Kugira gutekereza nk’ukwa kristo, biganisha ku bugingo buhoraho

Ikishe abantu bik’igihe n’ikintu cyitwa ubwenge bwa kamere, aho kugirango umuntu agendere ku bitekerezo by’Imana bigaragarira mu ijambo ryayo. Ahubwo agendera ku bitekerezo bye. Abantu bagendera kubyo babona iteka baricuza mu buzima. Nyamara iyo bafata ibyemezo baba basa n’abari mu kuri, kuko ibyabo birasobanuka mu bwenge bwabo. Ariko kandi ubwenge bwa kamere burashukana, ndetse amaherezo yabwo ni mu rupfu.

Ariko umuntu wihanye by’ukuri, ntabwo aba akigendera ku mitekerereze ye, ahubwo aba yiyemeje kugendera mu mitekerereze mishya ariyo Pawulo yise gutekereza kwa Kristo.Ati"Mbese ni nde wigeze kumenya icyo Uwiteka atekereza ngo amwigishe? Nyamara twebwe dufite gutekereza kwa Kristo. (1 Abakor 2:16) Pawulo amaze kugira imitekerereze itandukanye n’iyo yari asanganywe, ahamagarira Itorero gushaka kumenya icyo Imana ishaka. Mu yandi magambo yashakaga ko Itorero rigira imitekerereze y’Imana. Ariko kugira ngo ugire imitekerereze Imana ishaka, hari icyo usabwa gukora. Nkuko twasomye mu rwandiko Pawulo yandikiye Abaroma aho atangira avuga ngo" Nuko bene Data, ndabinginga! Ese abo yinginga ni bande? Ni Bene Data!

- Ese abingingira iki?
1. Kwitanga : Ikintu cya 1 abingingira “Mutange imibiri yanyu ngo ibe ibitambo bizima byera kandi bishimwa n’Imana”.
-Iki ni ikintu kingenzi twavuga ko aricyo ikintu kibanze mu buzima bw’Umwuka.
- Ntushobora kubaho ubuzima bw’Umwuka utarabanza gupfa muri kamere yawe.
- Igihe cyose uri muzima muri kamere yawe, imirimo myiza ukora yose yaba ari imfabusa ku Mana.
- Hari igihe Imana igerageza kwizera kwacu kugira ngo irebe uko kungana, ugasanga aho wari ucungiye mu buzima niho iri kukubwira ngo” mpa” si uko iba itabibona ahubwo iba ipima kwizera ufite muri wowe!
-Aburahamu yesezeranijwe isezerano nyuma yo kuribona, Imana iramugerageza nawe ntiyazuyaza kuko yakoze icyo yasabwaga kugira ngo Imana irebe kwizera kwe! Nshuti gusenga kwawe, amaturo yawe, ivugabutumwa ryawe n’indi mirimo myiza yose wakora, ihinduka ikizira mu maso y’Imana, kuko ibyo byose ubikorera kamere yawe. Niyo mpamvu Pawulo akomeza uvuga ijambo rikomeye ngo" Ni ko kuyikorera kwanyu gukwiye"
(Matayo 10:28) Kandi ntimuzatinye abica umubiri badashobora kwica ubugingo, ahubwo mutinye ushobora kurimbura ubugingo n’umubiri muri Gehinomu.
- Gutanga imibiri yacu nk’ibitambo ku Mana ni ko kuyikorera gukwiye. Nyamara ibi bintu ntibifatika mu bwenge kuko abantu baba bashaka icyo bakora ngo Imana ibishimire.
- Nubwo ibi bintu bidafatika mu bwenge ariko niko kuri.
- Nta kintu na kimwe Imana ibasha kwakira giturutse muri kamere muntu. Kamere muntu igomba kwegurirwa Imana kugira ngo duhabwe kamere y’Imana. Kristo muri twe rero niwe ubasha gukora umurimo w’Imana.

2. Kutishushanya n’ab’isi

- Ikintu cya 2 Pawulo ahamagarira bene Data ati" kandi ntimukishushanye n’ab’iki gihe"
- Mbese ab’iki gihe bameze bate?
-Pawulo abagaragaza neza muri aya magambo
Birumvikana ko ikiranga abantu bo mu gihe cy’imperuka ari ukwikunda no gukunda impiya, ubundi abantu bagakunda ibibanezeza kurenza gukunda Imana. Kandi rero birumvikana ko umuntu utaratanga umubiri we nk’igitambo agomba kwikunda. Kandi igihe cyose agifite kwikunda ntazabura guhemuka no guteza intambara. Ab’iki gihe bishakira abavugabutumwa bababwira ibijyanye n’irari ryabo. Ntibahishurirwe ikiri inyuma yabo bavugabutumwa baba bakurikira. (2 Tim 3:1-5)

Dore uko Bible ivuga abo bavugabutumwa:
- Bashora abantu mu bibi aho kubakururira mu byiza: Amaso yabo yuzuye ubusambanyi ntahaga ibyaha, bashukashuka ab’imitima idakomeye bafite imitima yamenyerejwe kurarikira ibibi, ni abo kuvumwa. (2Pet 2:14)
-Bajyana abantu kure y’Imana aho kubazana kuriyo: Baretse inzira igororotse barayoba, bakurikiza inzira ya Balamu mwene Bewori wukunze ibiguzi byo gukiranirwa. (2Pet 2:15)
- Baharanira kuvuga ibyo imitima yabo ishaka aho kuvuga ukuri abantu bakeneye: Kuko bavuga amagambo akakaje yo kwihimbaza, bashukashuka abari mu ihunga ryo guhunga abagenda bayobye, babashukashukisha irari ry’umubiri n’imigenzo y’isoni nke. (2Pet2:18)

-Baharanira inyungu zabo bwite aho guharanira iza benshi: Babasezeranya umudendezo nyamara ubwabo ari imbata z’ibiboze, kuko icyanesheje umuntu kiba kimuhinduye n’imbata yacyo. (2Pet 2:19)
- Abiyeguriye gukora bene ibyo amaherezo yabo ni ukurimbura ubugingo bwabo.
(2 Pet 2:20-22)

3. Kugira umutima Imana ishaka

Ikindi cya 3 yongera kwinginga bene Data ni uko bahinduka ati” Ahubwo muhinduke rwose mugize imitima mishya" Burya iyo umuntu ahindutse mu mitekerereze ye, aba ahindutse no mu mibereho ye cg mu buzima bwe. Ntabwo umuntu utarahinduka mu mitekerereze ye abasha kumenya icyo Imana ishaka. Niyo mpamvu Pawulo akomeza avuga ati" Kugira ngo mumenye neza ibyo Imana ishaka ari byo byiza bishimwa kandi bitunganye rwose". Imitekerereze cyangwa imigambi y’Imana, nuko kubayikunda byose bifatanyiriza hamwe kubazanira ibyiza, ubundi bagashushanywa n’Umwana wayo Yesu Kristo. (Abar 8:28-30) Iyo umuntu yahinduwe mu mitekerereze ye, nta kintu na kimwe kibasha kumukura umutima, kuko n’ibimubaho byose abyakira nk’ibiri bumuviremo ibyiza. Ntabwo Yesu yigeze agira igitekerezo cyo guhabwa, ahubwo niwe wanezezwaga no gutanga.

Igituma Data ankunda ni uko ntanga ubugingo bwanjye ngo mbusubirane. Nta wubunyaka, ahubwo mbutanga kubushake bwanjye. Nshobora kubutanga kandi nshobora kubusubirana, kuko iryo ari itegeko nategetswe na Data. (Yoh 10:17-18) Niba umugambi w’Imana ari uko dushushanywa n’Umwana wayo Yesu Kristo, kandi itegeko rya Data ku Mwana ar’uko atanga ubugingo bwe, birasobanutse neza impamvu yatumye Pawulo yandikira bene Data bo mu itorero ry’i Roma ngo batange imibiri yabo.

Ntabwo byoroshye ariko kandi birashoboka mu gihe warangije guhishurirwa iby’ubugingo buhoraho, ari byo by’Umwuka. Pawulo rero wari ufite gutekereza kwa Kristo muri we, yandikiye itorero ry’Abafilipi ati" Mugire umutima wari muri Kristo Yesu. Uwo nubwo yabanje kugira akamero k’Imana, ntiyatekereje yuko guhwana n’Imana ari ikintu cyo kugundira, ahubwo yisiga ubusa, ajyana akamero k’umugaragu w’imbata, agira ishusho y’umuntu, kandi amaze kuboneka afite ishusho y’umuntu yicisha bugufi, araganduka ntiyanga no gupfa ndetse urupfu rwo ku musaraba". (Abafil 2:5-8)

Bene Data, Abakozi b’Imana bafite umutima nk’uwa Kristo, ntabwo bagomba kuvuga ubutumwa kugira ngo baronke ibintu cg ngo babone icyubahiro, kuko ababikora batyo nta gutekereza kwa Kritso bafite. Ntaho bataniye na Balamu washakaga kuvuma ubwoko bw’Imana, kugirango yironkere igihembo cy’Umwami Baraki.

Abayobozi b’amatorero baramutse bagize gutekereza kwa Kristo, intambara zishingiye ku byubahiro no ku bintu bitangirwa mu nzu y’Imana zarangira, maze intama nazo zikagubwa neza zikagira amahoro, kuko zose zakwitabwaho kimwe n’umutima w’urukundo.
Imana idufashe cyane tugire gutekereza nk’ukwa kristo

Ismael KAYISHEMA @Agakiza.org