyane cyane n’abakristo kuko ahanini usanga na Bibiliya itanga ingero nyinshi ku numa, aho usanga bayigereranya nk’inyoni y’intangarugero mu zindi, aha rero dushobora kurebera hamwe bimwe mu bintu inuma ishobora guhuriraho n’umuntu w’umukristo

1.Amahoro n’umutuzo

Abantu benshi iyo babajijwe ibintu bakunda bagaruka ku mahoro, bakagaragaza ko bakunda kubaho nta kintu kibabangamiye. (...)
Inuma ni inyoni zitangaje cyane aho usanga zifite byinshi zikora bifitanye isano n’ibyo abantu bakora mu buzima bwa buri munsi.
Inuma nazo zikunda amahoro cyane kuko iyo uzibangamiye kenshi, ukunda kuzikorakora, n’ibindi...zishobora gufata umwanzuro wo kugutoroka mu gihe wari uzoroye’.

2. Isuku

Nk’uko kubaho k’umuntu isuku iza ku isonga hakoreshejwe amazi, n’inuma ni uko kuko iyo uzoroye haba hakenewe amazi hafi kuko zikunda kwidumbaguza zikuraho imyanda.

Ibi zikunda kubikora cyane mu gihe cy’izuba cyangwa ku numa zifite utwana. Iyo utazihaye amazi zijya kuyahiga ahandi uko haba kure kose, ku buryo bibaye akamenyero zishobora kugenda ntizigaruke.

3. Umufasha umwe (Monogame)

Nubwo abagabo bamwe na bamwe bafata umwanzuro wo gushaka abagore benshi, iyo ukurikiranye kamere-muntu usanga yararemewe kugira umugore umwe.
Umugabo yaremewe gukunda umugore we, uyu nawe agakunda umugabo we ku buryo nta wemera ko umufasha we amuca inyuma, rimwe na rimwe bigatera amakimbirane bikurura n’inzangano ndetse bikaba byagera no ku rwego rwo kwicana.
Inuma n’iyo zorowe ahantu zirenga 100 buri imwe iba izi ingore yayo n’indi ikamenya ingabo yayo; ni naho havuye imvugo y’Igifaransa ngo "deux à deux comme les pigeons", (babiri babiri nk’uko inuma zibigenza).

Iyo inuma ikubaganye ishaka kubangurira itari iyayo habaho intambara idasanzwe, bivuze ko iyo hari inuma 100 hagomba kubaho ingore 50 n’ingabo 50, isigaye ishobora gutoroka mu gihe umworozi wayo atayishakiye iyo ayimenyereza na yo bikabana.

4. Urukundo

Mu mibereho y’inuma zigirana urukundo hagati yazo kuko ni gacye cyane ushobora kubona inuma iri yonyine, akenshi usanga ari ebyiri mu rwego rwo kurindanira umutekano, izi numa rero aho usazisanga ushobora kuzisanga ari ingore n’ingabo kandi zikundanye ku buryo wazireba ukazibwira kuko rimwe na rimwe ubona zishimana, zisomana n’ibindi

Umukristo utagira urukundo na we nta ho aba agana kuko ijambo ry’Imana mu rwandiko rwa mbere pawulo yandikiye abakorinto13:1 haravuga ngo” nubwo navuga indimi z’abantu n’iz’abamarayika ariko singire urukundo, mba mpindutse nk’umuringa uvuga cyangwa icyuma kirenga” bishatse kuvuga ko umukristo nyawe akwiye kwigana inuma akagira urukundo

5. Ubugumba

Akenshi hajya hagaragara abantu bagiye babura urubyaro kubera impamvu zitandukanye yaba umugabo cyangwa umugore, bibaho no ku numa aho usanga zimaranye igihe kirekire zibana ariko ntizigire amahirwe yo kubona utwana (imishwi).

6. Kubaka (ingore n’ingabo zirafashanya)

Nk’uko abantu bashakanye bafatanya muri byinshi biteza imbere umuryango, iyo inuma zigeze igihe cyo kubaka icyari aho zigomba gutera amagi, zirafatanya zigatoragura utwatsi dutandukanye zinjiza mu cyumba aho zubakiwe n’umworozi wazo.

7. Kurera

Ubusanzwe ubufatanye mu kurera ni inshingano y’umugabo n’umugore we, nyuma yo gutera amagi 2 gusa n’inuma zifatanya kurarira aya magi ndetse n’iyo zimaze guturaga zikomeza bwa bufatanye aho ingabo n’ingore zuza (kuuza) ibyo zariye zikagaburira imishwi kugeza aho imenyeye kuguruka no kwirwanaho.

8. Gushakisha imibereho kure no kumenya aho zitaha

Nk’uko abantu bazinduka bajya gushakisha icyabatunga rimwe na rimwe bakajya mu mahanga ya kure, barangiza bakagaruka mu macumbi yabo, inuma nazo zerekeza ikantarange gutembera no gushakisha ibirenze ku byo ziba zahawe n’umworozi.
Ibi bituma zishohora kugenda aharesha n’ibirometero 10 zarangiza ntizibe zayoba aho zitaha.

9. Kwitaba no kumvira

Iyo umworozi yamenyereje inuma kuzihamagara buri imwe mu izina ryayo ziramwitaba kandi zikanamwumvira ku buryo butangaje.
Abenshi mu borozi b’inuma bakoresha kuvugiriza mu guhamagara inuma cyane cyane iyo atazireba hafi kandi ashaka kuzigaburira.

10. Kugira umwete

Iyo ukurikiranye ubuzima bw’inuma, usanga, zinyaruka mu byo zikora byose, abashakashatsi bagaragaje ko mu buzima bwazo nta kintu gishobora kuzihagarika zitarakora ibyo ziyemeje niyo mpamvu usanga akenshi iyo ziguruka ziba zifite umuvuduko udasanzwe mu rwego rwo kugirango zirangize ibyo ziyemeje
Umukristo mwiza akwiye gukorana umwete nkuko ijambo ry’Imana ribidusaba mu gitabo cy’umubwiriza 9:10 A yaho haravuga ngo” umurimo wawe wose werekejeho amaboko yawe uwukorane umwete” urugero niba uri umuririmbyi ubikorane umwete wawe wose kugirango uzahabwe ingororano zikwiranye n’ibyo wakoze

Umwihariko ku numa

Inuma zitera amagi abiri gusa kenshi muri ayo magi havamo ingabo n’ingore zikazabana. Gusa abantu benshi bafata inuma nk’akabarore ku rukundo kuko akenshi bemeza ko zidakunda kugira amahugu, ndetse zikaba zinafatwa nk’ikimenyetso cy’umwuka wera ku bawemera.

Pastor Désiré HABYARIMANA