Kigali: Igiterane Africa Haguruka kigiye kuba ku nshuro ya 18, kibimburirwe na Youth Arise Conference

Africa haguruka ni igiterane mpuzamahanga gitegurwa n’itorero Zion Tample riyobowe na Apostle Dr Paul Gitwaza. Uyu mwaka giteganijwe kuba guhera taliki ya 2 kugeza tariki 9 Nyakanga muri stade ya IPRC Kicukiro. Kikaza bimburirwa n’ikindi cyiswe “ Youth Arise Confrence”kizatangira kuya 29 Kamena kugeza kuya 01 Nyakanga uyu mwaka kuri Zion Tample mu Gatenga Kigali-Kicukiro.

Africa haguruka yumvikanye bwa mbere mu mwaka wi 2000 ku muhati n’ishyaka bya Apostle Dr Paul Gitwaza umushumba mukuru w’itorero Zion Tample, agamije ko abatuye umugabane wa Afurika batera imbere mu mwuka no mu mubiri. Muri uyu mwaka, Africa Haguruka ifite insanganyamatsiko igira iti: "Africa Byuka. Ni iki gitumye ugwa wubamye? "( Yosuwa 7:10)

Africa haguruka izitabirwa n’abakozi b’Imana baturutse hirya no hino ku isi, barangajwe imbere na Apostle Dr Paul Gitwaza, Apostle Betta Mengistu wo muri Ethiopia, Pasiteri Wilson Bugembe wo muri Uganda, Pasiteri Werner Nichtigal ukomoka mu Budage, Pasiteri Jacobus Nomdoe wo muri Afurika y’epfo, Révérend Dr. Francis Mbadinga kuva muri Gabon n’abandi.

Mu minsi yose iki giterane kizamara, Gahunda izajya itangira saa kumi zuzuye z’umugoroba kuva taliki ya 02 Kamena kugeza taliki 09Nyakanga. Naho mu masaha y’amanywa hateganijwe amahugurwa azajya atangwa n’inzobere mu mirimo yo guhugura abantu mu bice bitandukanye by’ubuzima hari mo Gukorera Imana, Ubucuruzi, Ubuyobozi, Umuryango, uburezi, Itangazamakuru n’imyidagaduro, n’ibindi. Kwiyandikisha mu bazitabira aya mahugurwa bikorerwa kuri Zion Tample Celebration Center mu Gatenga .

Mu ijambo rye kuri televiziyo Authentic Dr Apostle Paul Gitwaza umushumba w’itorero Zion Tample ku isi yagize ati: “Ni cya gihe cyo kongera guhura tugatekereza kuri Afurika, tukayisengera, tukanarebera hamwe ku ngamba zayiteza imbere. U Rwanda ruzahagurutsa Afurika kuko Imana yarukuye ahantu kure, ikoresheje abarutuye, inshuti zarwo, abanyamasengesho b’ingeri zitandukanye, aba bose bayobowe n’Umukuru w’Igihugu. Afurika igomba guhaguruka mu butunzi, mu bikorwa remezo no mu bwenge bwayo kuko indi migabane yarabyutse iriruka.”


Afurika Haguruka izabimburirwa n’igiterane cyiswe “Youth Arise Conference”, giteganyijwe kuva kuya 29 Kamena kugeza kuya 1 Nyakanga 2017 kuri Zion Temple mu Gatenga. Kizasorezwa kuri Stade ya Kicukiro kuya 8 Nyakanga, kuva saa tatu kugeza saa sita.

Apostle Dr Paul Gitwaza ni we uzayobora iki giterane, kizaba kiri mo kandi Pastor Tommy Deuschle na Pastor Henry Mugisha.

Amwe mu makorari akomeye aturuka mu madini atandukanye hano mu Rwanda azaririmba muri Africa haguruka 2017, hari mo Healing Worship Team, True Promises, Heavenly Melodies, itsinda rya Beauty for Ashes na Asaph Nyarutarama.

NIYONDORA Vedaste [email protected]