Korari Siloam nyuma yo gutaramira i Nyabihu igarutse mu gitaramo cy’umuhanzikazi Karigirwa Odette

Kuri uyu wa gatandatu w’icyumweru gishize, ahagana 10h00 z’igitondo, nibwo korari Siloam ibarizwa ku mudugudu wa Kumukenke muri Paruwasi ya Gasave muri ADEPR akarere ka Gasabo, yahagurutse i Kigali yerekeza mu Karere ka Nyabihu ku mudugudu wa Jenda aho yagombaga kwitabira igiterane ngaruka mwaka cy’ivugabutumwa gitegurwa na korari Umuriri ibarizwa aho ku mudugudu wa Jenda mu itorero ry’akarere ka Nyabihu.

Mu masaha ya saa munani z’amanywa ubwo korari Siloam yageraga mu Ijenda yakiranywe urugwiro, aho bari bategerejwe n’abatari bakeya, bararirimba imitima y ‘abantu b’Imana iranezerwa.

Imigendekere myiza yo kuwa gatandatu byatumye abantu baba benshi mu buryo butangaje, aho amateraniro yabere hanze ndetse na nyuma ya saa sita igitaramo gikomereza hanze kuko mu rusengero ntibyari gushoboka kubera umubare munini w’abitabiriye.

Abantu bari benshi

Korari Umuriri yatumiye Siloam,yaririmbanye umunezero.

Mu kiganiro twagiranye n’umuyobozi wa korari Umuriri yateguye iki gitaramo, Bwana Emmanuel Ndikubwimana, ku murongo wa telefone yadutangarije ko ibihe bagiranye na Siloam batazabyibagirwa mu mateka ya korari Umuriri, agira ati : « Siloam twagiranye ibihe byiza tutazibagirwa, aho twungutse abakizwa barenga 150, nyuma y’ijambo ry’Imana n’umuvugabutumwa Francois Mukeshimana. Iki giterane ni ngaruka mwaka, umwaka ushize twagikoranye na korari Besalel guturuka Kicukiro muri Kigali, ibihe twagiranye na Siloam muri izi mpera z’icyumweru byatwibukije iby’icyo gihe nabyo kuko byari bihambaye. »


Korari Umuriri baririmba

Siloam nyuma yo guhindukira rero ihise iboneza mu myiteguro y’igiterane cy’umuhanzikazi KARIGIRWA Odette, giteganijwe mu cyumweru gitaha taliki 30 Nyakanga 2017 guhera 14h00 kuri ADEPR Kumukenke.


Nyuma ya concert mu Ijenda bazaririmba ku Kumukenke

Odette Karigirwa ni umuririmbyi ubarizwa mu itorero rya ADEPR ku mudugudu wa Kumukenke. Iki giterane kandi yagitumiye mo na Dany Mutabazi umenyerewe ku ndirimbo Calvali.

Kizaba kirimo na NYAGASANARIBUKA Loti nk’umuvugabutumwa.

Intego y’iki giterane igira iti: “Yibuka isezerano rye iminsi yose » Zaburi : 105 :8.

Niyondora Vedaste [email protected]