Kimwe muri byinshi by’ingenzi twigira kuri Aburahamu - Ev. Clarisse

IKIGANIRO CYABAYE HAGATI Y’IMANA N’INSHUTI YAYO

Intangiriro 18:23-33

Aburahamu aramwegera aramubaza ati : “Warimburana abakiranutsi n’abanyabyaha? Ahari muri uwo mudugudu harimo abakiranutsi mirongo itanu. Waharimbura se ukanga kuhareka ku bw’abakiranutsi mirongo itanu bahari? Ntibikaguturukeho kugira utyo, kurimburana abakiranutsi n’abanyabyaha, abakiranutsi bagahwana n’abanyabyaha kirakazira! Umucamanza w’abari mu isi bose ntiyakora ibyo kutabera.”

Uwiteka aramusubiza ati “Nimbona i Sodomu abakiranutsi mirongo itanu bari muri uwo mudugudu, nzahababarira hose ku bwabo.”

Aburahamu arongera aramubwira ati : “Mpangaye kuvugana n’umwami wanjye, nubwo ndi umukungugu n’ivu gusa. Ahari ku bakiranutsi mirongo itanu hazaburaho batanu, uzarimbura umudugudu wose, kuko habuzeho batanu?” Aramusubiza ati : “Sinzawurimbura nimbonayo mirongo ine na batanu.”

Arongera aramubwira ati : “Ahari hazabonekamo mirongo ine.” Aramusubiza ati : “Sinzawurimbura ku bw’abo mirongo ine.” Aramubwira ati : “Umwami ye kurakara, nanjye ndavuga. Ahari hazabonekamo mirongo itatu.”

Aramusubiza ati : “Sinzawurimbura nimbonayo mirongo itatu.” Aramubwira ati : “Dore mpangaye kuvugana n’umwami wanjye. Ahari hazabonekamo makumyabiri ” Aramusubiza ati : “Sinzawurimbura ku bw’abo makumyabiri.”

Aramubwira ati : “Umwami ye kurakara, reka mvuge rimwe gusa. Ahari hazabonekamo icumi.” Aramusubiza ati : “Sinzawurimbura ku bw’abo cumi.” Uwiteka arigendera, amaze kuvugana na Aburahamu, Aburahamu asubira iwe.

Iki ni ikiganiro Imana Data yagiranye n’inshuti yayo Aburahamu.
Data wa twese yifuza cyane ko tuba inshuti ze nk’uko yabanaga na Aburahamu, niyo mpamvu yaduhaye Yesu. Helleluyah

Dore ikintu nyamukuru kiranga inshuti z’Imana ari nabo bera bayo Bibiliya ivuga, ni ukugira umutima nk’uwo Data afite wo kubabazwa n’abarimbuka.

Ikintu gikomeye gisumba ibindi tubonera mo umutima w’urukundo rw’Imana Data, ni ukuntu yatanze Yesu ngo adupfire dukizwe, ibihano twari dukwiye bimujyaho byose, ndetse n’amaraso ye arameneka kugira ngo tubabarirwe ibyaha, kuko ijambo rye ritubwira ko hatabayeho kumeneka kw’amaraso ntihabaho kubabarirwa ibyaha

Ibyo bintu byose Imana yadukoreye, ntabwo twari twabiyisabye, kandi nta kiguzi icyo ari cyo cyose yadusabye uretse kwemera tukizera ubundi tugakizwa.

Nguwo umutima Imana yifuza ko twagira, ni umutima w’urukundo udutera guhangayikira abarimbuka nk’uko yabidukoreye natwe.

Imana yatanze Yesu ku buntu kandi ntawundi mwana yari isigaranye

Ibyo bitwigisha ko dukwiye gukora iyo mirimo myiza kubwo kwitanga no gukunda benedata gusa nta kindi kiguzi kandi atari uko dutanze ibisaguka.
Dukwiye gutanga icyo dukunda kugira ngo dukize abandi kabone n’ubwo ntakindi twaba dusigaranye.

Imana yatanze Yesu yongera kumusubirana nyuma umurimo we urangiye.

Ibyo bikwiye kutwigisha ko gutanga kubw’ubutumwa bwiza bidatera igihombo, ahubwo bitugarukira mu migisha y’uburyo butandukanye nyuma yo gusohoza icyo Imana ishaka mu bwoko bwayo.

Bibabaza Imana cyane kubona umuntu yacunguje umwana wayo ari guseka, gusebya no gutaramana mugenzi we wagize intege nkeya. Bisa no kubona murumuna/mukuru wawe yapfuye wowe ukaba uri guseka cyakubereye ikiganiro kiryoshye mu gihe umubyeyi wawe we ari ku kiriyo.

Abenshi baratangira bati : « Apuu, sinababwiraga, ubundi nari narabivuze, nabibonye kare… »

Uhagaze niwe ugwa. Muvandimwe, ubwo uhagaze hari abandi bagutegereje nawe waguye, kandi hatabaye imbabazi z’Imana nawe bakubona.
Wasanga atari n’uko uwo usebya yakoraga bibi kukurusha ahubwo ari uko ibyawe bitamenyekana, ushobora no gusanga uwo mugenzi wawe aguye kugira ngo urukundo uvuga ko ukunda Imana rupimwe, kuko niba utababajwe n’uko inshuti yawe yapfushije uba ubeshya ntabwo uba uyikunda by’ukuri.

Benedata twese turi abanyantege nke byashoboka rwose gutsindwa hatabaye Imana yonyine. Ariko satani wahangaye Petero ari kumwe na Yesu imbona nkubone utekereza ko wowe yagutinya? Ibuka igihe Yesu amwirukana ati: "mva inyuma satani" kandi ari Petero uvuze. Bivuze ngo satani yari atangiye gukorera muri Petero. Cyangwa ko yatinyutse Yesu ubwe anashoje amasengesho y’iminsi 40, wowe yagutinya koko?

Singambiriye kugukangurira kugwa nk’aho ari ibisanzwe, ahubwo ndakwibutsa kubabazwa n’abarimbuka no kubagirira umutwaro, we kuba nk’aho ntacyo bikubwiye kandi nawe bishora kukugeraho ukaba wakenera ubutabazi nk’ubwo mugenzi wawe akeneye, ndetse nk’ubwo twahawe twese ubwo Yesu yababazwaga kubwacu.

Rero niba mwene so yacumuye ku Mana cyangwa kuri wowe, ujye ujya inama n’umutima wawe uyobowe na Mwuka wera umenye icyo ukwiye gukora kandi icyo Mwuka akubwira ugikore.

Ntukajye kumuteza abantu ahubwo mwingingire wenda Data yagira icyo akora. Fatira urugero rwiza kuri Aburahamu twabonye haruguru.

Mwuka wera nakubwira kumusanga, nabyo ubikore. Numusanga akakunanira azapfa yizize, urubanza rwe ntiruzakuzaho, azarimbuka nk’uko Sodomu na Gomora harimbutse, ariko narimbuka akunyuze imbere ntacyo wabikozeho cyaba ikigaragara cyangwa ikitagaragara, ndakubwiza ukuri ko wabyemera utabyemera uzaba ufite umugayo mu maso y’Imana.

Uru rugendo ntitururimo nk’abarushanwa ubwacu, ahubwo turi ingingo zigize umubiri wa Yesu, hanyuma zifatanyiriza hamwe kurwanya umwanzi satani, kandi Data yabyemeye atyo kugira ngo duterane inkunga muri uru rugendo kandi tubashe kuba umwe.

Imana iguhe umugisha kubw’intimba ugirira abanyabyaha n’abatarakizwa. Niba utajyaga ubyitaho, ukimara kumenya ko ari inshingano yawe tangiraubikore!

Vedaste [email protected]