Korari Isezerano irataramira ab’i Nyamagabe inabaha Albumu nshya


Korari Isezerano kuri ubi ni imwe mu makorari bitakiri ngombwa gutangaho ibisobanuro byinshi, kuko imaze kumenyekana cyane mu rw’imisozi igihumbi kubw’ibihangano byabo bikora ku mutima abatari bakeya. Kuri ubu igiye gutaramira abo mu Majyepfo mu karere ka nyamagabe aho izaba inamurika umuzingo wa kabiri w’indirimbo zihimbaza Imana mu buryo bw’amashusho.

Ni kuri iki cyumweru tariki ya 8 Ukwakira 2017 saa saba z’amanywa, mu nzu mberabyombi y’Akarere ka Nyamagabe, aho korari Isezerano yo mu itorero rya ADEPR Nyamagabe paruwasi ya Sumba izaba isusurutsa abazitabira iki gitaramo cyo kumurika Album nshya « Ibyo wankoreye », kizabera mu nzu mberabyombi y’Akarere ka Nyamagabe.


Korari Isezerano

Iyi Album igizwe n’indirimbo icumi ziganje mo ubutumwa bwo gushima Imana ku mirimo yayo myiza, gukomeza abagenzi, amasezerano, gutaha Ijuru, ndetse no kuzirikana umubasaraba wa Yesu.


Isezerano mu gikorwa cyo gufata amashusho

Iyi korari yabayeho kuva mu mwaka wa 1999, icyo gihe mu bantu bakeya bari bagize icyumba cy’amasengesho, haza kuboneka mo batanu biyemeza kujya baririmba muri icyo cyumba, ari nabo baje kwaguka uyu munsi bakaba bamaze kugera kuri byinshi mu ivugabutumwa mu bice bitandukanye by’igihugu.


Korari Isezerano baririmba

Hari icyizere cy’imigendekere myiza y’iki giterane ukurikije ibindi biterane iyi korari yagiye ikora, urugero ni nk’icyo iherukaga gukora mu ntangiriro z’uyu mwaka, ubwo bashyiraga hanze umuzingo w’ indirimbo z’amajwi ari nazo bakoreye amashusho. Kuri iyi nshuro korari Isezerano izafatanya n’umuhanzi Stella Manishimwe, korari Elayo yo muri Paruwasi Sumba ndetse na Pasiteri Rudasingwa Claude.

Stella Manishimwe azaririmba muri iki giterane


Past. Rudasingwa Claude ni we uzabwiriza muri iki giterane