Kigali: Umuryango w’ Agakiza (Agakiza Family) bongeye gutegura wa mugoroba wo kuramya ukundwa na benshi.

Umugoroba wo kuramya ni igitaramo gihuriza hamwe abagize agakiza Family, kikaba ari igitaramo kimaze kumenyerwa cyane mu bitaramo bibera hano mu Rwanda, n’ubwo iyo bibaye ngombwa ibitaramo byabo byambukiranya imipaka bikabera no mu bindi bihugu bitandukanye hirya no hino ku migabane igize uyu mubumbe dutuyeho. Kuri iyi nshuro umugoroba wo kuramya uzabera I Kigali kuri Assamblee de Dieu Kimihurura taliki ya 27/08/2017, guhera 14h00.

Agakiza Family ni bantu ki?

Iri tsinda “Agakiza Family” rikomoka ku rubuga (website) agakiza.org, uru rubuga rukaba ari urw’umuryango w’ivugabutumwa wo gushaka no gukiza icyazimiye SSHM (Seek and Save Humanity Ministries) hifashishijwe Murandasi (Internet) uyobowe na Past. Habyarimana Desire.

Past. Habyarimana Desire umuyobozi wa SSHM

Abakunzi b’uru rubuga rero bari hirya no hino ku isi baturuka mu matorero (Amadini) atandukanye, bagiye bihuriza hamwe nanone hifashishijwe imbuga nkoranyambaga nka WhatsApp aho basangirira hamwe ijambo ry’Imana, ndetse bakanakira ku buryo bworoshye zimwe mu nkuru n’inyigisho zinyura kuri agakiza.org. Abo rero nibo bagize iri huriro ryitiriwe website agakiza.org, bo bitwa “Agakiza Family.”(Tubibutse ko ibikorwa by’uyu muryango bidashingiye ku idini iryo ariryo ryose keretse ukuri kw’ijambo ry’Imana gusa.)

Ibyishimo biba ari byose mu biterane by’Agakiza family

Ku bufatanye na SSHM, abagize Agakiza Family bakunze gutegura ibitaramo by’ivugabutumwa mu bihugu bitandukanye ku isi, twavuga ingero nk’Ubuhinde, Uburundi,Tanzaniya, Kenya, Uganda, Mozambique n’ahandi hose bikunze bagerayo kubw’intego nkuru yo gushaka no gukiza icyazimiye ndetse no kujyana ubutumwa bwiza kugeza ku mpera y’iyi nk’uko byanditse mu ijambo ry’Imana. (Luka 19:10; Ibyakozwe 1:8)

Imigoroba yo kuramya itegutegurwa n’Agakiza Family, ni bimwe mu bitaramo bigera igihe cyo kuba bikumbuwe cyane n’abigeze kubyitabira kubera ibihe byiza biba bihari, aho abantu bahabwa umwanya w’umudendezo wo kuramya Imana mu buryo butandukanye, haba mu kuririmba, mu gusenga, ijambo ry’Imana, n’indi mirimo itandukanye yose ifite intego yo kuramya Imana.

Abayobozi b’amatorero atandukanye bakunze kwitabira ibitaramo by’Agakiza Family

Kuri iyi nshuro uyu mugoroba uzabera i Kigali ku rusengero rwa Assamblee de Dieu Kimihurura taliki ya 27/08/2017, guhera 14h00. Bamwe mu bazitabira iki gitaramo Agakiza Worship Team imaze ku menyerwa muri ibi biterane byo kuramya Imana, Kingdom of God Ministries, izwi cyane ku ndirimbo zitandukanye nka “Nzamuhimbaza nkiriho” Umuramyi Bosco Nshuti abenshi bazi ku ndi rimbo ivuga ngo “Ibyo ntunze ni ibyawe” ndetse n’umuryango wa Past. Habyarimana Desire uzitabira iki gitaramo.
Muhawe ikaze mwese nta kiguzi cyo kwinjira ni ubuntu gusa!


Past. Desire Habyarimana na Madam bazitabira iki gitaramo

Kingdom of God bazaba bahari (NZAMUHIMBAZA NKIRIHO)

Bosco Nshuti (IBYO NTUNZE NI IBYAWE)

Tubashimiye gukomeza kubana natwe, Yesu abahe umugisha!

Niyondora Vedaste [email protected]